Tou Tokaga Fakalelei Ki Te Lea Faka Polofeta
1 “Kua mātou maʼu ai te lea faka polofeta kua moʼoni ia.” (2 Pe. 1:19) He koʼe neʼe ʼui e Petelo te manatu ʼaenī? Ko te ʼu lea faka polofeta ʼo ʼuhiga mo te Puleʼaga ʼaē ʼe tuʼu ʼi te ʼu Tohi Faka Hepeleo ʼo feiā aipe mo te ʼu lea faka polofeta ʼaē neʼe talanoa kiai ia Sesu Kilisito neʼe ina fakamoʼoni totonu, peʼe “kua moʼoni ia,” ʼaki te meʼa ʼaē neʼe mamata pea mo logo kiai Petelo pea mo te ʼu tisipulo e toko lua ʼi tana fetogi ia taʼu e 32 ki muʼa atu. Ko te meʼa ʼaia neʼe hā neʼe ina fakaloto mālohiʼi nātou, ʼo mahino ai kia nātou ko Sesu Kilisito ʼe fakanofo hau moʼoni anai ʼi te kolōlia pea mo lagolago katoa ki tana Tāmai. Ko te kau Kilisitiano ʼo te ʼuluaki sēkulō neʼe ‘nātou tokaga fakalelei ki te lea faka polofeta ohage ko he mālama ʼe mū,’ ʼi tonatou ʼu loto ke ʼaua naʼa nātou nonofo ʼi te fakapōʼuli. Ko te tokaga fakalelei ʼaē ki te faka ʼuhiga ʼo te lea faka polofeta, ʼe feala ai hanatou nonofo ʼalaʼala pea mo mālama ʼo aʼu ki te hoko mai ʼo te ʼaho foʼou, mokā ʼe tuʼu anai “te fetuʼu ʼo te ʼaho,” ia Kilisito ʼi te kolōlia ʼo te Puleʼaga.—2 Pe. 1:16-19; Mat. 17:1-9.
2 Neʼe mole tou nonofo mo Petelo ʼo mamata ki te kolōlia ʼi te temi ʼaē neʼe fetogi ai Sesu. Kae, ko te kau Kilisitiano ʼo te taʼiake ʼaenī ʼaē ʼe nātou tokakaga fakalelei ki te lea faka polofeta ʼe nātou maʼu te pilivilesio māʼoluga, mole ko te ʼuluaki hā ʼo te Puleʼaga ʼo Kilisito, kae ko te fakamoʼoni ʼaē ko te Hau kolōlia kua fakanofo moʼoni! ʼI te taʼu fuli talu mai te taʼu 1914, ko te lea faka polofeta kua moʼoni ia ʼi tatatou sio ki te hoko katoa ʼo te ʼu koga kehekehe ʼo te “fakaʼiloga” ʼaē neʼe foaki e Sesu ʼo ʼuhiga mo “tana ʼi henī” ʼi tona ʼuhiga hau. Ko te koga maʼuhiga ʼo te fakaʼiloga ʼe ko te faka mafola ʼo tona puleʼaga, ʼaē ʼe tonu ke fai ki te ʼu puleʼaga fuli, ʼi muʼa ʼo te fakaʼauha e te Hau ia te tuʼu ʼo te faʼahiga meʼa ʼaenī. ʼO mulimuli ki te taki ʼa Kilisito, ko te faka mafola ʼo te Puleʼaga ʼe fai ʼi te temi nei ʼi te ʼu fenua e 231, ʼo lahi tona fai ʼi he faʼahi neʼe mole tou ʼamanaki kiai. (Mat. 24:3-14) Pea tahi ʼaē, ʼi muʼa ʼo te hoko mai ʼo te “mamahi lahi,” ʼe fakatahiʼi e te Hau ʼaē kua fakanofo te “toe hahaʼi tokolahi” “mai te ʼu ʼatu fenua fuli” ʼaē ʼe nātou haga tui ki te “taʼataʼa [faitotogi] ʼo te Akeno.”—Fkhā. 7:9, 10, 14.
3 ʼI te tuʼu ʼo te “fetuʼu ʼo te ʼaho,” ʼi te liliu ʼa Kilisito ʼo pule ʼi te Puleʼaga, ʼe kei ʼi ai koa he tupuʼaga ke tou tokakaga fakalelei ki te lea faka polofeta? ʼIo! Ko Sesu Kilisito ʼaē kua fakanofo neʼe ina foaki ki te ʼapositolo ko Soane he ʼu fakaʼaʼata ʼaē ʼe tuʼu ʼi te tohi Fakahā. Logope la ko te ʼu meʼa ʼaia neʼe hā neʼe fakaloto mālohiʼi pea mo akoʼi ai te ʼu ʼuluaki Kilisitiano, ʼe ʼi ai tonatou maʼuhiga tāfito kia nātou ʼaē ʼe maʼuʼuli ʼi “te ʼu ʼaho ʼo te ʼAliki,” ʼaenī ʼe tou nonofo ai. (Fkhā. 1:10) Ko te tupuʼaga la ʼaia ʼo te toe ako e te ʼu kokelekasio ʼa te hahaʼi ʼa Sehova te tohi Fakahā.
4 “Manuʼia ia ia ʼaē ʼe ina lau leʼolahi pea mo nātou ʼaē ʼe fagono ki te ʼu palalau ʼo te lea faka polofeta, pea mo tauhi te ʼu meʼa ʼaē ʼe tohi ʼi ai; heʼe ko te temi ʼaē neʼe fakakatofa kua ōvi mai.” (Fkhā. 1:3) Kapau ʼe tou loto ke tou fiafia, ʼe tonu ke tou mahino ki tona ʼuhiga, ʼio, ke tou mālama lelei ki te ʼu fakaʼaʼata faka polofeta ʼaia. Koteā te meʼa ʼe fakamaʼua kiai? Ko te liuliuga ʼe ʼaoga ke lave ʼi totatou ʼu loto te maʼuhiga ʼo te fakamatala ʼo te tohi Fakahā. Ko te ʼapositolo ko Petelo, ʼaē ʼe kau ki te kolesi pule ʼo te ʼuluaki sēkulō neʼe mahino ki ai te maʼuhiga ʼo te liuliuga ʼo te ʼu moʼoni tāfito ke feala ai he ‘ ʼaʼala’ ʼo tona ʼu tēhina ʼi te faʼahi fakalaumālie. (2 Pe. 1:12, 13) Ko te “tagata kaugana agatonu mo poto” ʼo te temi ʼaenī ʼe ina tokoniʼi tatou ke ia tatou te loto fakafetaʼi ʼaki tana liuliuga tana fakatokagaʼi tatou ki te lea faka polofeta.—Mat. 24:45-47.
5 E Feafeaʼi Hatatou Tokaga Fakalelei: Ko te taʼi tokaga fea koa ʼaē ʼe ʼaoga ke tou fai ki te lea faka polofeta ʼi te tohi Fakahā? ʼE fakamanatuʼi mai e te ʼapositolo ko Paulo neʼe mole palalau te ʼAtua ki te kau Kilisitiano ʼaki te ʼu ʼaselo peʼe ko te ʼu polofeta ohage ko tana faka felogoi ʼaē mo tana ʼu kaugana ʼi muʼa atu. Kae, neʼe faka felogoi Sehova mo tatou ʼaki ia tona ʼAlo ʼofaina, ʼaē neʼe ina fakanofo ko he “tofiʼa ʼo te ʼu meʼa fuli.” (Hep. 1:1, 2) “Koia la ʼaē ʼe ʼaoga ai ke tou tokaga ʼo lahi age ʼi te aga māhani ki te ʼu meʼa ʼaē neʼe tou logo kiai, ke ʼaua naʼa tou higa.” (Hep. 2:1) ʼIo, ʼe tonu ke tou tokaga fakalelei ki te Folafola ʼa te ʼAtua pea tāfito foki ki te lea faka polofeta ʼaē ʼe haʼu mai ia Sesu Kilisito. E feafeaʼi koa hatatou tokaga tāfito ki tatatou ako ʼo te tohi Fakahā?
6 ʼUluaki, ʼe maʼuhiga ʼaupito ke tou ʼolo ki te ʼu Ako Tohi ʼo Te Kokelekasio ʼi te vāhaʼa fuli. ʼE moʼoni, tokolahi ia tatou neʼe kua tou ako te tohi Fakahā. Koia, ko ʼihi e lagi ʼe mole nātou faka maʼuhigaʼi te ʼolo ʼaē ki te ako tohi, ʼo ʼui maʼa nātou kapau ʼe mole nātou ʼolo ki he ako tohi, kua ʼosi nātou ʼiloʼi pe te tohi. Kae, ʼi te hili ʼo te taʼu fuli, ko te talanoa faka polofeta ʼaia ʼe liliu ia ʼo lahi tona mālama pea mo ʼaoga ʼi te temi ʼaē neʼe tou ʼuluaki ako ai te tohi Fakahā. Ko tatou fuli ʼe ʼaoga ke tou tokagaʼi te ʼu meʼa ʼe hoko ʼi te temi ʼaenī, ʼaē ʼe nātou uga tatou ke tou tuputupu fakavilivili ki te temi ʼe hoko katoa ai te ʼu lea faka polofeta ʼo te tohi Fakahā. ʼOsi ʼaia ʼe feala ke tou teuteu ke ʼalutahi totatou maʼuli mo te finegalo ʼo Sehova. Kapau ʼe feala, koutou fai hakotou fakatuʼutuʼu takitokotahi ke ʼaua naʼa koutou puli ʼi he ako tohi, lolotoga te vakaʼi maʼuhiga ʼo te tohi Fakahā.
7 Lua, ke koutou teuteuʼi fakalelei takotou ako tohi. Koutou kumi te ʼu vaega faka Tohi-Tapu pea ke koutou vakaʼi peʼe feafeaʼi tanatou lagolago ki te fakamahino ʼo te ʼu vaega ʼi te tohi Fakahā ʼaē ʼe lolotoga takotou akoʼi. ʼI te faʼahi ʼaia ʼe feala ke lahi age te meʼa ʼe koutou fai ʼi te tali pe ʼaē ki te ʼu fehuʼi. Koutou faigaʼi ke mole gata pe ʼi takotou mahino kae ke koutou maʼu te fakapotopoto pea mo te ʼatamai. (Taag. 4:7) Tolu leva, ke koutou kau mālohi ki te ako tohi ʼaki takotou fai he ʼu tali pea mo lau te ʼu vaega faka Tohi-Tapu. Koutou fakatuʼutuʼu ke fai hakotou tali ʼo tuʼa tahi, kae ʼe lelei age te tali tuʼa lahi ʼi te ʼu ako tohi fuli. Ko te fai foki ʼo te faʼahi ʼaia ʼe tokoni anai kia koutou ke tuʼu takotou fakakaukau ki te ako ʼaē ʼe fai.
8 Ko te tokaga ʼo lahi age ʼi te agamāhani ki te lea faka polofeta ʼe mole gata ʼaki pe te teuteu, te kau ki te ʼu fono, pea mo te fai ʼo te ʼu tali. Ko tona faka ʼuhiga ʼi te ʼosi ʼo te ako, ʼe ʼaoga ke hoholo atu tatatou ‘metitasio ki te ʼu meʼa ʼaia, ʼo ʼave katoa tatatou fakakaukau ki te ʼu meʼa ʼaia.’ (1 Tim. 4:15) Kapau ko te lea faka polofeta ʼe tonu ke hage ko he mālama ʼe mū ʼi ʼotatou ʼu loto, ʼe tonu ke tou faka fealagia ke ina uga ia tatou—ʼatatou ʼu manatu, ʼatatou holi, te meʼa ʼaē ʼi totatou ʼu loto, ʼatatou ʼu fakakaukau, pea mo ʼatatou ʼu fakatuʼutuʼu. (2 Pe. 1:19) Koia, ʼe tonu ke tou fai ai te ʼu fehuʼi ʼaenī ohage la: Koteā te faka ʼuhiga ʼo te talanoa ʼaenī kia ʼau? Koteā te meʼa neʼe ʼau akoʼi ʼo ʼuhiga mo Sehova pea mo tona ʼAlo, ko Sesu Kilisito? Koteā te ʼu pelesepeto ʼe tuʼu ʼi te alatike? ʼE lave koa ki toku loto te ako ʼaenī? E feafeaʼi koa taku maʼuliʼi te ʼu moʼoni ʼaia ʼi toku maʼuli? ʼI toku famili? ʼI te loto kokelekasio? Ko tatatou maʼuliʼi te ʼu meʼa ʼaē ʼe tou akoʼi, ʼe feala ai hatatou ʼui, ohage ko te ʼui e te tagata fai pesalemo: “Ko tau folafola ʼe ko he mālama tutu ki toku vaʼe, pea ʼe ko he mālama ki toku ala.”—Pes. 119:105; Sopo 29:3, 4.
9 Tou ʼAlaʼala Lolotoga Te ʼu Temi Faigataʼa: ʼI te taʼu 33 ʼo totatou temi, neʼe fakatokagaʼi e Sesu tana ʼu tisipulo ʼo ʼuhiga mo te fakaʼauha ʼo Selusalemi pea mo te fakaʼiloga, ke feala ai hanatou feholaki ki he koga meʼa ke hāofaki ai nātou. (Luka 19:41-44; 21:7-21) ʼOsi ʼaia, pea fakalaka te ʼu taʼu e 30 tupu. Neʼe lagi ʼui e ʼihi Kilisitiano ʼo Sutea ʼe mole lahi anai he ʼu fetogi ʼi te temi ka haʼu. ʼI ʼaoga leva ʼo te palalau fakaloto mālohi ʼa te ʼapositolo ko Petelo ʼi tana lua tohi, ʼaē neʼe fai ʼi te taʼu 64 ʼo totatou temi, ʼaē ke nātou ‘tokaga fakalelei ki te lea faka polofeta’! (2 Pe. 1:19) ʼI te hili pe ʼo te taʼu ʼaia, ʼi te taʼu 66 ʼo totatou temi, neʼe takatakai Selusalemi e te ʼu kautau Loma. ʼI te mavae fakapuna’maʼuli ʼa te ʼu kautau Loma, ko te kau Kilisitiano Sutea ʼaē neʼe nonofo ʼaʼala neʼe nātou muliʼi te ʼu fakatotonu ʼa Sesu pea neʼe nātou feholaki. Pea, ʼi te taʼu 70 ʼo totatou temi, neʼe toe liliu mai te ʼu kautau Loma pea neʼe nātou fakaʼauha katoa ia Selusalemi. ʼI meʼa fakaloto fiafia ki te kau Kilisitiano ʼaia tanatou tokaga fakalelei ʼaē ki te lea faka polofeta ʼa Sesu!
10 Koteā te meʼa ʼe ina faka ʼalaʼala tatou ʼaē ko te kau Kilisitiano ʼo te temi nei? ʼI te ʼu meʼa ʼaē neʼe hā ʼe tuʼu ʼi te tohi Fakahā, neʼe fakatokagaʼi e Sesu te kau Kilisitiano ʼe maʼuʼuli ʼi te temi nei ʼo ʼuhiga mo te ʼu faʼahiga meʼa ʼe hoko anai lolotoga te ʼaho ʼo te ʼAliki. Lolotoga te ʼu taʼu e 80 kua hili, ʼe lahi te ʼu koga kua ʼosi hoko: ko te tupu ʼo te Puleʼaga; te tau ʼi te lagi pea mo te lavā ʼa Satana pea mo tana kau temonio, ʼo kau ki ai mo tonatou lī ifo ki te kele; te tō ʼo Papiloni Lahi; pea mo te hā ʼo te manu fekai lanu kula ʼahoʼaho, te valu ʼo te mālohi ʼo te mālama. Ko te hoko ʼo te ʼu faʼahiga meʼa ʼaia ʼo te lea faka polofeta ʼi te tohi Fakahā ʼe tou ʼiloʼi papau ai, kua vave pe nei tatatou sio ki te hoko ʼo te ʼu meʼa ʼaē kei toe: ko te fakakatoa ʼo te 144 000, te fakatahitahi katoa ʼo te toe hahaʼi tokolahi, te fakaʼauha ʼo Papiloni Lahi, te tau ʼi Halamaketone, te lī ʼo Satana ki te vanu, pea mo te Pule ʼa Kilisito ia taʼu e afe. ʼE maʼuhiga ke tou tokaga fakalelei ki te fakatokaga ʼa Sesu: “Koʼeni! ʼE ʼau haʼu ohage he tagata kaihaʼa. Manuʼia ia ʼaē ʼe nofo ʼalaʼala pea mo ina taupau ʼona ʼu kofu tuʼa, ke ʼaua naʼa haʼele telefua pea ke ʼaua naʼa sio te hahaʼi ki tona ufiufi”!—Fkhā. 16:15.
11 ʼE tou nonofo ʼalaʼala koa? ʼE tou tokagaʼi fakamalotoloto koa te lea faka polofeta? Pe neʼe tou foaki totatou maʼuli kia Sehova kua hili nei kiai taʼu e 5 peʼe 50, ko te ʼu palalau ʼa Paulo ki te kau Kilisitiano Loma ʼe ʼaoga ke tou maʼuliʼi: “ ʼE koutou ʼiloʼi te temi, pea ʼe kua hoko te hola ʼaē ke koutou ʼaʼala ai mai te moe, heʼe ko te temi nei kua ōvi ʼosi mai totatou hāofaki ʼi te temi ʼaē neʼe tou liliu ai ko te hahaʼi tui. Ko te pōʼuli kua tautuku ia; ko te ʼaho kua ōvi mai ia.” ʼE fakaloto mālohiʼi e Paulo te kau Kilisitiano ke nātou “līaki te ʼu gāue ʼa te fakapōʼuli” pea ke nātou “haʼele fakapotopoto.” (Lom. 13:11-13) ʼE tou maʼuli nei ʼi te mālama ʼe fakapōʼuli ki te ʼu aga ʼaē ʼe tonu ke fai. Ko te aga ʼaē neʼe fakatupu tūkia ki te hahaʼi kua hili nei kiai taʼu e 30 peʼe 40 kua liliu ia ko he meʼa lelei ʼi te 20 sēkulō. Koutou tokaga, ʼu tēhina, ke ʼaua naʼa koutou tuku ia koutou ke koutou hēʼia ʼi te fakapōʼuli ʼo te mālama pea mo koutou meʼa noaʼi te ʼu aga ʼaē ʼe tonu ke fai. Kapau ʼe koutou fakagafua ki te ʼu meʼa peʼe ko te faʼahiga manatu pea mo te faʼahiga maʼuli ʼo te mālama ʼaenī ke nātou taki koutou, ʼe mole koutou tokagaʼi anai te ʼu fehuʼi maʼuhiga ʼaē ʼe tau mo tatou ʼi te temi nei pea kua vave pe nei tona fakatokatoka ʼo talu ai: te faka lākatonuʼi ʼo te faipule ʼa Sehova pea mo te tāpuhā ʼo tona huafa. Ko te māʼumoea fakalaumālie ʼe fakatupu tuʼutāmaki anai ki te fakamaʼuli ʼo te hahaʼi, ʼi te temi ka haʼu kua ōvi mai.
12 Ke Tuputupu ʼi Totatou Loto Te Fakafetaʼi Ki Te Lea Faka Polofeta: Ko te kau polofeta Hepeleo neʼe nātou tokagaʼi te fakahoko ʼo te talanoa neʼe haʼu mai te ʼAtua ʼo ʼuhiga mo te Mesia. Neʼe nātou fai “he ako mālohi pea mo he kumi fakalelei” ʼo ʼuhiga mo te hoko ʼo te fakatuʼutuʼu ʼa te ʼAtua. (1 Pe. 1:10, 11) ʼO feiā aipe, kapau ʼe koutou tokaga fakalelei ki te lea faka polofeta ʼi te tohi Fakahā, ʼe tuputupu anai takotou fakafetaʼi ki te ʼu meʼa fakalaumālie. Ko takotou holi ki te meʼa kai fakalaumālie ʼe tuputupu anai, ʼo feala anai hana uga koutou ke koutou kumi “te ʼu meʼa loloto ʼa te ʼAtua.” (1 Ko. 2:10) Kapau ʼi tokotou loto ʼe koutou logoʼi te loto fakafetaʼi pea mo te ʼofa ki te lea faka polofeta, ʼe mole ʼaoga anai ke uga koutou e he tahi ke koutou ʼolo ki te ʼu fono; ʼe koutou uga ia koutou ke koutou tatuʼu pea ke koutou kau ki te ʼu fono. (Luka 6:45) Pea kapau ʼe nofo te ‘folafola ʼi tokotou loto totonu,’ ʼe uga anai koutou ke koutou ‘fakahā ki te hahaʼi te fakamoʼoni ʼo ʼuhiga mo tokotou fakamaʼuli.’—Lom. 10:8-10.
13 ʼI tatatou vave aʼu ki te temi fakaʼosi, ʼe lahi anai totatou fakalainoaʼi ʼuhi ko tatatou tui ki te ʼu talanoa faka polofeta ʼa te ʼAtua. (2 Pe. 3:3, 4) Kae, ʼe tou nonofo ʼalaʼala anai ʼo ʼuhiga mo te lea faka polofeta. Ko te mālama ʼo te Folafola ʼa te ʼAtua ʼe ina fakahā mai kia tatou te temi ʼaenī ʼe tou nonofo ai. ʼE ina fakamālamaʼi tatou ʼo ʼuhiga mo te ʼu ʼaho fakaʼosi ʼo te mālama fakapōʼuli ʼaenī ʼe tou maʼuli ai. Ko te fetuʼu ʼo te ʼaho kua tuʼu! Kua fakanofo ia Kilisito ko te hau ʼi te Puleʼaga! Kua tou ʼamanaki nei ki te tuʼu mai ʼo he ʼaho foʼou. ʼOfa pe ko te fakapapau ʼa te ʼAtua ʼo ʼuhiga mo te mālama foʼou ke moʼoni tuʼumaʼu kia tatou, ohage ko te moʼoni ʼo te Puleʼaga ki te ʼu ʼapositolo e toko tolu ʼaē neʼe nātou maʼu te pilivilesio ʼaē ko te ʼuluaki mamata ki te meʼa faka milakulo neʼe hā ʼo ʼuhiga mo te fetogi ʼa Sesu.