ʼE Fakagata Anai e Te ʼAtua Ia Te ʼu Mamahi

ʼE fakaha ʼi te Tohi-Tapu pe ʼe kotea ʼae ka fai anai e Sehova pea mo tona ʼAlo, ia Sesu Kilisito ʼo ʼuhiga mo te ʼu mamahi ʼae neʼe fakatupu e Satana, te Tiapolo. ʼE ui fenei ai: “Nee ha mai te Alo o te Atua, o tupu ke maumaui te u gaue a te tiapolo.” (1 Soane 3:8) ʼE fakaʼauha anai ia te tuʼu ʼaeni kua mafola ai te manumanū koloa, mo te fehiʼa pea mo te ʼu agakovi. Neʼe fakapapauʼi e Sesu, ʼe ina “li anai ki tuʼa” ia Satana te Tiapolo, ia “te pule ʼo te malama ʼaeni.” (Soane 12:31, MN) ʼE pulihi anai ia Satana pea ʼe fakatuʼu anai he malama ʼe faitotonu. ʼE liliu anai ia te kele ko he nofoʼaga ʼe maʼu ai te tokalelei.—2 Petelo 3:13.

Kaʼe ʼe feafeaʼi kia natou ʼae ʼe mole natou fia fetogi tonatou faʼahiga maʼuli, ʼo hoko atu ia tanatou fai ia te ʼu aga ʼae ʼe kovi? Kotou fakakaukauʼi ia te fakapapau ʼaeni: “E nonofo anai te kau agatonu i te fenua, pea e nonofo anai i ai te kau haohaoa, kae e motuhi anai te kau agahala mai te fenua, e taaki anai te kau agakovi mai ai.” (Taaga Lea 2:21, 22) ʼE mole toe maʼu anai ia te ʼu fakaneke ʼa te kau agakovi. Ka mafola anai ia te tokalelei ʼi te kele katoa, ʼe toe liliu mamalie anai ia te tagata ki te maʼuli haohaoa.—Loma 6:17, 18; 8:21.

ʼE pulihi feafeaʼi anai e te ʼAtua ia te agakovi moka fakatuʼu anai ia te malama foʼou? ʼE ina haga tuku anai ki te tagata ia te loto faʼitaliha. Kaʼe ʼe ina akoʼi anai ʼana lao kia natou ʼae ʼe fia fakalogo, ke natou liakī ia te ʼu manatu pea mo te ʼu aga ʼae ʼe kovi.

Kotea ʼae ka fai anai e te ʼAtua moka hoko he ʼu tuʼutamaki fakafokifa? Neʼe ina fakapapauʼi kua vave takitaki pe e tona Puleʼaga ia te kele. Neʼe fakanofo e te ʼAtua ia Sesu Kilisito ko te Hau ʼo te Puleʼaga. ʼE ina maʼu ia te malohi moʼo fakamalolō ia te hahaʼi mahahaki. (Mateo 14:14) ʼE toe maʼu e Sesu ia te malohi moʼo puleʼi ia te natula. (Maleko 4:35-41) ʼE mole toe hoko anai he ʼu mamahi ʼuhi ko “te ʼu temi pea mo te ʼu meʼa fakafokifa.” (Tagata Tanaki 9:11, MN) Ka pule anai ia Kilisito, ʼe mole hoko anai he ʼu malaʼia ki te malamanei.—Taaga Lea 1:33.

Kaʼe ʼe feafeaʼi leva ki te toko lau ʼi miliona hahaʼi ʼae kua mamate? Neʼe ui fenei e Sesu ʼi muʼa ʼo tana fakatuʼuake ia tona kaumeʼa ko Lasalo: “Ko au ko te toe tuuake mo te mauli.” (Soane 11:25) ʼE moʼoni ʼe maʼu e Sesu ia te malohi ʼae moʼo toe fakatuʼuake ia te kau mate ki te maʼuli.

Kapau ʼe ke fia maʼuli ʼi he malama ʼe mole toe hoko anai ia he malaʼia ki te hahaʼi agalelei, faigaʼi ke ke ako ia te Tohi-Tapu ke ke iloʼi lelei ia te ʼAtua moʼoni pea mo tona finegalo. ʼE fiafia anai te kau Fakamoʼoni ʼa Sehova ʼo tou kolo, ʼi tanatou tokoni atu ki te faʼahi ʼaia. Koia ʼe matou fakalotomalohiʼi koe ke ke felogoʼi mo natou peʼe ke faitohi kia natou ʼae neʼe natou ta ia te nusipepa ʼaeni.