Koutou Faiga Ke Lave ʼi Te Loto ʼo Ia ʼAē ʼe Ako Tohi-Tapu Mo Koutou
1 ʼE koutou loto koa ke fakaʼaogaʼi ʼe ia ʼaē ʼe ako Tohi-Tapu te meʼa ʼaē ʼe ina akoʼi? ʼE tonu ke ina fai mokā ʼe ina fia fakaʼaogaʼi te ʼatamai mālama ʼaē ʼe ina maʼu. Moʼo uga ʼo ia ʼaē ʼe ako Tohi-Tapu mo koutou ke gāue, ʼe tonu ke koutou faigaʼi ke lave ʼi tona loto. ʼI te Penikosite ʼo te taʼu 33 ʼi totatou temi, neʼe fakaloto mālohiʼi e te ʼapositolo ko Petelo ʼaki tana akonaki “neʼe lave ʼi te loto” ʼo te toko 3 000 hahaʼi, ʼonatou “tali fakalelei tana palalau” pea neʼe nātou papitema ʼi te ʼaho ʼaia (Gāue 2:37, 41). E feafeaʼi koa takotou faigaʼi ke lave ʼi te loto ʼo ia ʼaē ʼe ako Tohi-Tapu mo koutou?
2 Koutou teuteu fakalelei: Vakaʼi naʼa koutou fakasiosio te alatike katoa ʼi te kiʼi temi pe ʼaē ʼe ʼaoga ai ke koutou faigaʼi ia ia ʼaē ʼe ako ke ina fakakaukauʼi te manatu. Koutou vakaʼi fakatomuʼa te ʼu puani ʼaē ʼe koutou fakahā anai, pea ke koutou ʼiloʼi papau pe kua mahino te manatu ʼaia kia koutou pea ʼe feala takotou fakaʼaogaʼi fakalelei te ʼu vaega. Koutou vakaʼi fakatomuʼa te ʼu fehuʼi ʼe feala ke lagaʼi ʼi te fakakaukau ʼa ia ʼaē ʼe ako ʼuhi ko tona maʼuli ʼi he temi kua hili. Kapau kua koutou ʼiloʼi lelei ia ia ʼaē ʼe ako mo koutou, ko te ʼatamai mālama ʼaia ʼe tokoni anai kia koutou ke koutou teuteuʼi te manatu ʼaē ʼe ʼaoga tāfito anai kia ia.
3 Koutou mulimuli ki te fai akonaki ʼa Sesu: Neʼe fakaʼaogaʼi e Sesu te ʼu lea fakatātā moʼo fakamahino ʼo te ʼu puani faigataʼa pea mo tokoni kia nātou ʼaē ʼe ina ako ke nātou mahino pea mo logoʼi he meʼa ʼe hoko (Luka 10:29-37). ʼO feiā aipe, ʼe feala ke koutou fakahū he ʼu akonaki lelei ki te loto ʼo ia ʼaē ʼe ako Tohi-Tapu mo koutou ʼaki takotou taupau maʼu he ʼu lea fakatātā faigafua, ʼo koutou fakaʼaogaʼi te ʼu faʼahiga meʼa ʼe tautau hoko ʼi te maʼuli, pea ʼo faka ʼalutahi mo te ʼu ʼaluʼaga ʼo ia ʼaē ʼe ako.
4 Ko te ʼu fehuʼi ʼe ʼaoga tāfito moʼo uga ʼo te ʼu loto ʼo nātou ʼaē ʼe ako Tohi-Tapu, ohage ko te tautau fakahā e Sesu (Luka 10:36). ʼAua naʼa koutou feʼaugaʼia pe mokā ʼe ina lau te tali ʼo te tohi. Koutou fakaʼaogaʼi te ʼu fehuʼi moʼo taki ʼo ia ke ina manatuʼi te meʼa ʼaē neʼe mole ina tāʼofi ʼi muʼa atu. Ko te faʼahi ʼaia ʼe tokoni kia ia ʼaē ʼe ako ke ina fakatuputupu he fakakaukau mālohi. Koutou fai he ʼu fehuʼi ke ina fakahā atu tana manatu ʼo ʼuhiga mo he faʼahiga puani. ʼE feala ke koutou tokagaʼi te ʼu faʼahi ʼaē ʼe ʼaoga ki ai he tokoni, pea ʼe feala ke koutou fakatuʼutuʼu he ʼu tokoni makehe ʼo ʼuhiga mo ia.
5 Kapau ʼe mole tuputupu ia ia ʼaē ʼe ako Tohi-Tapu, ʼe ʼaoga ke koutou fakaloto mālohiʼi ia ke koutou ʼiloʼi ai tona ʼu tupuʼaga. Ko te faʼahi ʼaia ʼe tonu ai ke fai he ʼu ʼaʼahi ʼi tuʼa atu ʼo te temi ʼaē ʼe fai ai te ako. He koʼe ʼe lotolotolua ia ʼo fai te gāue? ʼE ʼi ai koa he ʼu puani ʼo te Tohi-Tapu ʼe mole heʼeki mahino ia ki ai? ʼE tuai koa tana fai he ʼu fetogi ʼi tona maʼuli? Kapau ko ia ʼaē ʼe ako Tohi-Tapu ʼe ‘ina tāʼofi te ʼu manatu e lua’, koutou fakamahino age ki ai ke ina ʼiloʼi te tuʼutāmaki ʼo tana aga ʼaia. — 1 Hau 18:21.
6 Neʼe ʼiloʼi e te ʼapositolo ko Paulo ko te ako ʼo te ʼu moʼoni ʼo te Tohi-Tapu ki te hahaʼi ʼaē ʼe fia logo ʼe ko he gāue fakatupu hāofaki, pea koia foki neʼe ina tokoniʼi te kau kilisitiano fuli ke nātou ‘tokakaga tuʼumaʼu ki tanatou akonaki’. (1 Tim. 4:16.) Ko nātou fuli ʼaē ʼe ako Tohi-Tapu mo koutou ʼe tonu ke lahi te meʼa ʼe nātou fai ʼo ʼuhiga mo te Tohi-Tapu pea mo te ʼu faʼahiga meʼa ʼi te mālama. ʼE tonu ke nātou maʼu te ʼatamai mālama totonu ʼo ʼuhiga mo Sehova pea mo Sesu pea ʼe ʼaoga ke koutou maʼu he ʼu felogoi lelei mo nātou. ʼAki te fai ʼaia ʼe uga ai anai te hahaʼi ʼaē ʼe fia logo ke nātou fakahā tanatou tui ʼaki tanatou ʼu gāue (Sake 2:17, 21, 22). Kapau kua lave ʼi te loto ʼo ia ʼaē ʼe ako, ʼe faiga mālohi anai ia ke ina muliʼi te tokoni moʼo faka maʼuhiga ʼo Sehova pea mo hāofaki ai tona maʼuli. — Taag. 2:20-22.