Ke ʼAua Naʼa Hehe Fakavilivili Takotou Fakakaukau!

1, 2. He ko ʼe kua mafola te agakakā, pea ko te ʼu agakakā fea ʼae ʼe tou sio ki ai ʼi te temi nei? (Vakaʼi te ʼuluaki pakī.)

ʼE TOU maʼuʼuli nei ʼi he malama kua mafola ai ia te agakakā mo te loi. Pea ʼe mole tonu ke tou punamaʼuli ki ai. ʼE fakaha lelei ʼi te Tohi-Tapu kua faiva ia Satana te Tevolo ʼi te kakā ʼi ʼo te hahaʼi pea ʼe ko te pule ʼo te malama ʼaeni. (1 Tim. 2:14; 1 Soa. 5:19) ʼI te kua ovi mai ʼo te fakaʼosi ʼo te malama agakovi ʼaeni, kua lahi age te ita ʼa Satana koteʼuhi “kua nounou pe tona temi.” (Apk. 12:12) Koia ʼe feala pe hatatou ui ko natou ʼae ʼe fakahalaʼi e te Tevolo ʼe lesili anai tanatou agafakakakā. ʼE natou faigaʼi anai ke natou kakā ʼi tafitō ia natou ʼae ʼe tauhi kia Sehova.

² Moka talanoa te ʼu talalogo ki te ʼu kaugana ʼa Sehova mo ʼanatou akonaki, ʼi ʼihi temi ʼe natou fakaha fakakoga pe te moʼoni peʼe natou loi. ʼE fakamafola ni fakamatala loi ʼi te ʼu kupu tafitō ʼo te ʼu sulunale, mo te ʼu meʼa ʼae ʼe fakaha ʼi te televisio pea mo te Neti. Ko ʼihi ʼe natou iita ʼuhi heʼe natou tui ki te ʼu loi ʼaia kaʼe ʼe mole natou kumi muʼa te moʼoni.

3. Kotea ʼae ʼe lava tokoni mai ke mole fakahalaʼi tatou?

³ Kaʼe meʼa fakafiafia heʼe tou lava tekeʼi te ʼu loi ʼa Satana. Pea ke mole fakahalaʼi tatou, ʼe tokoni mai te Tohi-Tapu koteʼuhi “e aoga ia ki te . . . fakatonutonu o te hala.” (2 Tim. 3:16) ʼE ha ʼi te meʼa ʼae neʼe tohi e te apositolo ko Paulo ko ʼihi Kilisitiano ʼi Tesalonika neʼe fakahalaʼi natou ʼaki ni loi. Neʼe ina tohi fenei: “Ke aua naa vavataga [peʼe hehe] faigafua takotou fakakaukau.” (2 Tes. 2:1, 2) Kotea te ʼu ako ʼe tou lava taʼofi mai te fakatokaga ʼofa ʼa Paulo, pea ʼe feafeaʼi hatatou lava maʼuliʼi?

TE ʼU FAKATOKAGA ʼAOGA

4. Neʼe fakatokaga feafeaʼi te kau Kilisitiano ʼo Tesalonika ki te hoko mai ʼo “te aho” ʼo Sehova, pea ʼe fakatokaga feafeaʼi tatou ia ʼaho nei?

⁴ ʼI tana ʼuluaki tohi ki te kau Kilisitiano ʼo Tesalonika, neʼe fakatokaga natou e Paulo ki te hoko mai ʼo “te aho” ʼo Sehova. Neʼe ina loto ke natou manatuʼi te ʼaho ʼaia pea ke natou nofo teuteu ki ai. Neʼe ina ui age ko natou ko “he u fanau . . . o te malama” pea mo toe ui fenei: “Tou alaala pea tou fakapotopoto.” (Lau ia 1 Tesalonika 5:1-6.) Ia ʼaho nei, ʼe tou fakatalitali ki te fakaʼauha ʼo Papilone Lahi, ia te kautahi fakamalamanei ʼo te ʼu lotu hala. Pea ʼe kamata ai anai te ʼaho lahi ʼo Sehova. ʼE tou iloʼi pe fakahoko feafeaʼi anai e Sehova ia tana fakatuʼutuʼu. ʼI te kokelekasio, ʼe tou maʼu tuʼumaʼu ai ni fakamanatu ʼe tokoni mai ke tou teuteu ki te ʼaho ʼo Sehova. Kapau ʼe tou fakalogo lelei ki te ʼu fakatokaga liuliuga ʼaia, pea ʼe malohi ai anai tatatou fakatotonu ʼae ke tou tauhi ki te ʼAtua ʼaki totatou “ ʼatamai.”—Loma 12:1, MN.

5, 6. (1) Kotea ʼae neʼe talanoa ki ai Paulo ʼi tana lua tohi ki te kau Tesalonika? (2) Kotea ʼae ka vave fai anai e Sesu, pea ko te ʼu fehuʼi fea ʼae ʼe tonu ke tou fai?

⁵ Neʼe fai e Paulo ia tana lua tohi ki te kau Tesalonika. Neʼe talanoa ai ki te hoko mai ʼo te mamahi lahi ʼi te temi ʼae ʼe fakahoko ai anai e Sesu te fakamau ʼa Sehova kia “natou e mole natou iloi te Atua pea mo natou e mole natou fakalogo” ki te logo lelei. (2 Tes. 1:6-8) ʼI te kapite 2 ʼo tana tohi ʼaia, ʼe tohi ai e Paulo neʼe kua liliu ʼihi ʼi te kokelekasio ʼo “oho noa” ki te ʼaho ʼo Sehova he neʼe natou ui kua tau ovi mai pe. (Lau ia 2 Tesalonika 2:1, 2.) Neʼe mole mahino katoa te kau ʼuluaki Kilisitiano pe fakahoko feafeaʼi anai e Sehova ia tana fakatuʼutuʼu. Pea neʼe fakamoʼoni ki ai ia Paulo ʼi tana tohi fenei ki muli age ʼo ʼuhiga mo te ʼu lea fakapolofeta: “E tou iloi fakakoga, pea e tou tala fakapolofeta fakakoga, kae ka hau anai te mea ae e lelei tukupau, e pulihi anai te mea ae e fakatemi.” (1 Ko. 13:9, 10) Kaʼe neʼe feala pe hanatou nofo agatonu ʼaki tanatou fakalogo ki te ʼu fakatokaga ʼa Sehova ʼae neʼe tohi e Paulo mo te apositolo ko Petelo pea mo ʼihi atu tehina fakanofo agatonu ʼo te temi ʼaia.

⁶ Moʼo fakatonutonuʼi ʼanatou manatu, neʼe takitaki e te ʼAtua ia Paulo ke ina fakamahino ʼe hoko anai te aposetasia lahi ʼi muʼa ʼo te ʼaho ʼo Sehova pea ʼe ha anai “te tagata o te agahala” peʼe ko te tagata ʼae ʼe manuki ki te lao.a ʼOsi ʼaia, ʼi te temi ʼae kua fakakatofa e te ʼAtua, ʼe molehi anai e Sesu ia te tagata ʼae ʼe manuki ki te lao pea mo natou fuli ʼae ʼe ina fakahalaʼi. Neʼe fakamahino e Paulo ʼe fakamauʼi anai natou he neʼe “mole natou tali te ofa ki te mooni.” (2 Tes. 2:3, 8-10) Koia ʼe tonu ai ke tou fai te ʼu fehuʼi ʼaeni: “ ʼE au ʼofa moʼoni koa ki te moʼoni? ʼE au ako koa te ʼu Tule Leʼo pea mo te ʼu tohi ʼae ʼe foaki ki te hahaʼi ʼa te ʼAtua, ke au iloʼi ai te ʼu fakamahino foʼou ʼo te ʼu akonaki Fakatohi-tapu?”

KOTOU FILIFILI LELEI ʼAKOTOU FAKAKAUGA

7, 8. (1) Kotea ʼae neʼe feala ke tuʼutamaki ai te kau ʼuluaki Kilisitiano? (2) Kotea ʼae ʼe feala ke tuʼutamaki tafitō ai te kau Kilisitiano ia ʼaho nei?

⁷ ʼE toe ʼi ai anai mo te tahi ʼu faʼahi ʼe feala ke tuʼutamaki ai te kau Kilisitiano. Neʼe faitohi ia Paulo kia Timoteo “ko te manumanu paaga ko he aka aia o te u kovi fuli.” Neʼe ina toe ui “ko ihi, nee puke e te mea aia, nee natou hehe leva o mamao mai te tui,b pea nee natou fetooki natou totonu ki te u mamahi kehekehe.” (1 Tim. 6:10) Neʼe tonu foki ke natou tokaga tuʼumaʼu naʼa natou to ki “te u gaue o te kakano.”—Kal. 5:19-21.

⁸ Neʼe fakatokaga malohi e Paulo ia te kau Tesalonika ʼo ʼuhiga mo natou ʼae neʼe ui ko te ʼu “apositolo loi.” Ko ʼihi ʼi te kau Tesalonika neʼe natou palalau “ki te ʼu meʼa pikopiko, koteʼuhi ke natou toho te kau tisipulo ke mulimuli ia natou.” (2 Ko. 11:4, 13; Gaue 20:30, MN) Neʼe vikiʼi e Sesu te kokelekasio ʼo Efeso koteʼuhi neʼe mole natou tali te “kau agakovi” ʼaia ʼi te kokelekasio. Neʼe natou fakamoʼoni ko te ʼu tagata ʼaia neʼe ko te ʼu apositolo loi pea mo te kau gutuloi. (Apk. 2:2) ʼI tana lua tohi ki te kau Tesalonika, neʼe fai e Paulo te tokoni ʼaeni: “E matou kole mamahi atu, u tehina, i te higoa o totatou Aliki ko Sesu-Kilisito, ke kotou fakamamao mai te u tehina fuli e mauli i te piko.” (2 Tes. 3:6) Koia kapau neʼe mole natou fakatahi mo he tahi neʼe piko pe neʼe mole fia gaue, neʼe toe maʼuhiga foki ke mole natou fakatahi mo he tahi neʼe hage tana aga ko he aposeta. Neʼe tonu ke natou fakamamaʼo mai te faʼahiga hahaʼi ʼaia he neʼe fakatupu tuʼutamaki kia natou. Pea ʼe toe moʼoni te faʼahi ʼaia ia ʼaho nei.—Taag. 13:20.

9. He ko ʼe ʼe tonu ke tou tokakaga moka kamata palalau he tahi ki he ʼu meʼa ʼe mole fakamahino ʼi te Tohi-Tapu peʼe ina fatufatuʼi te kautahi ʼa Sehova?

⁹ Kua ovi mai pe te mamahi lahi pea mo te fakaʼauha ʼo te malama agakovi ʼaeni. Pea ia ʼaho nei kua maʼuhiga age te ʼu fakatokaga ʼae neʼe fai e Sehova ʼi te temi ʼo te kau ʼuluaki Kilisitiano. ʼE mole tou loto anai ke tou “tali ia te ʼofa makehe ʼo te ʼAtua ʼo fakaʼalu noa.” Kapau koia, pea ʼe mole tou maʼu anai te fealagia ʼae ke tou maʼuʼuli ʼo heʼe gata. (2 Ko. 6:1, MN) Koia ʼe tonu ke tou tokakaga ki ʼihi ʼi ʼatatou fono ʼae ʼe natou fakamaʼuhigaʼi ʼanatou manatu ʼo ʼuhiga mo he ʼu meʼa ʼe mole fakamahino ʼi te Tohi-Tapu. ʼE tonu ke tou toe tokakaga kia natou ʼae ʼe natou fatufatuʼi te kau tagata ʼafeā mo ʼotatou tehina mo tuagaʼane.—2 Tes. 3:13-15.

“KOTOU TAOFI TE U AKONAKI”

10. Ko te ʼu akonaki fea ʼae neʼe fakalotomalohiʼi te kau Kilisitiano ʼo Tesalonika ke natou mulimuli ki ai?

¹⁰ Neʼe fakalotomalohiʼi e Paulo ʼona tehina ʼi Tesalonika ke natou “tuu malohi” pea mo natou haga maʼuliʼi te ʼu faʼahi ʼae neʼe natou ako. (Lau ia 2 Tesalonika 2:15.) Kotea “te u akonaki” ʼae neʼe akoʼi age kia natou? Neʼe ko te ʼu akonaki ʼa Sesu pea mo te ʼu meʼa ʼae neʼe tohi e Paulo pea mo ʼihi atu ʼaki te takitaki ʼa te ʼAtua. Neʼe mole talanoa ia ki te ʼu akonaki ʼae neʼe akoʼi e te ʼu lotu hala. Neʼe vikiʼi e Paulo ʼona tehina ʼi te kokelekasio ʼo Kolinito koteʼuhi ‘neʼe natou manatuʼi ia ia ʼi te meʼa fuli, pea neʼe natou taʼofi ʼana akonaki ohage ko tana tuku age kia natou.’ (1 Ko. 11:2) Ko te ʼu akonaki ʼaia ʼe tuha mo te falala he neʼe haʼu mai ia Sehova mo tona ʼAlo.

11. Ko te ʼu faʼahi fea ʼae ʼe feala ke fakatupu kovi ki ʼihi moka kakā ʼi natou?

¹¹ ʼI te tohi ʼa Paulo ʼae neʼe ina fai ki te kau Hepeleo, neʼe talanoa ia kia faʼahi ʼe lua neʼe feala ke natou tui gataʼa ai pea ke mole natou nofo agatonu kia Sehova. (Lau ia Hepeleo 2:1; 3:12.) Neʼe talanoa ia ʼo ʼuhiga mo te tafea pea mo te mavae mai ia Sehova. Ohage la, ʼe feala ke faigataʼa hatatou fakatokagaʼi moka tafea mamalie he vaka mai te kauvai. Kaʼe ʼe toe feala foki ki he tagata ke ina toho tana vaka ke mamaʼo mai te kauvai. ʼE ha ʼi te ʼu faʼifaʼitaki ʼaia te meʼa ʼae ʼe feala ke hoko moka tuku e he tahi ke kakā ʼi ia ia pea mo fakavaivaiʼi tana falala ki te moʼoni.

12. Kotea ʼae ʼe lava fakatupu kovi ki tatatou fakakaumeʼa ʼae mo Sehova?

¹² Neʼe lagi tuku e ʼihi kau Tesalonika ke kakā ʼi natou. ʼE feala koa ke hoko te aluʼaga ʼaia ia ʼaho nei? ʼE lahi te ʼu faʼahi ʼe feala ke puli ai totatou temi. Kotou fakafuafua muʼa te temi ʼae ʼe kotou fakaʼaogaʼi ki te ʼu fakafiafia, te ʼu felogoʼi ʼi te neti, te lau ʼo takotou meli mo faitohi ʼi te neti peʼe ko te vakaʼi te ʼu logo ʼo te ʼu faigaoʼi. Pea ʼaki pe he faʼahi ʼe tahi ʼi te ʼu faʼahi ʼaia, ʼe feala ke vaivai ai te faʼafai ʼa he Kilisitiano ʼi tana tauhi kia Sehova. Kotea ʼae ʼe feala ke iku ki ai? ʼE lagi mole kei fakamalotoloto anai ʼana faikole. ʼE lagi mole kei lahi anai mo te temi ʼae ʼe ina fakaʼaogaʼi ki te ako ʼo te Tohi-Tapu, mo tana kau ki te ʼu fono pea mo te faifakamafola. Kaʼe kotea ʼae ʼe tou lava fai ke mole hehe fakavilivili ai tatatou fakakaukau?

HE PUIPUI KE MOLE TOU HEHE AI

13. Ohage ko tona fakakikite ʼi te Tohi-Tapu, ʼe feafeaʼi te aga ʼa te hahaʼi, pea ʼe tou lava puipui feafeaʼi tatatou tui?

¹³ ʼE tonu ke tou manatuʼi kua ponoi mai pe te fakaʼosi ʼo te malama ʼa Satana. Pea ʼe feala ke fakatupu kovi kia tatou ia tatatou fakatahi mo natou ʼae ʼe fakafisi ki te ui ʼae ʼe tou maʼuʼuli nei ʼi “te u aho fakamuli.” Neʼe tohi fenei e te apositolo ko Petelo ʼo ʼuhiga mo totatou temi: “E omai anai ni kau nukinuki, ae e haele anai o mulimuli ki onatou holi kovi totonu. E natou ui: Kofea te fakapapau o tana toe liliu mai? Koteuhi, koeni kua mamate foki atatou tamai, kae e tuu aipe te u mea fuli o hage i te kamataaga o te fakatupu o te malamanei.” (2 Pet. 3:3, 4) Ko tatatou lau ʼi te ʼaho fuli mo ako tuʼumaʼu ia te Tohi-Tapu, ʼe tokoni mai anai ke tou manatuʼi ʼe tou maʼuʼuli nei ʼi “te u aho fakamuli.” Ko te aposetasia ʼae neʼe fakakikite ʼi te Tohi-Tapu, neʼe kamata talu mai fualoa ʼo kaku mai ki te temi nei. Pea ko te tagata ʼae ʼe manuki ki te lao ʼe kei fakafeagai pe ia ki te ʼu kaugana ʼa te ʼAtua. Ko te ʼu tupuʼaga la ʼaia ʼae ʼe mole tonu ai ke galo kia tatou ia te kua ponoi mai ʼo te ʼaho ʼo Sehova.—Sofo. 1:7.

14. Moka tou maʼumaʼua ʼi te tauhi ki te ʼAtua, ʼe puipui feafeaʼi ai tatou?

¹⁴ Ko tatatou kau tuʼumaʼu ki te faifakamafola ʼe toe lava tokoni mai ke mole hehe fakavilivili ai tatatou fakakaukau. Neʼe foaki e Kilisito Sesu te ʼu tokoni ʼaeni moʼo puipui ʼana tisipulo: neʼe ina fakatotonu age ke natou fai ni tisipulo ʼi te ʼu puleʼaga fuli pea mo akoʼi kia natou te maʼuliʼi ʼo te ʼu meʼa ʼae neʼe ina akoʼi age. (Mat. 28:19, 20) Pea ke tou mulimuli ki te fakatotonu ʼaia, ʼe ʼaoga ke tou faʼafai ʼi te gaue faifakamafola. Tou manatuʼi te ʼu tehina ʼo Tesalonika. Neʼe natou faifakamafola pe koa pea mo faiakonaki he neʼe ko tonatou maʼua? Neʼe tohi fenei e Paulo kia natou: “Aua naa koutou tamatei te Laumalie. Aua naa koutou fakanoai te u folafola fakapolofeta.” (1 Tes. 5:19, 20) ʼE fakaofoofo te ʼu lea fakapolofeta ʼae ʼe tou ako pea mo tala ki te hahaʼi!

15. Kotea he ʼu faʼahi ʼe feala ke tou vakaʼi lolotoga tatatou ako fakafamili?

¹⁵ ʼE tou fia tokoni fuli ki ʼotatou famili ke natou hikihiki ia tanatou faifakamafola. Moʼo fakahoko te faʼahi ʼaia, tokolahi te ʼu tehina mo tuagaʼane ʼe natou fakaʼaoga he koga ʼo tanatou ako fakafamili ki te akoako ki te minisitelio. ʼE lagi feala hakotou teuteuʼi ʼakotou ʼaʼahi. Kotea ʼae ʼe tonu ke kotou faipalalau ai ki ai? Kotea he ʼu faʼahi ʼe kotou lava palalau anai ki ai ke fia iloʼi ai e ʼakotou ʼaʼahi he tahi ʼu manatu? Ko te temi fea ʼae ʼe lelei age ke kotou toe olo ai ʼo ʼaʼahi natou? Pea tokolahi natou ʼae ʼe natou toe fakaʼaoga he koga ʼo tanatou ako fakafamili moʼo teuteuʼi te ʼu fono. ʼE feala koa ke toe fai feia mo tokotou famili? Kapau ʼe kotou fai ʼakotou tali ʼi te ʼu fono, ʼe malohi ai anai takotou tui pea ʼe mole hehe fakavilivili anai ia takotou fakakaukau. (Pes. 35:18) Ko te ako fakafamili ʼe ina puipui tatou mai te ʼu faipalalau ʼo ʼuhiga mo he ʼu meʼa ʼe mole fakamahino ʼi te Tohi-Tapu pea ke mole tou lotolotolua ai.

16. Kotea ʼae ʼe ina uga te kau Kilisitiano fakanofo ke mole hehe fakavilivili ai tanatou fakakaukau?

¹⁶ Ko Sehova neʼe ina tapuakina tana hahaʼi lolotoga te ʼu taʼu, ʼaki tanatou mahino lelei age ki te ʼu lea fakapolofeta Fakatohi-tapu. ʼE tou tui papau ai ʼe tou maʼu anai he fakapale taulekaleka ʼi te ka haʼu. ʼE fakaʼamu te kau fakanofo ke natou kauga hau mo Kilisito ʼi selo. Pea ʼe mahino ia ʼaki tanatou ʼamanaki ʼaia ʼe uga ai natou ke mole hehe fakavilivili tanatou fakakaukau! Ko te faʼahi ʼaeni neʼe tohi e Paulo ki te kau Tesalonika ʼe fakaʼuhiga ki te kau fakanofo ia ʼaho nei: “Kia matou, u tehina ofaina i te Aliki, e tonu ke matou fakafetai tuumau ki te Atua o uhiga mo koutou, koteuhi nee filifili koutou e te Atua . . . , aki te fakamaa a te Laumalie pea mo te tui ki te mooni.”—2 Tes. 2:13.

17. ʼE fakalotomalohiʼi feafeaʼi koutou ʼaki te ʼu palalau ʼae ia 2 Tesalonika 3:1-5?

¹⁷ Pea ohage pe ko te kau fakanofo, ko natou ʼae ʼe ʼamanaki ke natou maʼuʼuli ʼo heʼe gata ʼi te kele, ʼe tonu ke natou faiga malohi ke mole hehe fakavilivili tanatou fakakaukau. Kapau ʼe kotou ʼamanaki maʼuʼuli ʼo talu ai ʼi te kele, pea kotou fakalogo tuʼumaʼu ki te fakalotomalohi ʼofa neʼe fai e Paulo ki ʼona tehina fakanofo ʼi Tesalonika. (Lau ia 2 Tesalonika 3:1-5.) Tou lotofakafetaʼi ʼo ʼuhiga mo te ʼu palalau ʼofa ʼaia. Ko te ʼu tohi ʼae neʼe fai ki te kau Tesalonika ʼe ina fakatokaga tatou naʼa tou palalau ʼo ʼuhiga mo he ʼu meʼa ʼe mole fakamahino ʼi te Tohi-Tapu pea naʼa tou tui ki ni manatu ʼe mole hona fakatafitoʼaga. Koia ʼuhi ko tatatou kua ovi ʼae ki te fakaʼosi, ʼe tou lotofakafetaʼi lahi ai ʼo ʼuhiga mo te ʼu fakatokaga ʼaia.