Te ʼu Tali Ki Te ʼu Fehuʼi Fakatohi-tapu
ʼE feala koa ke tokoni mai te kau ʼaselo kia tatou?
Ohage ko tanatou tokoni ki te kaugana agatonu ʼa te ʼAtua, ko Taniela ʼi te temi muʼa, pea ia ʼaho nei, ʼe toe tokoni ia te kau ʼaselo ki te hahaʼi ke natou iloʼi ia te logo lelei
Neʼe fakatupu e Sehova ʼAtua ia te ʼu ʼaselo ʼe toko lau ʼi miliona ʼi muʼa ʼo tana fakatupu ia te tagata. (Sopo 38:4, 7) Ko te kau ʼaselo ʼaia ʼe ko he ʼu fakatupu fakalaumalie malohi ʼe natou gaue maʼa te ʼAtua, ʼi ʼihi temi, ʼe ina fekauʼi mai natou ke natou ʼomai ʼo takitaki pea mo puipui ʼana kaugana ʼi te kele. (Pesalemo 91:10, 11) Ia ʼaho nei, ʼe tokoni ia te kau ʼaselo ki te hahaʼi ke natou maʼu ia te logo lelei ʼae ʼe fakamafola e te ʼu tisipulo ʼa Sesu.—Lau ia Apokalipisi 14:6, 7.
ʼE tonu koa ke tou faikole ki te kau ʼaselo ke natou tokoni mai? Kailoa. Ko te faikole ʼe ko he faʼahiga tauhi ʼe tou fai ʼateaina pe ki te ʼAtua. (Apokalipisi 19:10) Koteʼuhi ʼae ko te kau ʼaselo ʼe ko te ʼu kaugana ʼa te ʼAtua, ʼe natou mulimuli pe ki te ʼu fakatotonu ʼa te ʼAtua kaʼe mole ki ʼae ʼa te tagata. Ko te tupuʼaga la ʼaia, ʼe tonu ai ke kotou faikole fakahagatonu ki te ʼAtua ʼaki ia Sesu.—Lau ia Pesalemo 103:20, 21; Mateo 26:53.
ʼE ʼi ai koa he kau ʼaselo agakovi?
Ohage ko te tagata, neʼe fakatupu ia te kau ʼaselo mo te fealagia ʼae ke natou filifili pe ʼe natou fai ia te meʼa ʼae ʼe lelei peʼe ko te meʼa ʼae ʼe kovi. Kaʼe meʼa fakaʼofaʼofa, tokolahi te kau ʼaselo neʼe natou fakafeagai ki te ʼAtua. (2 Petelo 2:4) ʼUluaki pe ko Satana, pea mulimuli atu ai ʼihi kau ʼaselo, ʼo natou liliu ai ko te kau temonio. Heʼeki faʼa fualoa, neʼe kapu ifo ia Satana mo tana kau temonio mai te lagi ki te kele.—Lau ia Apokalipisi 12:7-9.
Ko te fakamataku ʼo te agakovi pea mo te agamalohi talu mai te taʼu 1914, ʼe ha ai kua vave fakagata e te ʼAtua ia te ʼu gaue ʼa Satana pea mo tana kau temonio. ʼI te temi ʼaia, ʼe toe fakatuʼu anai e te ʼAtua ʼi te kele ia tana pule.—Lau ia Apokalipisi 12:12; 21:3, 4.