MANATU TAFITŌ | ʼE FEAFEAʼI HAKOTOU FAKAOVI KI TE ʼATUA?
ʼE Kotou Nonofo Ovi Koa Ki Te ʼAtua?
“Ka tou nonofo ovi ki te ʼAtua ʼe tou logoʼi ai te puipui mo te tokalelei. ʼE hage kia tatou ʼe tokaga tuʼumaʼu pe ia ʼAtua ki te lelei ʼo totatou maʼuli.”—CHRISTOPHER, KO HE TUPULAGA MAI GHANA.
“ ʼE sio ia te ʼAtua ki ʼatatou mamahi fuli pea ʼe ina foaki mai ia he tokaga ʼofa.” —HANNAH, ʼE TAʼU 13, ALASKA, AMELIKA.
“Ka kotou nonofo ovi ki te ʼAtua ʼe kotou logoʼi ai ia he toe fiafia.”—GINA, KO HE FAFINE MAI JAMAÏQUE, ʼE TAʼU 40 TUPU.
ʼE mole gata pe kia Christopher, mo Hannah, pea mo Gina, ʼae neʼe natou logoʼi ia te faʼahi ʼaia. Tokolahi ʼi te malamanei katoa ʼe natou tui ʼe natou hage ko he ’u kaumeʼa ʼo te ʼAtua. Kaʼe ʼe feafeaʼi kia koutou? ʼE kotou logoʼi koa ʼe kotou nonofo ovi ki te ʼAtua? ʼE kotou fia fakaovi age koa kia te ia? ʼE lagi kotou feʼekeʼaki fenei: “ ʼE feala moʼoni koa ki te tagata ke ina maʼu he ʼu felogoʼi mo te ʼAtua Mafimafi? Kapau koia, ʼo feafeaʼi?”
ʼE FEALA KE TOU FAKAOVI KI TE ʼATUA
Ohage pe ko tona ui ʼi te Tohi-Tapu, ʼe feala ke tou fakaovi ki te ʼAtua, ke tou maʼu ai he ʼu felogoʼi mo ia. ʼE ui ʼi te Tohi-Tapu, neʼe fakahigoaʼi e te ʼAtua ia te pateliaka Hepeleo ko Apalahamo ko ‘tona kaumeʼa.’ (Esaia 41:8) Kotou tokagaʼi ia te fakaafe ʼae ʼe tuʼu ia Sakopo 4:8: “Kotou fakaoviovi ki te Atua, pea e fakaoviovi atu anai ia kia koutou.” ʼE mahino ia, ʼe feala pe ke tou maʼu he ʼu felogoʼi, peʼe ke tou fakakaumeʼa mo te ʼAtua. Kaʼe ko te ʼAtua ʼe fakapulipuli ia. Koia ʼe tou lava “fakaoviovi” feafeaʼi kia te ia pea mo maʼu he ʼu felogoʼi mo ia?
Moʼo tali ki te fehuʼi ʼaia, tou vakaʼi muʼa pe ʼe tuputupu feafeaʼi ia te ʼu felogoʼi fakakaumeʼa ʼa te tagata. ʼUluaki, ʼe natou fefakahaʼaki ʼonatou higoa. Hili ia pea ʼe natou faipalalau tuʼumaʼu, ʼo natou fakaha ʼanatou manatu pea mo te ʼu faʼahi ʼae ʼe natou logoʼi. ʼAki tanatou fai ia te faʼahi ʼaia, ʼe tuputupu ai pe tanatou felogoʼi fakakaumeʼa. Pea kapau ʼe natou faiga ke natou fetokoniʼaki, ʼe liliu ʼanatou felogoʼi ʼo malohi. ʼO toe feia pe mo ʼatatou felogoʼi ʼae mo te ʼAtua. Tou vakaʼi pe ʼe feafeaʼi te fai ʼo te faʼahi ʼaia.