Fakaʼaogaʼi Te ʼu Kiʼi Pepa Lotu Moʼo Fakahā ʼo Te Tohi Le plus grand homme
1 Lolotoga te māhina ko sūnio, tokolahi te kau faka mafola ʼe nātou fakaʼaogaʼi anai te ʼu kiʼi pepa moʼo uga ʼo te fia logo ki te tohi Le plus grand homme de tous les temps. Ko te taʼi faiga ʼaia ʼe tokoniʼi ai nātou ke hā tanatou fia logo pea ke nātou fai he tonu peʼe feala ke fakahā te tohi kia ia ʼaē ʼe fai palalau mo nātou ʼi te ʼuluaki ʼaʼahi.
2 Ko te malamanei ʼo te temi ʼaenī ʼe hāo anai koa? Ko te ʼu kiʼi pepa lotu ʼe ko he tokoni lahi moʼo kamata ʼo he ʼu fai palalau. Ko he tokoni ʼaia ke lagaʼi ai te fia logo ʼa te hahaʼi koteʼuhi ko te ʼu kiʼi pepa lotu e lahi ai te ʼu manatu ʼe ʼaoga moʼo uga ʼonatou takitokotahi.
Ohage la, ʼe feala ke koutou ʼui age:
◼ “ ʼI tamatou fai palalau mo te hahaʼi, ʼe mātou fakatokagaʼi e tokolahi ʼe talanoa ki he meʼa ʼo ʼuhiga mo nātou... [fili he meʼa neʼe hoki fakahā ʼi te ʼu logo]. ʼE hage ko te ʼu agaaga ʼo te malamanei kua kovi ʼaupito. Ko ʼihi ʼe nātou fehufehuʼi peʼe feala te hāo ʼo te malamanei ʼo te temi ʼaenī. Koteā takotou manatu ʼo ʼuhiga mo te faʼahi ʼaia? [Tuku ke fai mai hana tali. Tokolahi te hahaʼi ʼe ʼamanaki ki he tonu ʼe lelei.] Neʼe ʼau lau te manatu fakaloto mālohi koia ʼe ʼau loto anai ke ʼau vaevae mo koe. ʼE tuʼu ʼi te kiʼi pepa lotu ʼaenī. [Foaki age ki ai te kiʼi pepa lotu Ko te malamanei ʼo te temi ʼaenī ʼe hāo anai koa? koutou toʼo ʼi tokotou nima he tahi kiʼi pepa lotu feiā.] Fakatokagaʼi mai muʼa pe neʼe feafeaʼi te fakakikite e Sesu te meʼa ʼaia (...)”. Lau he palakalafe ʼi te pasina 4 peʼe ko te 5 ʼe ʼalutahi mo te meʼa ʼaē neʼe koutou talanoa kiai ʼi takotou ʼuluaki palalau. Kapau ʼe ina fakahā mai tana fia logo moʼoni, ʼe feala ke koutou fakatuʼutuʼu ʼo fakahā age te tohi Le plus grand homme. Kapau ʼe feala, toe fakahā age he tahi puani maʼuhiga ʼo te lea faka polofeta ʼa Sesu ʼi te kapite 111. ʼI muʼa ʼo te mavete, ʼe lagi lelei ke lagaʼi he fehuʼi ʼo ʼuhiga mo he manatu ki te fai palalau mokā ʼe koutou toe liliu mai.
3 Une vie paisible dans un monde nouveau: Koteā koa te ʼuhiga kia koutou ʼo te maʼuli fīmālie ʼi he mālama foʼou? ʼI te agamahani, ʼe manatu te hahaʼi ki he ʼu paki taulekaleka, ki te ʼu liuʼa lalahi pea mo te fīmālie ʼi te ʼu mato moʼuga, mo te ʼu manu matalelei ʼe femaʼuʼuliʼaki ʼi te tokalelei. Ko nātou ʼaē ʼe lotomamahi ʼi te ʼu agaaga ʼo te mālama ʼaenī ʼe feala ke nātou maʼu he ʼamanaki ki he maʼuli fiafia ʼi he mālama foʼou fakatupu fīmālie.
4 Neʼe kua koutou teuteu koa ʼo fakahā he manatu fakatupu fīmālie pea mo logo lelei ki tokotou ʼu vāhaʼa fale, ki tokotou ʼu kaugā gāue, pea mo nātou ʼaē ʼe felāveʼi mo koutou ʼi te fai faka mafola ʼi te ʼu ʼapi?
Fakaʼaogaʼi te kiʼi pepa lotu “Une vie paisible dans un monde nouveau”, ʼe feala ke koutou ʼui age he meʼa fēnei:
◼ “ ʼI tau manatu ʼe feala anai te maʼuli fīmālie ʼo te hahaʼi ohage ko te meʼa ʼe tuʼu ʼi te paki ʼo te takafi ʼo te kiʼi pepa lotu ʼaenī? [Tuku ke fai mai hana tali.] Fakalelei kae vakaʼi muʼa te laini fakaʼosi ʼo te ʼuluaki palakalafe ʼi te pasina 2. ʼE fehuʼi ai: ‘Kae ʼe ko he misi koa, te tui ʼaē ko te ʼu faʼahiga meʼa ʼaia ʼe hoko anai ʼi he ʼaho ʼi te kele?’ [ʼOsi ʼaia pea lau te palakalafe ʼaē ʼe hoko mai ʼi te kiʼi pepa lotu.] Ko te talanoa ʼaia ʼo ʼuhiga mo te ʼu lagi foʼou pea mo te kele foʼou ʼe tuʼu ʼi te Tohi-Tapu, ia 2 Petelo 3:13. Kapau ʼe feala, koutou toʼo takotou Tohi-Tapu, ʼo tou lau ia Pesalemo 104:5 ʼe ina akoʼi tatou ʼo lahi age ʼo ʼuhiga mo te temi ka haʼu ʼo te kele.” Peʼe feala pe ke koutou lau te vaega ʼi takotou Tohi-Tapu. Kapau ʼe ina fakahā mai tana fia logo, fakatafito te fai palalau ki te tohi Le plus grand homme, ʼi te kapite 133.
5 ʼE tonu ke lahi te ʼu ʼaʼahi moʼo ‘fakavai’ ʼo te pulapula ʼaē neʼe to (1 Ko. 3:6, 7). Ko te alatike ʼaē ʼi lalo ʼe ina fakahā mai peʼe feafeaʼi te kamata ʼo he ako faka tohi-tapu ʼaki te tohi Le plus grand homme, peʼe ʼi te ʼuluaki fai palalau peʼe ʼi takotou fai ʼaʼahi.