He ko ʼe ʼe tuku e te ʼAtua ia te tagata malohi ke ina gaohi koviʼi ia ia ʼae ʼe vaivai?

ʼE ʼi ai te ʼu fakamatala ʼi te Tohi-Tapu ʼo ʼuhiga mo te ʼu hahaʼi vaivavai neʼe gaohi koviʼi e natou ʼae ʼe malolohi. Ohage la, ko te aluʼaga neʼe hoko kia Napote, ʼi te ʼu taʼu 900 I.M.T.S.a Neʼe fakagafua e te hau ko Akapo ke matehi e tona ʼohoana ko Sesapele ia Napote pea mo ʼona foha ke feala ke maʼu e te hau ia tonatou kele. (1 Hau 21:1-16; 2 Hau 9:26) He ko ʼe neʼe tuku e te ʼAtua ke hoko ia te aluʼaga kovi ʼaia?

Talu mai te kamata, neʼe fakatokaga e te ʼAtua, ko te agatuʼu ʼae kia te ia, ʼe iku anai ki te mate. Pea ʼe mole feala ki te ʼAtua ke loi. (Tito 1:2) Ohage pe ko tona ui e te ʼAtua, neʼe tau ia te tagata mo te mate talu mai te agatuʼu ʼae neʼe hoko ʼi te ʼoloto ʼo Eteni. Ko te ʼuluaki tagata ʼae neʼe mate, neʼe mate ʼuhi ko te agakovi, neʼe ko Apele ʼae neʼe matehi e tona tehina ko Kaino.—Senesi 2:16, 17; 4:8.

ʼE ui fenei ʼi te Tohi-Tapu ʼo ʼuhiga mo te aluʼaga ʼo te tagata talu mai te kamata: “E pule ai te tagata ki te tagata ke fakamamahii ia ia.” (Ekelesiasi 8:9) Neʼe moʼoni koa te ʼu palalau ʼaia? Neʼe fakatokaga e Sehova ki tana hahaʼi, ia te kau Iselaele, ʼe agakovi anai ʼonatou hau, ʼo tupu ai tanatou kalaga ki te ʼAtua. (1 Samuele 8:11-18) Maʼia mo te Hau poto ko Salomone, neʼe ina fakatotogi ki tana hahaʼi te ʼu tukuhau mamafa. (1 Hau 11:43; 12:3, 4) Neʼe ʼi ai te ʼu hau neʼe agakovi age, ohage ko Akapo. Kapau la neʼe taʼofi e te ʼAtua ke ʼaua naʼa hoko te ʼu faʼahiga takitaki agakovi ʼaia, ʼe mole moʼoni leva ʼana palalau.

Ko te tahi faʼahi ke kotou manatuʼi, neʼe ui e Satana, ʼe tauhi pe te hahaʼi ki te ʼAtua ʼuhi ko te ʼu lelei ʼe feala ke natou maʼu mai ia te ia. (Sopo 1:9, 10; 2:4) Kapau la neʼe puipui e te ʼAtua ʼana kaugana mai te ʼu agakovi, ʼe mole koa la ko he fakamoʼoni ʼaia ki te ʼu palalau ʼa Satana? Kapau la neʼe taʼofi e te ʼAtua ke ʼaua naʼa hoko he agakovi kia tatou fuli, ʼe feala ke manatu ia te tokolahi ʼe lava takitaki pe e te tagata ia ia totonu. Kaʼe ko te tahi ʼaia loi. ʼE mole ko te manatu ʼaia ʼi te Tohi-Tapu. ʼE mole feala ki te tagata ke ina takitaki ia ia totonu. (Selemia 10:23) ʼE ko te Puleʼaga pe ʼo te ʼAtua ʼae ka ina fakagata te heʼe faitotonu.

Ko tona fakaʼuhiga koa ʼe mole fai e te ʼAtua he meʼa ʼo ʼuhiga mo te agakovi? Kailoa. Tou vakaʼi ia faʼahi ʼe lua. ʼUluaki, ʼe ina fakamahino lelei ia te tupuʼaga ʼo te agakovi. Ohage la, ʼe fakamatalatala lelei ʼi te Tohi-Tapu ia te fakatuʼutuʼu kakā ʼa Sesapele ʼo ʼuhiga mo Napote. Pea ʼe fakaha fakahagatonu ʼi te Tohi-Tapu, ʼe ko te takitaki malohi fakapulipuli ʼae ʼe ina fakaneke te hahaʼi ke natou fai ia te ʼu agakovi ʼaia. (Soane 14:30; 2 Kolinito 11:14) ʼE ui ʼi te Tohi-Tapu, ko te takitaki ʼaia ko Satana te Tiapolo. ʼAki tana fakaha mai ia te tupuʼaga ʼo te agakovi, ʼe tokoni mai te ʼAtua ke ʼaua naʼa tou agakovi. ʼE ina puipui tatou ke feala hatatou maʼu ia te maʼuli heʼe gata.

Lua, ʼe foaki mai e te ʼAtua ia te ʼamanaki ʼae ʼe gata anai ia te agakovi. ʼAki tana fakamauʼi pea mo tauteaʼi ia Akapo pea mo Sesapele pea mo ʼihi atu, ʼe tou tui papau ai ki tana fakapapau ʼae, ʼe ina tauteaʼi anai ia te kau agakovi fuli. (Pesalemo 52:3-7) ʼE toe foaki e te ʼAtua kia natou ʼae ʼe ʼoʼofa kia te ia, ia te ʼamanaki ʼae ʼe mole natou toe tau anai mo te agakovi.b ʼE sio anai ia te tagata agatonu ko Napote pea mo ʼona foha, ki te temi ʼae ʼe natou maʼuʼuli anai ʼo heʼe gata ʼi he palatiso fakakelekele, ʼe maʼu ai te faitotonu.—Pesalemo 37:34.