Ko Te ʼu Logo [Makehe] ʼo Te Puleʼaga Ki Te Hahaʼi Fuli Pe
1 ʼI te ʼaho 24 ʼo ʼApelili, neʼe tou kamata tufa te ʼu Logo [makehe] ʼo Te Puleʼaga pea neʼe ina uga te fia fagono ʼa te hahaʼi ʼo te ʼu potu fuli pe! ʼE mole ʼui pe ʼe ko te ʼu logo ʼaē ʼe tuʼu ʼi loto ʼe tautonu kae ʼe toe maʼuhiga hona vakaʼi fakavilivili. Ko te kau fai faka mafola ʼo te ʼu kokelekasio ʼaki tonatou loto katoa neʼe nātou fakahā tanatou lagolago ki te gāue ʼaia, ʼaki tanatou holi ʼaē ke nātou foaki te logo ʼaia ki te toko lauʼi afe hahaʼi. ʼE koutou holi koa ke lahi ʼaupito takotou kau kiai?
2 Ko te ʼu Logo ʼo Te Puleʼaga neʼe fakamomoli ki te ʼu kokelekasio fuli, pea neʼe fakafuafua te ʼu Logo ʼo Te Puleʼaga e 50 ki te kau fai faka mafola takitokotahi pea ko te ʼu Logo ʼo Te Puleʼaga e 250 ki te kau pionie takitokotahi. Ko te ʼu Logo ʼo Te Puleʼaga ʼe fia ʼaē neʼe koutou tufa? Kapau neʼe mole feala hakotou tufa lahi ohage ko te meʼa ʼaē neʼe koutou fakaʼamu kiai, neʼe koutou fakasiosioʼi koa peʼe feafeaʼi hona faʼahiga fai ke lahi age takotou tufa ʼi muʼa ʼo te tufa fakaʼosi ʼi te ʼaho 14 ʼo Maio? Koteā ʼaē ʼe mole koutou toʼo ai te selevisi pionie vaeluaʼi temi? ʼE feala koa ke lahi takotou kau ki te ʼu fono makehe ʼaē ʼe fai ʼo ʼuhiga mo te gāue faka mafola ʼi te lolotoga ʼo te vāhaʼa, ohage la ko te ʼu fono ʼaē ki te fagonogono ʼi te afiafi?
3 ʼE tonu anai ke vakaʼi fakalelei e te kau tagata ʼāfea pe neʼe gāueʼi te telituale ʼo mulimuli pe ki te fakatuʼutuʼu ʼaē neʼe fai kiai. Neʼe kua fakahā koa te ʼu Logo ʼo Te Puleʼaga ki te ʼu ʼapi fuli? Ko tatatou ʼu faiga ʼaē mo totatou loto katoa ʼe iku anai ia.
4 E lagi neʼe koutou maʼu te toe fiafia makehe ʼi te gāue ʼaia koteʼuhi neʼe feala ki te tokolahi ke nātou kau kiai, ʼo kau ai te kau fai faka mafola foʼou pea mo te kau tūpulaga. ʼE mātou fakaʼamu ko te fiafia ʼaia ʼe lagolago anai, ʼo fakaloto mālohiʼi ia tatou fuli ke tou tokakaga ʼo toe ʼaʼahi ia nātou ʼaē neʼe nātou tali lelei te gāue. ʼE fakaloto mālohiʼi tatou ke tou tohi fakalelei te ʼu ʼapi, ʼo toe feiā mo nātou ʼaē neʼe fia fagono. Ko te fakaʼosi ʼo te māhina ʼo Maio ʼe ko he temi lelei anai moʼo fai ni ʼu ʼaʼahi ʼaki te fakatuʼutuʼu ʼaē ke kamata ni ʼu ako foʼou.
5 Koteā te meʼa ʼe feala ke tou talanoa kiai mo kapau ʼe tou toe liliu kia nātou? ʼE lagi lelei anai hakotou ʼui fēnei age: “E lagi kei ke manatuʼi te ʼu manatu ʼaē neʼe tuʼu ʼi te kiʼi pepa ʼaē neʼe ʼau tuku atu mole heʼeki faʼa fualoa kiai; ʼe ʼau mahalope neʼe ke maʼu hou temi faigamālie ke ke lau te kiʼi pepa pea mo fakakaukauʼi te ʼu manatu ʼaē ʼe tuʼu ʼi ai. Ko te ʼu logo ʼaē ʼe tuʼu ʼi loto neʼe nātou lagaʼi te ʼu fai palalau ʼa te hahaʼi ʼi totatou kolo ki te faʼahi ʼaia, mai tona ʼaluʼaga ʼaē ʼe talanoa ki te ʼu fehuʼi maʼuhiga ʼe felāveʼi mo te malamanei katoa.” Koutou palalau ki te ʼu talanoa maʼuhiga ʼaē ʼe tuʼu ʼi te lua pasina, pea mo koutou fehuʼi fēnei age: “Koteā tau manatu ʼo ʼuhiga mo te meʼa ʼaē ʼe ʼaoga ke tou fai ke tou ʼiloʼi ai ʼe tou teuteu ki te ʼu meʼa ka hoko mai anai?” Koutou tuku ke fai mai hana tali. Felogoi ki te tahi ʼu puani ʼaē ʼe tuʼu ʼi te ʼu pasina 2 ki te 4 ʼo te ʼu Logo ʼo Te Puleʼaga, pea koutou fakaʼui age ke fai hana ako faka Tohi-Tapu, pea kapau ʼe mole ina tali, koutou tuku age te ʼu nusipepa fakamuli pea mo fai hana apone.
6 Kapau neʼe hinoʼi koutou ki he telituale ʼo te tahi kokelekasio, koutou foaki ki te kokelekasio ʼaia te ʼu higoa ʼo te hahaʼi fuli ʼaē neʼe koutou maʼu ʼe fia fagono, ke toe ʼaʼahi nātou e te kau fai faka mafola ʼo te kokelekasio ʼaia. ʼO toe feiā pe, kapau neʼe kole atu ke koutou fai ni ʼu ʼaʼahi, ʼe koutou tokaga ʼo toe liliu fakavilivili ʼo ʼaʼahi ia nātou.
7 Ko te tufa makehe ʼo te ʼu Logo ʼo Te Puleʼaga ʼaia neʼe fakatupu te fiafia lahi pea mo uga ia tatou fuli ke tou fakatuputupu age tatatou ʼu faiga ʼi te gāue ʼo te faka mafola ʼo te Puleʼaga. ʼE feala ke tou falala ko te tufa ʼaia ʼe fua manuʼia anai, ʼo fakatuputupu aipe te mahino ʼa te hahaʼi ʼi te ʼu potu fuli ʼo ʼuhiga mo te huafa lahi ʼo Sehova pea mo tana fakatuʼutuʼu. (Is. 12:4, 5) Kapau ʼe lahi te ʼu meʼa ʼaē ʼe feala ke tou fai, pea ʼe toe lahi age anai mo tatatou fiafia.—Pes. 126:3.