“Ko Koutou Ko Aku Tagata Fakamooni”

1, 2. (1) Kotea te fakaʼuhiga ʼo he tahi ʼe fakamoʼoni? Pea kotea ʼae neʼe mole fakaha ʼi te televisio, mo te latio, mo te sulunale pea mo te Neti? (2) He ko ʼe ʼe mole ʼaoga kia Sehova te ʼu faʼahi ʼaia?

ʼE FAKAMAHINO ʼi te tikisionalio, ko he fakamoʼoni ʼe ko he tahi neʼe sio mata ki he aluʼaga neʼe hoko pea ina fakamatala. ʼI Afelika Saute, neʼe ʼi ai te nusipepa neʼe ta lolotoga taʼu ʼe 160 tupu, pea neʼe fakahigoaʼi ko Te Fakamoʼoni (Fakapilitania). Neʼe fakahigoaʼi feia koteʼuhi ʼe ina fakamatala lelei ai te ʼu aluʼaga ʼae neʼe hoko. Neʼe fakapapau e ia ʼae neʼe ina kamata ta te nusipepa ʼaia, ʼe fakamatala pe anai ʼi ai ia te moʼoni ʼo ʼuhiga mo te ʼu aluʼaga ʼae neʼe hoko.

² Kaʼe, ʼe mole fakaha ʼi te televisio, mo te latio, mo te sulunale pea mo te Neti, te moʼoni ʼo ʼuhiga mo te ʼu aluʼaga ʼae neʼe hoko. Neʼe mole natou tala te moʼoni ʼo ʼuhiga mo te ʼAtua pea mo te ʼu meʼa ʼae neʼe ina fai. Kaʼe ʼe mole he ʼaoga ʼo te ʼu faʼahi ʼaia ki te Pule mafimafi ʼo te ʼatulaulau. Neʼe ui fenei e Sehova ʼaki te polofeta ko Esekiele: “E iloi anai e te atu puleaga ko au ko [Sehova].” (Esk. 39:7) Ko te teitei toko valu miliona kau Fakamoʼoni ʼa Sehova, ʼe natou palalau ʼo ʼuhiga mo ia ki te hahaʼi, ʼi te malamanei katoa. ʼE natou fakaha pe kotea ʼae neʼe fai e te ʼAtua maʼa te hahaʼi ʼi te temi muʼa, pea mo ʼae ʼe ina lolotoga fai ʼi te temi nei. ʼE natou fakaha te ʼu gaue taulekaleka ʼae neʼe ina fakapapauʼi ki te ka haʼu. ʼE tou lau fenei ia Esaia 43:10: “Ko koutou ko aku tagata fakamooni, e ui e [Sehova], . . . taku tagata faifekau ae nee au filifili.” Ka tou fakamuʼamuʼa te gaue faifakamafola ʼi totatou maʼuli, ʼe tou fakamoʼoni ai ʼe ko tatou ko te kau Fakamoʼoni ʼa Sehova.

3, 4. (1) Ko ʼafea ʼae neʼe kamata toʼo ai e te Kau Ako ʼo Te Tohi-Tapu ia te higoa ʼae ko te kau Fakamoʼoni ʼa Sehova? Kotea ʼae neʼe natou logoʼi? (Vakaʼi te ʼuluaki pakī.) (2) Kotea te ʼu fehuʼi ʼae ka tou vakaʼi anai?

³ ʼE mole feala anai ʼi he temi ke puli ia te huafa ʼo Sehova, koteʼuhi ʼe ko ia “te Hau ʼo te heʼe gata.” Neʼe ina ui fenei ʼo ʼuhiga mo ia: “Koena toku huafa ki te heegata, koena toku huafa ki te taitupu mo te taitupu.” (1 Tim. 1:17, MN; Eke. 3:15; vakaʼi ia Ekelesiasi 2:16.) ʼE mole he tahi age pilivilesio ʼe lahi age ʼi te fua ʼo te huafa ʼo Sehova. ʼI te taʼu 1931, neʼe fiafia ʼaupito ia te Kau Ako ʼo Te Tohi-Tapu ʼi tanatou kamata toʼo ia te higoa ʼae ko te kau Fakamoʼoni ʼa Sehova. Tokolahi neʼe natou faitohi ki te Kolesi Pule ʼo natou fakaha ai tanatou lotofakafetaʼi ʼo ʼuhiga mo te fetogi ʼaia. Neʼe faitohi ia te kokelekasio ʼo Kanata ʼo natou fakaha ai, ʼaki te higoa foʼou ʼaia, ʼe toe malohi age tanatou fakatotonu ʼae ke natou fakavikiviki kia Sehova ʼi tonatou maʼuli katoa.

⁴ ʼE kotou fakaha feafeaʼi takotou fiameʼameʼa ʼuhi ko te fakahigoaʼi ʼo koutou ko te kau Fakamoʼoni ʼa Sehova? He ko ʼe neʼe fakahigoaʼi tatou e Sehova ʼi te tohi ʼo Esaia, ko tatou ko ʼana Fakamoʼoni?

TE KAU FAKAMOʼONI ʼA TE ʼATUA ʼO TE TEMI MUʼA

5, 6. (1) Neʼe fakamoʼoni feafeaʼi ia te ʼu matuʼā Iselaele ʼo ʼuhiga mo Sehova? (2) Kotea te tahi gaue neʼe tonu ke fai e te ʼu matuʼā, pea he ko ʼe ʼe tonu ke fai feia mo te ʼu matuʼā ʼi te temi nei?

⁵ Neʼe fili e Sehova ia te kau Iselaele ke natou liliu ko ʼana fakamoʼoni. Neʼe ko te maʼua ʼaia ʼa te Iselaele takitahi ke fakamoʼoni ʼo ʼuhiga mo ia. (Esa. 43:10) Ohage la, neʼe fakamoʼoni te ʼu matuʼā ʼo ʼuhiga mo te ʼAtua, ʼaki tanatou akoʼi ki ʼanatou fanau te ʼu gaue ʼae neʼe ina fai ʼi te temi muʼa. Neʼe fakatotonu e Sehova ki te ʼu matuʼā ke natou akoʼi ki ʼanatou fanau ia te Pasikate. Neʼe ina ui fenei age kia natou: “Pea kapau e fehui atu anai akotou fanau kia koutou: Kotea te uhiga o te tauhi aena? E koutou tali anai: Ko te sakilifisio o te Pasikate [maʼa Sehova], ae nee fakalaka i oluga o te u fale o te u fanau a Iselaele i Esipito, i tana taai ia Esipito kae haofaki otatou fale.” (Eke. 12:26, 27) Neʼe fakamatala e te ʼu matuʼā ki ʼanatou fanau ia te mole loto ʼae e Falaone ke mavae te kau Iselaele ʼo olo ʼo tauhi kia Sehova ʼi te toafa. Neʼe ui fenei e Falaone: “Ko ai [ia Sehova] ke au fakalogo ki tona leo, pea ke au tuku ke alu ia Iselaele?” (Eke. 5:2) Neʼe fakamatala e te ʼu matuʼā ki ʼanatou fanau pe neʼe tali feafeaʼi e Sehova ki te fehuʼi ʼa Falaone pea mo tana fakaha ʼae ki te hahaʼi fuli ʼe ko Ia te Mafimafi. Neʼe ina fakato ia te ʼu malaʼia ʼe hogofulu ki Esipito pea mo haofaki te kau Iselaele mai te foʼi kautau Esipito ʼi te Tai Kula. Neʼe iloʼi ai e te kau Iselaele ko Sehova ʼe ko te ʼAtua moʼoni pea ʼe ina fakahoko tuʼumaʼu ʼana fakapapau.

⁶ Neʼe ko he toe pilivilesio ki te kau Iselaele ia tanatou fakamoʼoni ʼae kia Sehova. Neʼe natou fakaha ki ʼanatou fanau pea mo ʼanatou kaugana, te ʼu gaue taulekaleka ʼae neʼe fai e Sehova. Pea neʼe iloʼi e te kau Iselaele, neʼe maʼua ke natou maʼa ʼi te ʼu aluʼaga fuli ʼo tonatou maʼuli. Neʼe ui fenei e Sehova: “Ke kotou maonioni, koteuhi e au maonioni, ia au, ko [Sehova], ko tokotou Atua.” Neʼe tonu ke akoʼi e te ʼu matuʼā Iselaele ʼanatou fanau ke natou maʼoniʼoni, ko tona fakaʼuhiga ʼae ke natou maʼuliʼi te ʼu lekula ʼa Sehova. (Lev. 19:2; Tet. 6:6, 7) Ia ʼaho nei, ʼe tonu ke toe fai feia mo te ʼu matuʼā. ʼE tonu ke natou akoʼi ki ʼanatou fanau te faʼahiga maʼuli ʼae ʼe fakavikiviki ai te huafa lahi ʼo te ʼAtua!—Lau ia Taaga Lea 1:8; Efeso 6:4.

7. (1) Moka fakalogo ia te kau Iselaele kia Sehova, kotea ʼae ʼe iloʼi e te ʼu puleʼaga ʼo ʼonatou tafaʼaki? (2) Kotea te maʼua ʼo natou fuli ʼae ʼe natou fua ia te huafa ʼo Sehova?

⁷ Ka fakalogo te kau Iselaele ki te ʼAtua, pea neʼe ina tapuakiʼi natou. ʼE iloʼi ai e te ʼu puleʼaga ʼo ʼonatou tafaʼaki, ʼe puipui natou e Sehova. (Tet. 28:10) Kaʼe neʼe talagataʼa tuʼumaʼu pe ia te kau Iselaele kia Sehova. Neʼe natou tauhi ki te ʼu fakatata, ia te ʼu ʼatua ʼo te kau Kanaane. Neʼe liliu ai te kau Iselaele ʼo agakovi ohage ko te ʼu ʼatua hala ʼaia. Neʼe natou sakilifisioʼi ʼanatou fanau pea mo gaohi koviʼi te hahaʼi masisiva. ʼE ʼi ai te ako maʼuhiga ʼe feala ke tou maʼu mai tanatou agakovi ʼaia. ʼE tonu ke tou faʼifaʼitakiʼi ia Sehova. Koia ʼe tonu ke tou maʼoniʼoni koteʼuhi ʼe tou fakafofoga ia ia, ʼae ko te Maʼoniʼoni ʼAupito.

‘KOʼENI, ʼE AU FAI HE MEʼA FOʼOU’

8. Kotea ʼae neʼe ui age e Sehova kia Esaia ke ina fai? Pea neʼe tali feafeaʼi e Esaia?

⁸ Neʼe fekauʼi e Sehova ia Esaia, ke ina fakatokaga ki te kau Iselaele ʼe Ina fakaʼauha anai tonatou kolo muʼa ʼae ko Selusalemi, pea mo tuku ke ʼave popula Tana hahaʼi. Pea neʼe toe fakakikite e Sehova ʼe ina fai anai “he mea foou” pea mo fakaʼateaina tana hahaʼi ʼi hona aluʼaga fakaofoofo. (Esa. 43:19) Neʼe kua iloʼi pe e Sehova ʼe talagataʼa pe anai te kau Iselaele. Kaʼe logo la te faʼahi ʼaia, neʼe ina ui age kia Esaia ke ina haga fakaha te ʼu fakatokaga ʼaia ki tana hahaʼi. Mai te kapite tahi ki te kapite ono ʼo te tohi ʼo Esaia, neʼe tohi ai te ʼu fakatokaga ʼo ʼuhiga mo te fakaʼauha ʼo Selusalemi. Kaʼe neʼe fia iloʼi e Esaia peʼe fualoa anai ia te talagataʼa ʼa Iselaele kia Sehova. Pea neʼe tali fenei age e te ʼAtua: “E kaku anai ki te maumaui o te u kolo pea mo tonatou tuku ke lavaki; e kaku ki te aho ae e mole toe mau ai anai he tagata i te u fale, pea e maumaui anai te fenua e te lavaki.”—Lau ia Esaia 6:8-11.

9. (1) Ko te temi fea ʼae neʼe hoko ai te lea fakapolofeta ʼa Esaia ʼo ʼuhiga mo Selusalemi? (2) Ia ʼaho nei, kotea te fakatokaga ʼae ʼe tonu ke tou tokakaga ki ai?

⁹ Lolotoga taʼu ʼe 45, neʼe fakatokaga e Esaia ki te kau Iselaele, kua vave fakaʼauha ia Selusalemi. Neʼe kamata tana gaue fakapolofeta ʼi te taʼu 778 I.M.T.S.,a ʼi te temi Hau ʼo Osiasi. Neʼe hoko atu tana gaue ʼo kaku ki te taʼu 732 I.M.T.S., ʼi te temi hau ʼo Esekiasi. Hili ia, neʼe toe hoko atu ia te fakatokaga e Sehova ia tana hahaʼi ʼo kaku ki te temi ʼae neʼe fakaʼauha ai ia Selusalemi, ʼi te taʼu 607 I.M.T.S. Koia, talu mai fualoa mo te fakatokaga ki te kau Iselaele ia te aluʼaga ʼae ka hoko. ʼO toe feia ia ʼaho nei, ʼe fakaʼaogaʼi e Sehova ia tana hahaʼi, ke natou fakatokaga ki ʼihi te ʼu aluʼaga ʼae ka ʼamanaki hoko. Talu mai fualoa, neʼe fakaha ʼi Te Tule Leʼo, kua vave fakagata ia te pule ʼa Satana ki te kele kaʼe kamata ia te pule ʼa Kilisito.—Apk. 20:1-3, 6.

10, 11. Neʼe fakamoʼoni feafeaʼi ia te kau Iselaele ʼo Papilone ki te fakahoko ʼo te lea fakapolofeta ʼa Esaia?

¹⁰ Neʼe ʼi ai ʼihi Sutea neʼe hao mai te fakaʼauha ʼo Selusalemi. Neʼe natou fakalogo ki te fakatotonu ʼae neʼe fai age e Sehova, ke natou tuku ke puke pea mo ʼave popula natou e te kau Papilone. (Sel. 27:11, 12) Hili ki ai taʼu ʼe 70, neʼe ʼi ai ʼihi ia natou neʼe natou fakamoʼoni ki te tahi lea fakapolofeta ʼa Esaia: “Koeni te folafola a [Sehova], ko tokotou fakamauli, te Sagato o Iselaele: O tupu ko koutou, e au fekaui te fili ki Papilone, ke ina laku ki lalo te u loka fuli.”—Esa. 43:14.

¹¹ Neʼe fakahoko e Sehova ia te lea fakapolofeta ʼaia ʼi hona aluʼaga fakaofoofo. Neʼe fai e te hau ʼo Papilone pea mo tana kau ʼaliki ia te toʼotoʼoga fakalotu ʼi te tahi po ʼo te mahina ʼo Oketopeli ʼo te taʼu 539 I.M.T.S. Neʼe natou fakaʼaogaʼi te ʼu ipu neʼe kaihaʼa mai te fale lotu ʼa Sehova. Kaʼe ʼi te po pe ʼaia, neʼe ʼohofi e te Hau ko Silusi pea mo tana foʼi kautau ia te kolo ko Papilone. Neʼe natou fakato pea mo puleʼi ai te puleʼaga ʼo Papilone. Hili ki ai taʼu ʼe lua, neʼe fakatotonu leva e Silusi ki te kau Iselaele ke natou toe liliu ki Selusalemi pea mo toe laga te fale lotu ʼa te ʼAtua. Pea neʼe puipui natou e Sehova lolotoga tanatou faifolau. Neʼe hoko katoa te ʼu fakakikite ʼae neʼe fai e Esaia. ʼI te sio ʼa te hahaʼi ʼa te ʼAtua ki te kua laga ʼo te fale lotu ʼo Selusalemi, neʼe natou fakamoʼoni ai ʼe ko Sehova te ʼAtua moʼoni pea ʼe ina fakahoko tuʼumaʼu ʼana fakapapau. Neʼe ui fenei e Sehova ʼo ʼuhiga mo te kau Iselaele ʼaia: “Ko te hahai ae nee au fau maa aku, e natou fakaha anai aku fakavikiviki.”—Esa. 43:21; 44:26-28.

12, 13. (1) Ko ai ʼae neʼe fakatahi age ki te kau Iselaele ki te toe laga ʼo te fale lotu? (2) Kotea te pilivilesio ʼae ʼe maʼu e te “hahai kaugamalie” pea kotea ʼae ʼe fakamaʼua kia natou? Kotea ʼae ʼe feala ke natou fakaʼamu ki ai?

¹² ʼI te temi ʼae neʼe liliu ai te kau Iselaele ʼo laga te fale lotu, neʼe ʼi ai te toko lau ʼi afe kau matapule neʼe fakatahi age kia natou ki te tauhi ʼae kia Sehova. Ki muli age, neʼe toe kaugā malie age te kau matapule ʼae neʼe fakatahi age kia natou. (Eseta. 2:58, 64, 65; Esite. 8:17) Ia ʼaho nei, ʼe faʼufaʼu e te kau Kilisitiano fakanofo ia te puleʼaga ʼo te ʼAtua, ʼae ko “te Iselaele a te Atua.” Pea ʼe fakatahi age te “hahai kaugamalie” ʼae ko “ni ihi ovi,” ʼo natou tauhi fakatahi ai kia Sehova. (Kal. 6:16; Apk. 7:9, 10; Soa. 10:16) ʼE maʼu e natou ʼaia ia te pilivilesio ʼae ke natou toʼo ia te higoa ʼae ko te kau Fakamoʼoni ʼa Sehova.

¹³ ʼI te malama foʼou, ʼe maʼu anai e te “hahai kaugamalie” ia te faigamalie ʼae ke natou fakamatala age kia natou ʼae ka fakatuʼuake, pe neʼe feafeaʼi te maʼuli ʼa te kau Fakamoʼoni ʼa Sehova ʼi te ʼu ʼaho fakaʼosi ʼo te malama ʼa Satana. Kaʼe ke feala ke tou maʼu ia te pilivilesio ʼaia, ʼe tonu ke tou nonofo maʼa ʼi te ʼu aluʼaga fuli ʼo totatou maʼuli. Logo la ʼe tou faiga fakamalotoloto ke tou maʼuliʼi te ʼu lekula ʼa Sehova, kaʼe ʼe tou laka hala ʼi te ʼaho fuli. Koia ʼe tonu ai, ʼi te ʼaho fuli, ke tou kole kia Sehova tana fakamolemole. Kapau ʼe tou nonofo maʼa, pea ʼe tou fakaha ai tatatou lotofakafetaʼi ʼuhi ko tana fakafealagia ʼae ke tou fakafofoga ia ia.—Lau ia 1 Soane 1:8, 9.

TE FAKAʼUHIGA ʼO TE HUAFA ʼO TE ʼATUA

14. Kotea te fakaʼuhiga ʼo te huafa ʼo Sehova?

¹⁴ ʼE ko he toe pilivilesio lahi tatatou fua ia te huafa ʼo Sehova. Ke feala hatatou mahino lelei ki te faʼahi ʼaia, ʼe ʼaoga ke tou iloʼi ia te fakaʼuhiga ʼo tona huafa. ʼE haʼu ia te huafa ʼo te ʼAtua mai te kupu Fakahepeleo ʼe fakaʼuhiga ki te kupu “liliu.” Ko te kupu ʼae ko “Sehova” ʼe fakaʼuhiga “ʼE Ina Fakahoko.” ʼE feala ke fakaʼuhiga ki he meʼa ʼe hoko. ʼE loto e Sehova ke tou fakaʼaogaʼi ia tona huafa, koteʼuhi ʼe feala ke tou mahino ai pe ko ai ia ia. Ko Ia ʼae neʼe ina fakatupu ia meʼa fuli. Koia, ka ui e Sehova ʼe ina fai anai he meʼa, ʼe mole feala ki he tahi ke ina taʼofi ia ia, maʼia mo Satana.

15. ʼAki te ʼu palalau ʼae neʼe fai age e Sehova kia Moisese, kotea te ako ʼe tou taʼofi ʼo ʼuhiga mo tona huafa? (Vakaʼi te fakamatala ʼae ʼi te ʼa takai “Ko He Huafa ʼe Maʼuhiga.”)

¹⁵ Neʼe fakamahino lelei e Sehova ia te fakaʼuhiga ʼo tona huafa kia Moisese. Neʼe fekauʼi e Sehova ia Moisese ke alu ʼo fakaʼateaina tana hahaʼi mai Esipito. Pea neʼe ina ui fenei age kia Moisese: “ʼE Au Liliu Anai Ko Ia ʼAe ʼe Au Loto Ki Ai.” Pea neʼe hoko atu fenei e Sehova: “Koʼeni te meʼa ʼae ka ke ui anai ki te kau Iselaele, ‘neʼe fekauʼi mai au e ʼE Au Liliu Anai.ʼ” (Eke. 3:14) Koia, ʼe liliu anai ia Sehova ko meʼa fuli moʼo fakahoko tona finegalo. Maʼa te kau Iselaele, neʼe fai e Sehova ia meʼa fuli ke liliu ai ko he tahi ʼe ina Haofaki, mo ina Puipui, mo ina Takitaki pea mo ina Foaki ia meʼa fuli ʼe ʼaoga kia natou.

TOU LOTOFAKAFETAʼI

16, 17. (1) ʼE tou fakaha feafeaʼi tatatou lotofakafetaʼi ki te pilivilesio ʼae ko te fua ia te huafa ʼo te ʼAtua? (2) Kotea ʼae ka tou vakaʼi anai ʼi te alatike ʼae ka hoa mai?

¹⁶ ʼE mole heʼeki fetogi ia Sehova. ʼE fakamanatuʼi mai e tona huafa, ʼe liliu anai ia Sehova ko meʼa fuli moʼo tokaga ki tana hahaʼi. Ohage la, ʼi te ʼaho fuli, ʼe ina foaki mai ia meʼa fuli ʼe ʼaoga ki totatou maʼuli pea mo taupau tatatou tui ke malohi. Kaʼe ʼe ʼi ai te tahi ako ʼe tou maʼu mai te huafa ʼo Sehova. ʼE feala ke fakaliliu e Sehova ia te ʼu meʼa ʼae neʼe ina fakatupu, ke feala hana fakaʼaogaʼi moʼo fakahoko tona finegalo. Ohage la, ʼe ina fakaʼaogaʼi ʼana kau Fakamoʼoni moʼo fakahoko tana gaue. Ka tou mahino ki te faʼahi ʼaia pea ʼe tou faigaʼi anai ke tou fakafofoga lelei ia Sehova. Neʼe ui fenei e Kåre, ko he Fakamoʼoni ʼa Sehova mai Norvège, kua hili ki ai taʼu ʼe 70 ia tana faʼafai ʼi te minisitelio: “ʼE ko he toe pilivilesio lahi taku tauhi kia Sehova, te Hau ʼo te heʼe gata, pea mo taku kau kia natou ʼae ʼe natou fua tona huafa maʼoniʼoni. ʼE ko he toe pilivilesio takita fakamahino te ʼu moʼoni Fakatohi-tapu pea mo tokagaʼi te fiafia ʼa te hahaʼi moka natou mahino. Ohage la, ʼe au fiafia ʼi taku akoʼi ki ʼihi te ʼu lelei ʼe feala ke tou maʼu mai te sakilifisio faitotogi ʼa Kilisito, pea mo te fealagia ʼae ke natou maʼu ia te maʼuli heʼe gata, ʼi he malama foʼou ʼe maʼu ai te tokalelei pea mo te faitotonu.”

¹⁷ ʼI ʼihi potu ʼo te kele, ʼe mole hahaʼi ia natou ʼae ʼe natou fia ako te moʼoni ʼo ʼuhiga mo Sehova. Kaʼe ohage ko Kåre, ʼe tou fiafia moka tou maʼu he tahi ʼe fia ako ʼo ʼuhiga mo te huafa ʼo Sehova. Kaʼe ʼe tou lava liliu feafeaʼi ko he Fakamoʼoni ʼa Sehova pea mo ʼa Sesu? ʼE tou tali anai ki te fehuʼi ʼaia ʼi te alatike ʼae ka hoa mai.