Ke Hoko Atu Tatatou ʼu Gāue Faka Teokalatike Lolotoga Te Taʼu Gāue ʼAenī
1 Ko te ʼu māhina ka hoa mai ʼe nātou tuku mai he ʼu faigamālie ke tou kau ai ki te ʼu gāue kehekehe. Tokolahi ia tatou ʼe tou fia fakaʼaogaʼi te temi māfana moʼo fakatuputupu ʼo tatatou ʼu gāue faka teokalatike. ʼUhi ko te ʼu faigataʼaʼia faka ekonomike pea ki te kau tūpulaga e lagi ko te ʼu faigataʼaʼia ʼi te faleako, ʼe tonu ke tou tokakaga ke ʼaua naʼa tō ki muli tatatou ʼu gāue faka teokalatike.—Filp. 3:16.
2 ʼE tou nofo nei ʼo ʼamanaki ki te fakatahi faka tisitilike ʼaē ʼe fai ʼi ʼAukusito. Neʼe kua koutou fai koa he fakatuʼutuʼu ke koutou kau kiai, mo maʼu hakotou motokā pea mo hokotou nofoʼaga? Neʼe koutou manatuʼi koa he tahi ʼi takotou kokelekasio ʼe ʼaoga ki ai he tokoni? Ko te taʼi agaʼofa ʼaia ʼe feala ke koutou maʼu ai he ʼu tapuakina ʼo feiā ai foki mo nātou ʼaē ʼe koutou agaʼofa ki ai.
3 Kapau ʼe maʼu hokotou temi, ohage la ko te temi mālōlō mai te ako, kua koutou fakatuʼutuʼu koa ke tuputupu tokotou minisitelio? Tokolahi nātou ʼaē neʼe nātou fakatokagaʼi ko te temi mālōlō, ʼe ko he temi lelei ʼaia moʼo toʼo ʼo te pionie vaeluaʼi temi. Ko te gāue ʼaenī ʼe tautau avahi ai te matapā ki te ʼu pilivilesio lahi ʼi te gāue. ʼE feala ke maʼu e te ʼu famili te fiafia moʼoni ʼaia ʼo nātou gāue fakatahi ʼi te ʼaho katoa. Logo aipe he faʼahiga meʼa ʼe hoko kia koutou, ʼe feala koa ke koutou fakatuputupu tokotou temi ʼaē ʼe koutou kau ai ki te gāue? ʼAki te temi māfana, tokolahi ʼe nātou faiga ke nātou maʼu te faigamālie ke nātou fai faka mafola ai ʼi te ʼu ala.
4 He koʼe koa ʼe mole koutou fakatuʼutuʼu ʼi takotou polokalama ke koutou lagolago ki he tahi ʼi te kokelekasio ʼe foʼofoʼou ʼi te fai faka mafola ʼe faigataʼaʼia tana kamata ʼo he ʼu ako faka Tohi-Tapu? Ko ʼihi ʼu tēhina mo tuagaʼane ʼe nātou fia fakatahi anai mo tatou ki te teuteuʼi ʼo te ʼu fono ʼi te vāhaʼa fuli. He koʼe koa ʼe mole koutou fakatuʼutuʼu ke koutou kau ki te laga ʼo te ʼu Fale ʼo te Puleʼaga ʼaē e lolotoga fai ʼi te temi nei?
5 Neʼe koutou manatuʼi koa te fagonogono ʼi te ala peʼe ko te fagonogono ʼi te afiafi? Kapau ʼe koutou manatuʼi te faʼahi ʼaia, neʼe kua koutou fai koa he ʼu fakatuʼutuʼu takitokotahi? E feafeaʼi koa te hikihiki ʼo takotou tufa ʼo te ʼu nusipepa fakaʼuvea? Ko te fakakau ʼo te faʼahi ʼaenī ʼi tatatou ʼu gāue ʼe feala ia ke fua lelei kia koutou pea mo ʼihi. (Lom. 1:11, 12) Tahi ʼaē meʼa, ʼe feala koa hakotou fai te fagonogono faigamālie? Ke koutou tokaga ʼo ʼave takotou Tohi-Tapu pea mo he ʼu tohi. Koutou fakaʼaogaʼi tokotou temi ʼāteaina ʼaē ʼi te ʼu afiafi moʼo fakatuputupu ʼo takotou kau ki te gāue ʼaē ko te fai ʼo he ʼu tisipulo.
6 ʼE tonu anai ke tokakaga te ʼu tagata ʼāfea ke tokalelei te ʼu gāue ʼa te kokelekasio. Kapau ʼe maʼumaʼua fakatemi te ʼu tagata ʼāfea peʼe ko te ʼu tagata faifekau faka minisitelio, ʼe tonu anai ke fai he ʼu fakatuʼutuʼu ke fakahoko e ʼihi te ʼu maʼua ʼaia. ʼE mole tonu anai ke meʼa noaʼi te gāue ʼa te Sikalaipe peʼe tuku ke fai e he tagata faifekau faka minisitelio ʼe mole faiva. He koʼe koa ʼe mole fakatuʼutuʼu he polokalama moʼo fakamahinohino ai te ʼu faʼahiga gāue ohage la ko te gāue ʼi te ʼu nusipepa, ʼi te ʼu tohi peʼe ko te tānaki ʼaē ʼo te falā? ʼE feala ke fakatuʼutuʼu e te ʼu tagata ʼāfea he polokalama moʼo ʼaʼahi ʼo te ʼu tēhina pea mo te ʼu tuagaʼane ke feala ai hanatou maʼu takitokotahi he fua lelei ʼi te tokoni fonu ʼi te ʼofa ʼaē ka foaki age e te ʼu takitaki ʼo te kokelekasio. Ko te kau tuʼumaʼu ʼaē ki te fai faka mafola ʼe ko he faʼahi maʼuhiga ʼi te maʼuli ʼo he Kilisitiano. ʼE ʼaoga anai ke tuʼu ki muʼa te ʼu tagata ʼāfea ʼi te gāue fai faka mafola pea e lagi ʼe ʼi ai anai niʼihi ʼe feala ke nātou pionie ʼo tuʼa tahi ʼi te taʼu. Ko tanatou faʼifaʼitaki ʼe ko he mālohi ʼe ina uga anai te kau fai faka mafola fuli ʼo te kokelekasio.
7 ʼE moʼoni, ko tatou ko te kau Kilisitiano moʼoni e lahi tatatou ʼu gāue. Kae ko te kumi ʼo te ʼu meʼa ʼo te mālama ʼe faigafua ai tana fakagata tatatou gāue ʼaē ki te Puleʼaga. Ke koutou fakatuʼutuʼu te ʼu meʼa fakalaumālie ʼaē ʼe ʼaoga kia koutou, pea ke koutou pipiki maʼu kiai.—Filp. 1:10.