Tona Huafa

Ka ke fia feiloʼiʼaki mo he tahi, ʼe ke fehuʼi muʼa foki tona higoa. Kotea anai te tali ʼa te ʼAtua ki tau fehuʼi ʼaia?

“Ko au Sehova. Ko toku huafa ’aia.”​—Esaia 42:8, MN.

ʼE lagi ko tau hoki logo ʼae ki te higoa ʼaia. Kae ʼe mole tou punamaʼuli ki ai, koteʼuhi ʼe tahitahiga tona fakaʼaogaʼi e te kau faifakaliliu ʼo te Tohi-Tapu. ʼE natou fakaʼaogaʼi pe te higoa fakatuʼulaga “ALIKI.” Kae ʼi te Koga Tohi-Tapu Fakahepeleo mo Fakakeleka ʼe tuʼu tuʼa 7 000 tupu ai te huafa ʼo te ʼAtua. ʼE alu tahi mo te ʼu kosona Fakahepeleo ʼe fa YHWH peʼe JHVH. ʼI te Fakaʼuvea, ʼe tohi fenei: “Sehova.”

ʼE ha te huafa ʼo te ʼAtua ʼi te Koga Tohi-Tapu Fakahepeleo mo ʼihi ʼatu ʼu fakaliliu

ʼE MAʼUHIGA TE HUAFA ʼO TE ʼATUA

ʼE maʼuhiga ki te ʼAtua. Neʼe ko ia totonu pe ʼae neʼe ina filifili tona huafa. Kae neʼe mole ko he tahi kehe. Koia neʼe palalau fenei ai: “Koena toku huafa ki te heegata, koena toku huafa ki te taitupu mo te taitupu.” (Ekesote 3:15) ʼI te Tohi-Tapu, ʼe tuʼa lahi age te ha ʼo te huafa ʼo te ʼAtua ʼi te ʼu higoa fakatuʼulaga Mafimafi, Tamai, ʼAliki, mo ʼAtua mo te ʼu higoa ʼo Apalahamo, Moisese, Tavite pea mo Sesu. Pea ko te faʼahi ʼae ʼe maʼuhiga, ʼe loto te ʼAtua ke iloʼi tona huafa. ʼE tohi fenei ʼi te Tohi-Tapu: “Ke iloʼi e te hahaʼi ia koe, ʼae ko tou huafa ko Sehova, ko koe tokotahi pe, te Maʼoluga ʼAupito ʼi te kele katoa.”​—Pesalemo 83:18, MN.

ʼE maʼuhiga kia Sesu. ʼI te faikole ʼae neʼe fakahigoaʼi ko te Tamai ʼe ʼi Selo, neʼe ʼekenaki ai e Sesu ʼana tisipulo ke natou faikole fenei ki te ʼAtua: “Ke tapuha tou huafa.” (Mateo 6:9) Pea neʼe toe faikole fenei ia Sesu: “Tamai, fakakololiaʼi tou huafa.” (Soane 12:28) Neʼe takimuʼa ki tona maʼuli te fakakololiaʼi ʼo te huafa ʼo te ʼAtua. Koia ʼae neʼe ina ui fenei ai ʼi te faikole: “Neʼe au fakaha age tou huafa pea ʼe au haga fakaha anai.”​—Soane 17:26.

ʼE maʼuhiga kia natou ʼae ʼe natou iloʼi te ʼAtua. Neʼe mahino te ʼu kaugana ʼo te temi muʼa neʼe puipui mo haofaki natou ʼuhi ko te huafa ʼo te ʼAtua. “Ko te huafa ’o Sehova ’e ko he tule malohi. ’E lele ki ai te tagata agatonu pea ’e nofo puipui ai.” (Taʼaga Lea 18:10, MN) “Ko ʼae ’e fetapa ki te huafa ’o Sehova ’e hao anai ia.” (Soele 2:32, MN) ʼE ui ʼi te Tohi-Tapu ʼe iloga kehe anai te ʼu tisipulo ʼa te ʼAtua ʼuhi ko tona huafa. “Ko te haha’i fuli ’e natou tahi haʼele anai ’i te huafa ʼo tona ʼatua, kae kia tatou, ʼe tou haʼele anai ʼi te huafa ʼo Sehova totatou ʼAtua ’o talu ai.”​—Mikea 4:5, MN; Gaue 15:14.

TE FAKAʼUHIGA ʼO TE HUAFA

Te huafa ʼae ʼe fakaʼuhiga pe ki te ʼAtua. Neʼe sivi e te kau poto te fakaʼuhiga ʼo te huafa ʼo Sehova ʼae ko: “ ʼE Ina Fakahoko.” Neʼe fakaha e Sehova ʼAtua te fakaʼuhiga ʼo tona huafa ʼi tana palalau ʼaeni kia Moisese: “ ’E Au Liliu Anai Ko Ia ʼAe ’e Au Loto Ki Ai.” (Ekesote 3:14, MN) ʼE moʼoni ko Sehova te Tupuʼaga ʼo meʼa fuli, kae ʼe mole gata ai. ʼE pipiki te fakaʼuhiga ʼo tona huafa ki tana faʼahiga fakaʼaogaʼi ʼona fealagia mo tana fakatupu moʼo fakahoko tona finegalo. Koia ʼe fakaha pe e te ʼu higoa fakatuʼulaga ʼae ʼo te ʼAtua tona mafimafi mo tona ʼuhiga pule. Kae ʼe fakaha e tona huafa ʼae ko Sehova tona ʼuluagaaga mo ʼona fealagia ʼae ke ina fakaliliu ia te ia ko meʼa fuli.

ʼE ha ai ʼe tokaga mai ia te ʼAtua kia tatou. ʼE agatonu te ʼAtua ki ʼana fakatupu, ʼae ʼe kau ai te tagata. Pea ʼe ina loto ke tou iloʼi ia ia, koia ʼae neʼe ina fakaha mai ai tona huafa. Neʼe mole ʼaoga pe la ke tou fehuʼi age. ʼE ha mai ai, ʼe fakaʼamu e te ʼAtua ke tou fakaovi kia te ia, koteʼuhi ʼe moʼoni. ʼE mole ko he ʼAtua ia ʼe mamaʼo fau mai ia tatou.​—Pesalemo 73:28.

Ka tou fakaʼaogaʼi te huafa ʼo te ʼAtua ʼe tou fakaha ai ʼe tou tokakaga kia te ia. Tou toʼo te faʼifaʼitaki ʼaeni: ʼE ke kole ki he tahi ʼe ke fia kaumeʼa mo ia, ke ina toʼo atu tou higoa. Kae ʼe mole ina fia fakaʼaogaʼi pe la tou higoa. Kotea anai ka ke logoʼi? ʼAki te alu ʼo te temi ʼe ke manatu anai neʼe mole lagi fia kaumeʼa te kilisitiano ʼaia mo koe. ʼE tatau pe mo te ʼAtua. Neʼe fakaha e Sehova tona huafa ki te tagata pea ʼe ina ʼekenaki tatou ke tou fakaʼaogaʼi tona huafa. Ka tou fai te faʼahi ʼaia, ʼe tou fakaha ai ʼe tou fia fakaovi kia te ia. Pea ʼe sio ia te ʼAtua kia “natou ʼae ʼe natou manatuʼi tona huafa.”​—Malakia 3:16, MN.

ʼE tonu ke tou ʼuluaki mahino ki te huafa ʼo te ʼAtua ke tou kamata iloʼi ia te ia. Kae ʼe toe ʼaoga foki ke tou mahino ki tona ʼuluagaaga.