ʼE Feafeaʼi Hau Maʼu Ia He Maʼuli ʼE Taulekaleka?

ʼE MOLE ko te maʼuli ʼae ʼe tou lolotoga ai ʼae neʼe fakaʼamu e te ʼAtua kia tatou. Neʼe tonu ke fonu ia te kele ʼi te ʼu hahaʼi ʼe natou fakalogo ʼateaina pe ki te Tupuʼaga mo natou faʼifaʼitakiʼi tona ʼofa mo ʼona kalitate. Neʼe loto e te ʼAtua ke fiafia mo faifaitahi te ʼu famili, pea ke natou fakaliliu ia te kele ko he palatiso.

ʼE HOKO ANAI TE ʼU FAKATUʼUTUʼU ʼA TE ʼATUA ʼO ʼUHIGA MO TE KELE

• ʼE ‘ina fakagata te ʼu tau ʼo kaku ki te ʼu potu taupotu ʼo te kele.’ —Pesalemo 46:9, MN.

• Kua hoko mai “te temi ʼae kua fakatuʼu- tuʼu ke . . . maumauʼi ia natou ʼae ʼe natou maumauʼi te kele.” —Fakaha 11:18.

• “E mole ui e he tahi: E au mahaki!” —Esaia 33:24.

• “E fiafia anai aku kau filifiliia i te gaueaga o onatou nima.” —Esaia 65:22.

ʼE hoko feafeaʼi anai te ʼu lea fakapolofeta ʼaia? Neʼe fakanofo hau e te ʼAtua ia tona ʼAlo ko Sesu. ʼE pule anai ia Sesu mai te lagi ki te kele. ʼI te Tohi-Tapu ʼe higoa te pule ʼaia ko te Puleʼaga ʼo te ʼAtua. (Taniela 2:44) ʼE ui fenei ʼi te Tohi-Tapu ʼo ʼuhiga mo Sesu: ʼE foaki age anai e te ʼAtua “te hekaʼaga fakahau . . . , pea ʼe hau anai ia.”—Luka 1:32, 33.

ʼI te kei nofo ʼa Sesu ʼi te kele, neʼe ina fakahoko ai te ʼu milakulo. ʼE tou iloʼi ai ʼe lelei age anai totatou maʼuli moka pule ia Sesu ki te kele.

NEʼE FAKAHA E SESU TE ʼU LELEI ʼAE KA INA FOAKI KI TE HAHAʼI FAKALOGO

• Neʼe ina faitoʼo te ʼu mahaki kehekehe. Ko tona ʼuhiga ʼe ina pulihi anai te ʼu mahaki fuli.—Mateo 9:35.

• Neʼe ina fakagona te tai. ʼE ina lava puipui anai te hahaʼi mai te ʼu malohi ʼo te natula.—Maleko 4:36-39.

• Neʼe ina fafaga te toko lauʼi afe. ʼE ina foaki anai ia meʼa fuli ʼe ʼaoga ki te hahaʼi.—Maleko 6:41-44.

• ʼI te faiʼohoana, neʼe ina fakaliliu te vai ʼo vino. ʼE faiga anai ke fiafia te hahaʼi. —Soane 2:7-11.

Kotea ʼae ʼe tonu ke ke fai ke ke toe maʼu mo koe ia te maʼuli ʼae ʼe teuteuʼi e te ʼAtua kia natou ʼae ʼe ʼoʼofa ia te ia? ʼE ʼi ai te “ala” ʼe tonu ke ke haʼele ai. ʼE ui ʼi te Tohi-Tapu ʼe ko “te ala ʼae ʼe ina taki ki te maʼuli, pea ʼe tokosiʼi ia natou ʼae ʼe natou maʼu.”—Mateo 7:14.

TE ALA KI TE MAʼULI TAULEKALEKA

Kotea ia te ala ʼae ʼe taki ki te maʼuli? ʼE ui e te ʼAtua: ‘Ko au, Sehova, tou Atua, e au ako ia koe ke ke manuia, e au taki ia koe i te ala ae e tonu ke ke mulimuli ai.’ (Esaia 48:17) ʼE ko te ala pe ʼaia ʼae ʼe taki ki te maʼuli fiafia.

Neʼe ui fenei e Sesu: “Ko au te ala, mo te moʼoni pea mo te maʼuli.” (Soane 14:6) Kapau ʼe tou mulimuli ki te ʼu ako ʼae neʼe tuku mai e Sesu mo tou faiga ke tou faʼifaʼitakiʼi ia ia, ʼe tou fakaovi ai ki te ʼAtua. Pea ʼe hoki lelei anai totatou maʼuli mo kapau ʼe tou maʼu ni felogoi lelei mo te ʼAtua.

ʼE feafeaʼi hau maʼu ia te ala ʼae ʼe taki ki te maʼuli? ʼE moʼoni ʼe lahi te ʼu lotu kua maʼu ia ʼaho nei, kae neʼe fakatokaga fenei mai e Sesu: “ ʼE mole ko natou fuli ʼae ʼe natou ui mai: ‘ ʼAliki, ʼAliki,’ ʼae ka natou hu anai ki te Puleʼaga ʼo selo, kaʼe ʼe gata pe kia ia ʼae ʼe ina fai te finegalo ʼo taku Tamai ʼae ʼe ʼi selo.” (Mateo 7:21) Neʼe ina toe ui fenei: “ ʼE kotou iloʼi anai natou ʼi ʼanatou gaue.” (Mateo 7:16) ʼE feala ke tokoni atu ia te Tohi-Tapu ke ke iloʼi pe ko te lotu fea ʼae ʼe moʼoni.—Soane 17:17.

ʼE feafeaʼi hau haʼele ʼi te ala ʼaia? ʼE tonu ke ke iloʼi ia te agaaga ʼo te Tupuʼaga: Ko ai koa ia ia? Ko ai koa tona huafa? ʼE feafeaʼi koa tona agaaga? Kotea te ʼu gaue ʼe ina fai maʼa tatou? Kotea ʼae ʼe ina loto ke tou fai?a

ʼE loto e te ʼAtua ke gaue ia te tagata, ke kai mo fakafiafia pea ke ina faʼufaʼu hona kiʼi famili. Kae ʼe mole gata ai pe. ʼE feala ke tou fakakaumeʼa mo totatou Tupuʼaga. ʼE tou fakaha totatou ʼofa ʼae kia te ia moka ʼe tou fai tona finegalo. Neʼe ui fenei e Sesu: “Koʼeni ia te fakaʼuhiga ʼo te maʼuli heʼe gata, ke natou ako ke natou iloʼi ia koe, te ʼAtua moʼoni pe ʼe tahi.”—Soane 17:3.

KAMATA HAʼELE ʼI TE ALA

Kapau ʼe ke fia fakafiafiaʼi ia te ʼAtua ʼe tonu ke ke fai ni fetogi ʼi tou maʼuli. ʼE lagi ke ui ʼe faigataʼa faʼu kae ʼe tonu ke ke manatuʼi ʼe ko te ala pe ʼaia ʼae ʼe taki ki te maʼuli fiafia. Kapau ʼe ʼi ai hau ʼu fehuʼi ʼo ʼuhiga mo te ʼAtua, ʼe feala ke ke fakaui hau ako Fakatohi-tapu ki te Kau Fakamoʼoni ʼa Sehova ʼi te hola mo te koga meʼa ʼae ʼe ke loto ki ai. ʼE feala hau fakaʼaogaʼi tomatou tuʼasila ʼi te Neti, www.jw.org/wls.