ʼE Feafeaʼi Te Taupau ʼo Te Fia Logo
1 ʼI te tikisionalio, ko te “taupau” ko te teuteu peʼe ko te faka fealagia ʼo te tuputupu. Kae ko te kupu ʼaia ʼe feala foki ke faka ʼuhiga ki te haʼele lelei ʼo te gāue, te fai faitoʼo peʼe ko te ako. Ko he fakatuʼutuʼu maʼuhiga ʼo totatou minisitelio ʼe ko te fai ʼo ni ʼu tisipulo (Mat. 28:19, 20); ʼe tonu ke tou fai ia meʼa fuli moʼo taupau ʼo te fia logo ʼa te hahaʼi ka felāveʼi mo tatou ʼi te fai faka mafola.
2 ʼE ʼaoga ia ke tautau fai ni ʼaʼahi ki te hahaʼi ʼaē ʼe fakamalotoloto moʼo faka fealagia ke nātou tuputupu fakalaumālie. Ko te ʼu ʼaʼahi fakapotopoto ko tona ikuʼaga tafito ko he ako faka tohi-tapu tuʼumaʼu.
3 ʼE tou liliu pe koa ʼo ʼaʼahi te hahaʼi ʼaē neʼe hā makehe tanatou fia logo? ʼE mole tou liliu pe ʼo ʼaʼahi he tahi mokā neʼe tou tuku ki ai he tohi. Tokolahi te kau pionie neʼe nātou liliu ʼo ʼaʼahi ia nātou ʼaē neʼe palalau lelei mo nātou tatau aipe pe neʼe mole nātou tuku he ʼu tohi. Ko he fai palalau ʼaoga ʼe feala ai ke tou fakahā he manatu faka tohi-tapu ʼe ko he fakatafito lelei ʼaia ʼo he ʼaʼahi.
4 Tou fakaʼaogaʼi te ʼu kiʼi pepa lotu moʼo kamata ʼo te ʼu ako faka tohi-tapu lolotoga te ʼu ʼaʼahi: Ko te ʼu manatu kehekehe ʼe palalau ki ai tatatou ʼu kiʼi pepa lotu ʼe talanoa ki te ʼu logo faka malamanei. ʼE nātou faka maʼuhiga mai ʼe ʼaoga ke ako ke mahino ki te Tohi-Tapu pea mo maʼuliʼi.
ʼE feala anai ke tou ʼui age:
◼ “ ʼI tata felogoi fakamuli, neʼe ta palalau ai ki te ʼu tupuʼaga ʼaē ʼe tonu ai ke tou falala ki te Tohi-Tapu. ʼE ke ʼiloʼi koa pe ko te maʼuli fea ʼaē ʼe fakahā mai e te Tohi-Tapu?” Tou kamata lau te lua palakalafe ʼo te pasina 3 ʼo te kiʼi pepa lotu Une vie paisible dans un monde nouveau. Tou vakaʼi te ʼu vaega faka tohi-tapu. Tou fehuʼi kia ia ʼaē ʼe palalau mo tatou pe koteā tana manatu ki te meʼa ʼaē neʼe tou lau age. Fakaʼosi te fai palalau ʼaki te fakasiosioʼi ʼo te ʼu manatu ʼe tuʼu ʼi te pasina 5 ʼi te kupu ʼaē “Ces bienfaits sont à votre portée” (Ko te ʼu manuʼia ʼaia ʼe ʼaoga kia koutou).
5 ʼE feala anai ke tou fakaʼaogaʼi te kiʼi pepa lotu ʼaē Quel espoir y a-t-il pour nos chers disparus?
ʼE feala anai ke tou ʼui age:
◼ “Ohage ko tata kua ʼosi vakaʼi, tokolahi te hahaʼi mole nātou falala ki te ʼAtua. ʼE nātou ʼui fēnei: ‘Kapau ko te ʼAtua ʼe māfimāfi, he koʼe ʼe ina tuku te hahaʼi ke mamate?’ Ko te kiʼi pepa lotu ʼaia ʼe tali ki te fehuʼi ʼaia.” Tou fakatokagaʼi ia ki te faʼahi ʼaē ʼe kamata ʼaki te palakalafe fā ʼo te pasina 2. Tou fai he fehuʼi ke ʼalu tahi mo te ʼu manatu ʼaia ʼi te ʼosi ʼo te ʼu palakalafe, pea ke tou vakaʼi pe te ʼu vaega ʼe tuʼu ʼi te fahaʼi ʼaia. Kapau ʼe ʼi tatatou kokelekasio te kaupepa foʼou ʼaenī ʼE tokaga moʼoni koa te ʼAtua kia tatou?, ʼe feala ke tou fakaʼaoga tatau mo te kiʼi pepa lotu.
6 Tou hoko atu te ako: ʼAki te muliʼi ʼo te ʼu manatu ʼe tuʼu ʼi te alatike ʼaenī, ʼe kamata hatatou ako faka tohi-tapu ʼi he ʼapi. Ke hoholo atu tatatou ʼu fai palalau, tou fai te fehuʼi ʼaenī ʼi te ʼosi ʼo te ʼaʼahi: “Neʼe ke fakatokagaʼi koa neʼe ta fakaʼaogaʼi he kiʼi temi nounou moʼo tali ki te ʼu fehuʼi maʼuhiga? ʼI te vāhaʼa ʼaē ka haʼu, ʼe feala anai ke ta fakaʼaogaʼi he kiʼi temi loaloaga moʼo palalau ai ki te ʼamanaki ki te fakatuʼuake peʼe ko he tahi atu fahaʼi ʼe ke fia mahino ki ai.” ʼE feala anai ke tou toe vakaʼi he fehuʼi ʼi te ʼu fehuʼi ʼaē ʼe tuʼu ʼi ʼoluga ʼo tou fakaʼaogaʼi ʼi te temi fuli pe ʼe tou ʼolo ai ʼo fai te ʼaʼahi. ʼI he temi faigamālie, tou faigaʼi ʼo fakasiosio he kaupepa peʼe ke tou kamata he ako ʼo fakaʼaogaʼi te tohi Mauli heegata.
7 Ko he fiafia te ako ʼo te Tohi-Tapu mo he tahi ʼe ina kumi fakamalotoloto te moʼoni! Ke tapuakiʼi tatou e Sehova ʼo ina fakatuputupu totatou minisitelio, mo kapau ʼe tou muliʼi te ʼu manatu neʼe tuku mai ʼo ʼuhiga mo te faʼahiga fai ʼaē ke taupau te fia logo ʼa te hahaʼi ʼe felāveʼi mo tatou!