Neʼe ʼaʼasili kovi age toku maʼuli

TOKU MAʼULI ʼI MUʼA ATU:

Neʼe au lahilahi ake ʼi Los Angeles, Californie, Amelika, ʼi te ʼu kolo kehekehe ʼe iloa ʼuhi ko te ʼu kutuga agamalohi pea mo fakatau ai te toloke. Neʼe au tuʼulaga lua ʼi te fanau neʼe toko 6.

Ko tamatou faʼe neʼe ina akoʼi matou ki he lotu Fakakilisitiano. Kaʼe, ʼi taku kei tupulaga neʼe au fai fakafufu ia te ʼu aga ʼe mole lelei. ʼI te ʼAhotapu, neʼe au hiva ʼi te kauhiva ʼi te ʼekelesia. Kaʼe lolotoga te vahaʼa, neʼe au fakafiafia, mo fakaʼaogaʼi te toloke pea mo fai te ʼu aga heʼe ʼaoga.

Neʼe au hoko ita pea mo agamalohi. Pea ka au fuhu neʼe au fakaʼaogaʼi he meʼa pe ʼe au maʼu ke au malo ai ʼi te fuhu. Neʼe mole tokoni mai ki au te ʼu meʼa ʼae neʼe au ako ʼi te ʼekelesia. Neʼe au ui tuʼumaʼu fenei: “ʼE ʼa te ʼAliki te lagavaka pea ʼe ina fakaʼaogaʼi au.” Pea ʼi taku ʼi te lise, ʼi te fakaʼosi ʼo te ʼu taʼu 1960, neʼe au fia kau ki te kutuga fakapolitike ko te Black Panthers, neʼe iloa ʼuhi ko tanatou tauʼi te ʼu meʼa ʼae ʼe tonu ke maʼu tatau e te hahaʼi. Pea neʼe au kau ki te kutuga ʼaia. Neʼe tuʼa lahi tamatou fakatuʼutuʼu ke fai he ʼu laka ʼo tupu ai te pupunu fakatemi ʼo te lise.

Kaʼe neʼe mole feala ki te ʼu laka ʼaia ke ina taʼofi taku agamalohi. Koia, neʼe au kau ai ki te ʼu aga ʼe kovi ʼuhi ko te fehiʼa ʼae neʼe au maʼu. Ohage la, ʼi ʼihi ʼaho neʼe au alu ai mo ʼoku kaumeʼa ʼo sioʼi he ʼu ʼata ʼo ʼuhiga mo te maʼuli popula ʼa te hahaʼi ʼo te fenua ʼo Afelika ʼi Amelika. ʼUhi ko te aga ʼaia ʼe mole faitotonu, neʼe matou ta ai te ʼu tupulaga papalagi ʼae neʼe nonofo ʼi te senima. Pea neʼe matou olo ki te ʼu kolo ʼe maʼuʼuli ai te kau papalagi ʼo ta ai ʼihi hahaʼi.

Neʼe heʼeki au taʼu ʼuafulu kaʼe neʼe kua ʼaʼasili kovi age taku fai te ʼu aga ʼe kovi. ʼO toe feia pe mo ʼoku tehina. Neʼe matou fihifihia ai mo te kau polisi. Ko he tahi ʼo ʼoku tehina neʼe kau ki he kutuga agamalohi iloa pea neʼe au kau ki te kutuga ʼaia. Neʼe ʼaʼasili kovi age toku maʼuli.

TE FETOGI ʼO TOKU MAʼULI E TE TOHI-TAPU:

Ko te ʼu matuʼā ʼo toku kaumeʼa neʼe ko te ʼu Fakamoʼoni ʼa Sehova. Neʼe nā fakaafe au ki ʼanatou fono pea neʼe au alu ki ai. Neʼe au sio atu aipe ki te kehekehe moʼoni ʼo te kau Fakamoʼoni ʼa Sehova. Neʼe natou takitahi fuli te Tohi-Tapu pea neʼe natou fakaʼaogaʼi lolotoga te fono. Maʼia mo te kau tupulaga neʼe natou fai ʼanatou kiʼi akonaki. Neʼe malave ʼosi ki au taku iloʼi ʼae ko te ʼAtua ʼe ʼi ai tona huafa ko Sehova pea mo logo ki te hahaʼi ʼe natou fakaʼaogaʼi. (Pesalemo 83:19) Pea ko te kokelekasio ʼe faʼufaʼu e te hahaʼi mai te lanu kehekehe pea ʼe mole maʼu ai he fakapalatahi.

ʼI te kamata, neʼe mole au fia akoʼi te Tohi-Tapu mo te kau Fakamoʼoni ʼa Sehova kaʼe neʼe au leleiʼia ʼanatou fono. Pea ʼi te tahi afiafi neʼe au kau ʼi tanatou fono, ko ʼihi ʼo ʼoku kaumeʼa neʼe olo ki te fakahaoga maholo. ʼI te fakatahi ʼaia, neʼe natou ta ai te kiʼi tama ʼo mate he neʼe mole ina foaki age tona foʼi kote. ʼI te ala uhu ake, neʼe natou fiafia ʼi te fakamatala ʼo te fakapo ʼae neʼe natou fai. Lolotoga tonatou fakamauʼi, neʼe natou fakakataʼi ia te ʼu meʼa ʼae neʼe natou fai. Ko ʼihi ia natou ʼaia neʼe pilisoniʼi ʼo kaku ki tonatou mamate. Neʼe au fiafia ʼi taku mole alu mo natou ʼi te afiafi ʼaia. Koia, neʼe au fakatotonu ai leva ke au fetogi toku maʼuli ʼo ako te Tohi-Tapu.

Neʼe au maʼuli fakatahi mo he ʼu hahaʼi fakapalatahi kaʼe neʼe mole au sio ki te faʼahi ʼaia ʼi te kau Fakamoʼoni ʼa Sehova. Ohage la, ʼi te tahi ʼaho ko te Fakamoʼoni ʼa Sehova papalagi neʼe alu ki te tahi fenua pea neʼe ina tuku ʼana tamaliki ke taupau e te famili ʼuli. ʼO toe feia pe, ko te kiʼi famili papalagi neʼe natou fakaʼapi te kiʼi tama ʼuli he neʼe mole hona nofoʼaga. Ko te ʼu faʼahi fuli ʼaia, neʼe au fakatui ai ʼe maʼuliʼi e te kau Fakamoʼoni ʼa Sehova ia te ʼu palalau ʼaeni neʼe fai e Sesu ia Soane 13:35: “I te mea aia e iloi anai e te tagata fuli, ko koutou ko aku tisipulo, mo kapau e koutou mau te feofaaki ia koutou.” Neʼe au iloʼi kua au maʼu hoku famili fale tau tehina moʼoni.

ʼI taku ako te Tohi-Tapu, neʼe au mahino ai ʼe tonu ke fetogi taku faʼahiga manatu. Neʼe tonu ke au fakafoʼou taku fakakaukau ke au fai ia meʼa fuli ʼi te tokalelei. Pea ke au toe tokagaʼi ko te faʼahiga maʼuli ʼaia ʼe lelei tokotahi. (Loma 12:2) ʼAki te temi, neʼe au fai he ʼu faiga. Pea ʼi te mahina ʼo Sanualio 1974, neʼe au papitema ai.

Logo la kua au ʼosi papitema, kaʼe neʼe tonu ke au hoko atu taku gaueʼi ʼoku vaivaiʼaga. Ohage la, ʼi te tahi ʼaho lolotoga taku faifakamafola ʼi te ʼu ʼapi, neʼe au tuli he tahi neʼe ina kaihaʼa ia te latio ʼo taku motoka. Pea ʼi taku kua vave maʼu ia ia, neʼe ina liakī te latio kaʼe hola. ʼI taku fakamatala ki ʼihi pe neʼe au maʼu feafeaʼi taku latio, neʼe fehuʼi fenei mai e te tagata ʼafeā: “Stephen, kotea ʼe ke fai anai mo ka na pau la neʼe ke maʼu ia ia?” Neʼe au fakakaukauʼi te fehuʼi ʼaia pea neʼe ina ʼekenaki ai au ke au hoko atu ʼaku faiga ke au maʼu te tokalelei.

ʼI te mahina ʼo Oketopeli 1974, neʼe au liliu ʼo pionie katoa pea neʼe au fai hola ʼe 100 ʼi te mahina fuli moʼo akoʼi te Tohi-Tapu. Ki muli age, neʼe au maʼu ia te pilivilesio ʼae ke au gaue ʼi te ʼu pilo lalahi ʼo te kau Fakamoʼoni ʼa Sehova ʼi Brooklyn, New York. ʼI te taʼu 1978, neʼe au toe liliu ki Los Angeles ʼo tokaga ki taku faʼe ʼae neʼe mahaki. ʼOsi ki ai taʼu ʼe lua, neʼe au ʼohoanaʼi leva ia Aarhonda ʼae ʼe au ʼofa mamahi ai. Neʼe ma tokakaga toko lua ki taku faʼe ʼo kaku ki tona mate. Neʼe tokoni lelei mai ia Aarhonda. Ki muli age, neʼe ma kau ki te Ako Tohi-Tapu ʼo Kileate, ko te ako ʼo te kau misionea ʼo te kau Fakamoʼoni ʼa Sehova. Neʼe hinoʼi maua ki Panama pea ʼe kei ma misionea aipe.

Talu mai taku papitema, neʼe au felaveʼi mo te ʼu aluʼaga kehekehe neʼe feala pe ke au toe agamalohi ai. Kaʼe neʼe au ako ke au fakamamaʼo mai ia natou ʼae ʼe fakatupu ke mai peʼe au faiga ke au aga fakatokatoka. Tokolahi te hahaʼi, ʼo kau ai mo toku ʼohoana, neʼe natou fakamalō mai ʼi taku lava tauʼi te ʼu aluʼaga ʼaia. Neʼe mole au ʼamanaki leva ʼe au feia anai kaʼe ʼe au iloʼi neʼe mole au lava fai ʼaki toku malohi. Koia, ʼe au tui ko te ʼu fetogi ʼaia ʼe ina fakamoʼoni ai te malohi ʼo te Tohi-Tapu moʼo fetogi te maʼuli ʼo he tahi.—Hepeleo 4:12.

TE ʼU LELEI NEʼE AU MAʼU AI:

ʼAki te Tohi-Tapu, neʼe ʼi ai te ʼuhiga ʼo toku maʼuli pea neʼe au ako ai ke au maʼu moʼoni te tokalelei. Neʼe mole kei au ta he tahi. Kaʼe kua au tokoni ki te hahaʼi ke natou iloʼi te moʼoni. Neʼe au toe akoʼi ia te Tohi-Tapu ki he tahi ʼae neʼe ko toku fili ʼi te lise. ʼI tana ʼosi papitema, neʼe ma lue fakatahi he koga fale lolotoga he temi. Pea ʼe kei ma kaumeʼa lelei. ʼO kaku mai ki te ʼaho nei, neʼe ko te toko 80 ʼae neʼe ako mo au mo toku ʼohoana neʼe natou liliu ko te ʼu Fakamoʼoni ʼa Sehova.

ʼE au lotofakafetaʼi lahi kia Sehova. ʼUhi ko ia, ʼe kua ʼi ai he ʼuhiga ʼo toku maʼuli pea ʼe au fiafia ʼi te kau ki he famili fale tau tehina moʼoni.