MANATU TAFITO | TE KAU ʼASELO—ʼE NATOU MAʼUʼULI MOʼONI KOA? HE KOʼE ʼE MAʼUHIGA

Te Moʼoni ʼo ʼUhiga Mo Te Kau ʼAselo

ʼE kotou fia iloʼi koa te moʼoni ʼo ʼuhiga mo te kau ʼaselo peʼe ko ai ia natou peʼe neʼe natou tutupu feafeaʼi peʼe kotea ʼae ʼe natou fai? ʼE ko te Folafola pe ʼa te ʼAtua te Tohi-Tapu ʼae ʼe feala ke tou maʼu ai tona tali. (2 Timoteo 3:16) Kotea ʼae ʼe ui ʼi te Tohi-Tapu?

Ko te ʼAtua ʼe ko he Laumalie pea ʼe toe feia pe mo te kau ʼaselo. Koia ʼe mole feala hatatou sisio kia natou he ʼe mole natou maʼu “he kakano pea mo he ʼu hui.” Ko te kau ʼaselo agatonu ʼe maʼuʼuli ʼi selo pea ʼe natou felogoʼi fakahagatonu mo te ʼAtua.—Luka 24:39; Mateo 18:10; Soane 4:24.
ʼI ʼihi temi neʼe kofuʼi e te kau ʼaselo ia he ʼu sinoʼi tagata moʼo fakahoko ia he ʼu gaue neʼe foaki age e te ʼAtua ʼi te kele. Pea ka ʼosi pe tanatou gaue pea ʼe natou toe liliu ko he ʼu ʼaselo.—Tui Fakamaau 6:11-23; 13:15-20.
Logo la ʼe ui ʼi te Tohi-Tapu neʼe sinoʼi tagata he ʼaselo, kaʼe ʼe mole fakakehekeheʼi ia natou, peʼe tagata peʼe fafine. ʼE mole natou ʼohoana pea ʼe mole natou fanaunau. Koia neʼe mole tutupu te kau ʼaselo ohage ko te tagata, ʼae neʼe ko he kiʼi toe pea liliu ʼo lahi. Kaʼe, neʼe fakatupu te kau ʼaselo e Sehova. Koia, ʼe fakahigoaʼi natou ʼi te Tohi-Tapu ko “te u foha o te Atua.”—Sopo 1:6; Pesalemo 148:2, 5.
ʼI te Tohi-Tapu ʼe talanoa ai ki “te ʼu lea ʼa te tagata pea mo te kau ʼaselo”, ʼo ha mai ai ko te kau ʼaselo ʼe ʼi ai tanatou lea pea ʼe natou palalau. Logo la neʼe fakaʼaogaʼi e te ʼAtua ia te kau ʼaselo moʼo felogoʼi mo te tagata, kaʼe ʼe mole ina fakagafua ke tou atolasio pea mo faikole ki te kau ʼaselo.—1 Kolonito 13:1; Fakaha 22:8, 9.
ʼE lauʼi miliate mo miliate te kau ʼaselo, ko tona fakaʼuhiga ʼe natou toko lauʼi miliale.a—Taniela 7:10; Fakaha 5:11.
Ko te kau ʼaselo ʼe natou malolohi pea mo popoto lahi age ʼi te tagata. ʼE feala ke gaholo tanatou feoloʼaki ʼo fakalaka age ʼi te ʼu muʼa sika ʼa te tagata.—Pesalemo 103:20; Taniela 9:20-23.
Logo la te popoto pea mo te malolohi age ʼa te kau ʼaselo ia tatou, kaʼe ʼe ʼi ai ʼonatou tuʼakoi, pea mo te ʼu faʼahi ʼe mole natou iloʼi.—Mateo 24:36; 1 Petelo 1:12.
Neʼe fakatupu te kau ʼaselo mo ʼonatou ʼulugaaga, mo ʼonatou kalitate pea mo te loto faʼitaliha. Pea ohage pe ko te tagata ʼe feala hanatou filifili ke natou fai te meʼa ʼae ʼe lelei peʼe ko te meʼa ʼae ʼe kovi. Kaʼe meʼa fakaʼofaʼofa foki, he neʼe ʼi ai ʼihi kau ʼaselo neʼe natou fakafeagai ki te ʼAtua.—Suta 6.

a Ko te miliate ʼe tahi ʼe ko te 10 000. Pea ko te toko hogofulu afe tuʼa hogofulu afe ʼe ko te toko 100 miliona. Kaʼe ʼi te tohi ʼo Fakaha ʼe talanoa ai ki te ʼu “lauʼi miliate mo miliate” kau ʼaselo. Ko tona fakaʼuhiga ʼe natou toko lauʼi teau miliona, peʼe lagi lauʼi miliale.

Te ʼU Tuʼulaga Kehekehe ʼA Te Kau ʼAselo ʼA Te ʼAtua

Ko Mikaele ʼe ko te alekaselo. ʼE ko ia ʼae ʼe pule ki te kau ʼaselo koteʼuhi ʼe tau ʼoluga ʼi te ʼuhiga pule pea mo te malohi. ʼE fakaha lelei ʼi te Tohi-Tapu ko Mikaele ʼe ko te tahi higoa ʼaia ʼo Sesu Kilisito.—1 Tesalonika 4:16; Suta 9.

Ko te kau selafimi ʼe natou maʼoluga age ʼi te kau ʼaselo ʼae, koteʼuhi ʼe natou maʼu ia he ʼu pilivilesio ʼe lahi pea ʼe natou takatakai te hekaʼaga fakahau ʼo te ʼAtua.—Esaia 6:1-3.

Ko te kau kelupimi ʼe toe maʼoluga tonatou tuʼulaga pea ʼe natou tokakaga tafito ki te ʼu maʼua makehe ʼo ʼuhiga mo te kololia ʼo te ʼAtua Mafimafi. Pea ʼe natou tutuʼu ʼi ʼoluga ʼo te ʼafioʼaga ʼo te ʼAtua.—Senesi 3:24; Esekiele 9:3; 11:22.

Ko te tahi kau lauʼi miliate kau Aselo ave logo ʼe natou fakafofoga ia te Mafimafi ʼi te fakahoko ʼo tona finegalo.b—Hepeleo 1:7, 14.

b Kapau ʼe ke fia maʼu he tahi age ʼu fakamahino ʼo ʼuhiga mo te kau ʼaselo, vakaʼi te kapite 10 ʼo te tohi Koteā ʼAē ʼe Akoʼi Moʼoni Mai ʼi Te Tohi-Tapu? ʼae neʼe ta e te kau Fakamoʼoni ʼa Sehova, ʼo toe feia mo te fakamahino “Ko Ai Te Alekaselo Ko Mikaele?” ʼE toe maʼu ʼi te Neti ʼi te www.jw.org/wls.