Ke Tou Gāue Tahi Mo Te Tagata Takitaki ʼo Te Ako Tohi
1 Ko te ako tohi ʼe ko he faʼahi tāfito ʼaia ke tou liliu ai ko he ʼu minisi faiva ʼo te logo lelei. Ko te ʼu kaugā hahaʼi ʼe tokosiʼi ke feala ai te ako ʼo te Tohi-Tapu pea mo he tohi ʼa te Sosiete ʼi he temi fakafiafia pea mo faka famili. Ko te ʼu faʼahi ʼaia ʼe lelei foki moʼo tali ʼo he ako ʼe faka fealagia ai kia tatou, ke tou fai faka mafola ʼaki he fakapotopoto lahi. ʼI te ako tohi, ʼe faigafua te fakaloto mālohiʼi ʼotatou takitokotahi pea mo foaki ai he fakasiosio makehe. ʼE feafeaʼi te gāue tahi mo te tagata takitaki ʼo te ako tohi pea mo kita fakaʼaogaʼi leleiʼi te fakatuʼutuʼu ʼaia?
2 Ke tou faiva ʼi te fai faka mafola: Ko he maʼua maʼuhiga ʼo ia ʼaē ʼe ina taki te ako tohi ko te tokoniʼi takitokotahi ʼo nātou fuli ke nātou faiva ʼo kau ki te fai faka mafola. ʼO ʼuhiga mo te faʼahi ʼaia, ko te tohi Notre ministère, pasina 44, ʼe ina fakamanatuʼi mai “ko te kau tuʼumaʼu, ʼo faiva pea mo fakafiafia ʼi te gāue ʼaia ʼe hā anai ʼi ʼihi kau faka mafola”. Ko te tagata takitaki ʼo te ako tohi ʼe tautau fai faka mafola anai mo tona famili, kae ʼe toe fiafia anai ia mokā ʼe kaugā fagona mo ʼihi kau faka mafola ʼi te ʼu faʼahi kehekehe ʼo te minisitelio ʼo fakaʼaluʼalu ki tona polokalama. ʼE feala koa hatatou lagolago tuʼumaʼu ki te ʼu fono fai faka mafola? Ko te faʼahi ʼaia ʼe leleiʼia anai e te tagata takitaki ʼo te ako tohi pea mo ʼihi ʼatu kau faka mafola.
3 Ko te ʼu fono fai faka mafola ʼe fai ʼi te ʼu faʼahi ʼe feala ai te kau fuli ki te minisitelio ʼaki te faiva. ʼO fakaʼalu tahi mo te ʼu ʼaluʼaga ʼo te kolo, ko te ʼu kaugā hahaʼi ʼe lagi nātou fia faka mafola fakavilivili. Ko ʼihi kau faka mafola ʼe nātou maʼu he ʼu fua lelei ʼi te fakaʼosi vāhaʼa mokā nātou kamata ʼaki tanatou ʼu ʼaʼahi pea mo tanatou ʼu ako faka tohi-tapu pea ʼe nātou toe fakatahi ʼi te hola 10 ʼo fakaʼosi ki te fai faka mafola ʼi te ʼu ʼapi.
4 ʼE tou loto koa ke foaki mai he tokoni ʼi he faʼahi ʼo totatou minisitelio? Ko te tagata takitaki ʼo te ako tohi ʼe feala tana kole ki he kau faka mafola faiva ia nātou ʼaia ke kaugā faka mafola mo tatou. ʼI te fakaʼosi ʼo te māhina, tou foaki fakatavili tatatou pepa tānaki gāue. Ko te tagata takitaki ʼo te ako tohi ʼo feiā foki ki te sikalaipe ʼe nā leleiʼia anai tatatou gāue tahi mo nāua ʼi te faʼahi maʼuhiga ʼaia. — Vakaʼi ia Luka 16:10.
5 Lolotoga te ʼaʼahi ʼa te tagata taupau ki te gāue: Ko te tagata taupau ki te gāue ʼe ina ʼaʼahi māhani he ako tohi ʼi te māhina moʼo fakaloto mālohiʼi ʼo te kau faka mafola ke nātou gāue ʼo lahi age ʼi te minisitelio. Ke tou fai hatatou fakasiosio makehe ki te akonaki e minuta 15 ʼaē ka ina fai anai ʼi te ʼosi ʼo te ako tohi; ʼe ko he ʼu tokoni totonu ʼe tokoniʼi anai te kaugā kau faka mafola ke nātou tuputupu ki muʼa ʼi te faʼahi kehekehe ʼo te fai faka mafola. Ko te tagata taupau ki te gāue ʼe fia kaugā gāue mo te kau faka mafola kehekehe ʼo te ako tohi ʼi te fakaʼosi vāhaʼa. Ko te fakaʼaogaʼi katoa ʼo te fakatuʼutuʼu makehe ʼaia; ʼe tou maʼu ai he lelei mai tona poto pea mo tona faiva ʼi te minisitelio.
6 Kapau ʼe tou fakahā takitokotahi he faʼifaʼitaki ʼo gāue tahi pea kapau ʼe tou tokoni fakalelei kia nātou ʼaē ʼe mole heʼeki māhani, ʼe tou kau anai ki te fakatuʼu ʼo te fiafia ʼi te ako tohi, heʼe tou “fai te meʼa ʼaē ʼe lelei ki te hahaʼi fuli pe, kae tāfito foki kia nātou ʼaē ko ʼotatou ʼu kāiga ʼi te tui”. — Kal. 6:10.