Tou Tala Te Logo Lelei ʼAki He Lototoʼa Pea Mo He Aga Fakaʼeteʼete
1 ʼI te temi ʼaē neʼe fakatotonu ai kia Petelo pea mo Soane ke nā fakagata tanā fai faka mafola, neʼe nā tali fēnei: “E mole mo feala tama fakalologo, kae ke ma tala te u mea nee ma mamata mo logo ki ai.” (Gaue 4:20) Koteā ʼaē neʼe tokoni kia nāua ke nā lototoʼa ʼo fai te ʼu palalau ʼaia? Neʼe nā “faikole” pea neʼe nā “fonu . . . ʼi te laumālie maʼoniʼoni pea [nā] mālohi ai ʼo talanoa ki te folafola ʼa te ʼAtua.” (Gaue 4:31, MN ) ʼE mahino ia ʼe toe feala mo tatou ke tou maʼu te mālohi ʼi te fai faka mafola mo kapau ʼe tou mulimuli ki tanā faʼifaʼitaki.
2 Kae ʼe lava feafeaʼi hatatou palalau ʼaki he lototoʼa pea mo tou fai ʼaki he aga fakaʼeteʼete? ʼE fakamahino fēnei e te tikisionalio ko te aga fakaʼeteʼete, ‘ko te fealagia ʼa he tahi ke ina fai he ʼu palalau peʼe ko hana ʼu gāue, kae mole mamahi ai he tahi.’ Kapau ʼe ʼi ai he manatu ʼe tou lava felogoi ai mo te hahaʼi, pea ʼe tokoni mai anai ke tou fai he ʼu palalau fakaʼeteʼete. Kapau ʼe tou poto ʼi te palalau fakalelei mo te hahaʼi, pea ʼe feala anai hatatou aga fakaʼeteʼete ʼi tatatou ʼu palalau.—Vakaʼi te Réveillez-vous ! ʼo te ʼaho 22 ʼo Fepualio 1999, ʼi te pasina 4 mo te 5; mo te Annuaire ʼo te taʼu 1988, ʼi te pasina 47.
3 Tou Fakafuafua Lelei: ʼE maʼuhiga ke tou fakafuafua lelei te mālohi pea mo te fakaʼapaʼapa ʼo tatatou ʼu palalau, ke fua lelei tatatou fai faka mafola. Ohage la, ʼe tou lava tali feafeaʼi kia nātou ʼaē ʼe nātou ʼui fēnei: ‘ ʼE lelei te ʼu lotu fuli.’ ʼE tali fakahagatonu kiai te tohi Comment raisonner ʼi te pasina 311, kae ʼaki he aga fakaʼeteʼete. Pea kapau ʼe fehuʼi e he tahi peʼe koʼe ʼe tou ʼaʼahi tuʼumaʼu te hahaʼi ʼaē ʼe mole ko he kau Fakamoʼoni ʼa Sehova kae kua ʼi ai tanatou lotu, pea ʼe feala ke tou tali ʼaki he loto mālohi pea mo he fakaʼapaʼapa ohage ko tona tuʼu ʼi te pasina 401 ʼo te tohi Comment raisonner. ʼE fehuʼi e ʼihi pe koʼe ʼe mole lagolago te kau Fakamoʼoni ʼa Sehova ki te ʼu gāue ʼo te kolo ke hikihiki te ʼaluʼaga ʼo te maʼuli. ʼE lahi te ʼu puani ʼe fakahā ʼi te ʼu pasina 402 mo te 403, ke tou lototoʼa mokā tou palalau kae ke tou fai ʼaki he aga fakaʼeteʼete.—1 Pet. 3:15.
4 Kapau ʼe tou falala kia Sehova ʼi te faikole, ohage ko tona fai e te tokolahi, pea ʼe feala anai ke tou maʼu te tokoni ʼa te laumālie maʼoniʼoni, pea ʼe ina uga anai tatou ke tou palalau ʼaki he lototoʼa pea mo tou fai ʼaki he aga fakaʼeteʼete.—Gaue 5:29.