1 ʼE Tokoni Atu Ke Ke Tekeʼi Te ʼu Fihifihia

TE INU FAKAVALE ʼO TE KAVA

Ko Delphine, ʼae neʼe tou talanoa ki ai ʼi te alatike ʼae kua ʼosi, neʼe inu kava fakavale ʼuhi ko te lahi fau ʼo tana tuʼania. ʼE mole tapuʼi ʼi te Tohi-Tapu te inu fakapotopoto ʼo te kava kae ʼe ui fenei ai: “Ke aua naa ke kau i te kau inu vino.” (Taaga Lea 23:20) Ko te inu kava fakavale ʼe fakatupu ʼaki he ʼu mahaki, mo he ʼu tokakovi mo ʼihi. Pea ʼi te taʼu fuli, ko te toko lauʼi miliona hahaʼi ʼe natou mamate tautonu ai. Neʼe feala pe ke mole lahi te ʼu fihifihia ʼaia mo ka na pau la neʼe mulimuli te hahaʼi ki te ʼu tokoni fakapotopoto ʼae ʼe ʼi te Tohi-Tapu.

Ko te meʼa ʼaia ʼae neʼe fai e Delphine. ʼE ina ui fenei: “Neʼe hoki au mahino ai, ʼe mole pulihi anai e te kava taku tuʼania. Neʼe au muliʼi te vaega ʼo Filipe 4:6, 7 ʼae ʼe ui ai: “ ʼAua naʼa kotou tuʼania ki he meʼa, kaʼe . . . kotou fakaha ki te ʼAtua ʼakotou kole.” ʼI te po fuli, neʼe hake ia au he ʼu manatu ʼe kovi pea mo taku tuʼania, kae neʼe au faikole mamahi kia Sehova. Neʼe au fakamatala age te ʼu meʼa fuli ʼae neʼe ʼi toku loto, te ita, te ʼu meʼa ʼae neʼe fakatupu mamahi, te mole kei au iloʼi he meʼa ke au fai. Pea neʼe au kole mamahi ke tokoni mai ke au maʼu he ʼu manatu ʼe lelei. ʼI te uhu fuli, neʼe au faigaʼi ke puli ʼaku manatu fuli ʼaia. Neʼe tokoni mai taku faikole tuʼumaʼu ke au haga tokagaʼi te ʼu meʼa ʼae ʼe au maʼu ʼi te ʼu meʼa ʼae neʼe kua puli. Koia, neʼe au fakagata leva taku inu. Neʼe au fia taupau maʼu te tokalelei koteʼuhi neʼe ko te meʼa ʼaia neʼe maʼuhiga ʼaupito kia au.”

TE ʼU AGA HEʼE ʼAOGA

Ko te ʼu aga heʼe ʼaoga ʼe fakatupu lotomamahi. Kae ʼe feala ke tokoni mai te ʼu pelesepeto Fakatohi-tapu ke tou iloʼi tona ʼu tupuʼaga pea ke tou tekeʼi ai te ʼu faigataʼaʼia ʼaia. Ohage la, ko te gaohi fafine peʼe gaohi tagata pea mo te sioʼi ʼo te ʼu pāki mo te ʼu ʼata ʼae ʼe ha ai te ʼu felaveʼi fakasino. Neʼe ui fenei e te tupulaga ko Samuel: “ ʼE faigafua pe te gaohi fafine. Kae, ko ʼihi temi ʼe mole au ʼofa moʼoni ki he taʼahine kae ʼe au iloʼi ʼe manako ia ia au pea ʼe au fakagaogaoʼi pe au mo ia.” Neʼe hoko atu pe te aga ʼaia ʼa Samuel. Kae neʼe mole fua lelei kia ia. Pea ʼi te temi nei kua ina ui: “Neʼe fakatupu tuʼutamaki koteʼuhi neʼe au manatu pe kia au totonu.”

Neʼe lau leva e Samuel ia he alatike neʼe fakahagahaga ki te kau tupulaga ʼi te Neti, ʼi te jw.org. Pea neʼe ina tokagaʼi te vaega ʼo Taaga Lea 20:11, MN ʼae ʼe ui ai: ‘ ʼE ha ʼi te aga ʼa he fanau peʼe maʼa peʼe totonu tona maʼuli.’ Neʼe tokoni feafeaʼi te vaega ʼaia kia Samuel? Neʼe mahino ai ko te gaohi fafine ʼe ko he aga ʼe heʼe maʼa pea ʼe kovi. ʼE ina ui fenei: “Neʼe au iloʼi ai ko he tupulaga ʼe gaohi fafine ʼe feala pe ke liliu ko he tagata ʼohoana ʼe mole nofo agatonu anai. Neʼe au fakakaukauʼi te ʼu meʼa ʼae ka logoʼi anai e te taʼahine ʼae ka au ʼohoanaʼi moka ʼe au gaohi fafine. Neʼe au iloʼi ai ʼe fua kovi anai te aga ʼaia. ʼE moʼoni ʼe faigafua pe te gaohi fafine kae ʼe mole iku anai ki he meʼa ʼe lelei.” Kua fetogi ia Samuel. Ko tana tuku te gaohi fafine neʼe tokoni kia ia ke ina tekeʼi te ʼu aga heʼe ʼaoga.

Ko Antonio, neʼe tuʼutamakiʼia ʼi te faʼahi fakalaumalie koteʼuhi neʼe ina sioʼi tuʼumaʼu te ʼu pāki mo te ʼu ʼata viteo ʼae ʼe ha ai te ʼu felaveʼi fakasino. Logo la, neʼe kua ʼohoana pea neʼe ʼofa moʼoni ki tona ʼohoana kae neʼe ina hoko atu pe tana agamahani ʼaia. Neʼe ina ui neʼe tokoni age te vaega ʼo 1 Petelo 5:8 ʼae ʼe ui ai: “Kotou fakapotopoto pea mo nonofo tokakaga! Ko tokotou fili, te Tevolo, ʼe fealuʼaki ohage ko he laione ʼe gugulu, ʼe ina kumi ke ina kai he tahi.” ʼE ui fenei e Antonio: “ ʼE maʼu ʼi te ʼu faʼahi fuli pe te ʼu pāki heʼe maʼa pea ʼe pipiki maʼu ki te ʼatamai. Neʼe tokoni mai te vaega ʼaeni ke au fakakaukauʼi te haʼuʼaga ʼo te ʼu fakahala. Neʼe tonu ke au foimo manatuʼi ʼe ko te Tevolo te matapuna ʼo te ʼu pāki heʼe maʼa ʼaia. ʼI te temi nei, ʼe au iloʼi ʼe ko Sehova pe ʼae ʼe feala ke tokoni mai ke au ‘fakapotopoto mo nofo tokaga’. ʼO feala ai haku tauʼi te ʼu fakaneke ʼi toku ʼatamai, mo toku loto pea mo toku maʼuli fakataumatuʼa.” Neʼe maʼu e Antonio te tokoni ʼae neʼe ʼaoga ki ai, pea neʼe ina tuku leva te aga heʼe maʼa ʼaia. Koia, ʼi tana fai feia, neʼe ina tekeʼi ai he ʼu faigataʼaʼia ʼe lalahi age.

ʼE mahino ia, ʼe maʼu ʼi te Tohi-Tapu he ʼu tokoni ʼaoga ke tou nonofo mamaʼo ai mai te ʼu fihifihia faigataʼa. ʼE feafeaʼi leva ki te ʼu fihifihia ʼae kua tauaka ia tatou pea ʼe faigataʼa tona taʼaki? Tou vakaʼi peʼe tokoni feafeaʼi mai anai te Folafola ʼa te ʼAtua kia tatou ki te fakatokatoka ʼo te faʼahiga fihifihia ʼaia.