Tou Kumi Te Hahaʼi ʼAē ʼe Nātou Lotolelei Ke Akoʼi Nātou
1 “ ʼE mole he tahi ʼe feala ke haʼu kia te ʼau, mo kapau ko te Tāmai ʼaē neʼe ina fekauʼi mai ʼau ʼe ina taki ia ia.” (Soane 6:44) Ko Sehova, ʼaē ʼe ina kumi te loto, ʼe ina fakapale anai ia nātou ʼaē ʼe nātou lotolelei ke akoʼi ia nātou pea mo mulimuli ki te meʼa ʼaē ʼe nātou akoʼi. (Sel. 17:10; Soane 6:45) ʼE tou maʼu te pilivilesio ʼaē ko te gāue fakatahi mo ia, ʼi te kumi ʼo te hahaʼi agavaivai ʼaē ʼe nātou holi ki he mālama foʼou.—Pes. 37:11; 1 Ko. 3:9.
2 Neʼe fakamatalatala e Sesu tana ʼu tisipulo ohage ko he “ ʼu tautai tagata.” (Mat. 4:19) Logope ko te gāue ʼaia ʼe tautau fakatupu gaʼegaʼe, ʼe logoʼi te fiafia ʼi te maʼu ʼo te ʼu fua lelei. ʼE mole tou gāue maʼa tatou totonu pe, kae ʼe tou hāofaki moʼoni te ʼu “ika” mai te fakaʼauha ʼe hoko moʼoni anai. Ko he tagata tautai faiva ʼe tonu ke ina ʼiloʼi te fakalalata ʼo te ika. ʼO toe feiā aipe, ʼe tonu ke tou tala te logo ʼo te Puleʼaga ʼaki he faʼahiga fai ʼe fakatupu lalata, pea mo fakatupu ʼaki ai anai te fia logo ʼa te hahaʼi ʼaē ʼe fagono mai kia tatou. ʼE moʼoni tāfito te potu ʼaia mokā tou fai ni ʼu ʼaʼahi. Koteā te ʼu palalau ʼaē ʼe feala ke tou fai?
3 Kapau neʼe ʼi ai he fia logo ki te ʼu alatike ʼo “Te Tule Leʼo” ʼaē ʼe palalau ki te lotu, ʼe feala ke koutou ʼui fēnei age:
◼ “ ʼI muʼa atu neʼe tā palalau ʼo ʼuhiga mo te tupuʼaga ʼo te mole fia palalau ʼa te hahaʼi ʼo ʼuhiga mo te lotu. ʼE mole ke mata faikeheʼia te manatu ʼaia, mai tona ʼaluʼaga ʼaē tokolahi ʼi ʼotatou ʼu vāhaʼa fale ʼe nātou lau ko nātou ko te kau Kilisitiano? E lagi ʼe koutou feʼekeʼaki pe koʼe ko te lotu ʼe ko he faʼahi fakatupu maveuveu pea mo lahi ai te ʼu fihi.” Koutou tuku ke fai mai hana tali. Koutou fakahā age te pasina 310 ʼo te tohi Comment raisonner, pea koutou fakahā age he ʼu manatu ʼi te ʼu kupu ʼaē “Pourquoi y a-t-il tant de religions?” (He koʼe koa ʼe lahi te ʼu lotu?)
4 ʼE feala ke koutou fakaʼaogaʼi te ʼu palalau ʼaenī moʼo kamata ʼaki he fai palalau ki te lotu:
◼ “ ʼE ʼi ai koa he puleʼaki ke feala ai hatatou ʼiloʼi papau ʼe tou ʼi te lotu moʼoni? [Koutou tuku ke fai hana tali.] Mai tona ʼaluʼaga ʼaē ʼe lahi te ʼu lotu, tokolahi te hahaʼi ʼe mole kei nātou ʼiloʼi pe kofea te lotu moʼoni. Koutou fuli age te tohi Comment raisonner, ʼi te ʼu pasina 316 ki te 318, ʼe palalau ai ki te fehuʼi “Comment identifier la vraie religion?” (E feafeaʼi he ʼiloʼi ʼo te lotu moʼoni?) Koutou fakamatala fakanounou te fehuʼi 5, “Ko ʼana ʼu hahaʼi ʼe nātou feʼofaʼofani moʼoni koa?” Koutou fakamahino age peʼe feafeaʼi hana lava mālama ki he tahi ʼu meʼa ʼaki hana ako faka Tohi-Tapu ʼo ia totonu.
5 Kapau ko ia ʼaē neʼe fai palalau mo tatou neʼe tuʼania ʼo ʼuhiga mo te ʼu ʼaluʼaga ʼo te malamanei, e lagi koutou fia ʼahiʼahi te palalau ʼaenī:
◼ “ ʼE mahino ia ʼe koutou tuʼania ʼo ʼuhiga mo te ʼaluʼaga kovi ʼaē ʼe tou felāveʼi mo ia pea mo ʼaē ʼe hoko ʼi totatou ʼu famili. ʼE fakahā mai e te Tohi-Tapu te fakapapau fakaofoofo ʼe fakahoko anai e te ʼAtua ʼi he temi ka haʼu kua ōvi mai.” Koutou lau age ia Tāʼaga Lea 2:21, 22, pea koutou fakamahino age te ʼaluʼaga ʼo te fakapapau e Sehova he mālama ʼo te tokalelei heʼegata.
6 Ka tou fai he ʼu ʼaʼahi kae kua ʼosi kamata te gāue faka mafola makehe ʼo te ʼu Logo ʼo Te Puleʼaga, koutou tokakaga fakalelei ʼo tuku he pepa ʼo te ʼu Logo ʼo Te Puleʼaga ki te ʼu hahaʼi ʼaē ʼe palalau mo koutou kae mole heʼeki nātou maʼu hanatou pepa feiā. Ko te meʼa ʼaē ʼe feala ke koutou ʼui kia ia ʼaē ʼe fai palalau mo koutou, ʼe hoki vakaʼi anai ʼi Te Minisitelio ʼo Te Puleʼaga ʼo te māhina ʼo Maio.
7 Mai tona ʼaluʼaga ko te Folafola ʼa te ʼAtua “ ʼe ina fakalogoʼi tana gāue,” ʼe tonu ke tou faigaʼi ke tou fakaʼaogaʼi ʼi tatatou ʼu palalau. (Hep. 4:12) Koutou tokakaga ʼo fakaloto mālohiʼi ia ia ʼaē ʼe fai palalau mo koutou ke ina lau te Tohi-Tapu. (Vakaʼi ia Gāue 17:11.) Kapau ʼe tou tokakaga ʼo fai fakalelei tatatou gāue, ʼe tapuakina anai e Sehova tatatou ʼu faiga.