Te Tali Ki ʼAkotou ʼu Fehuʼi

◼ Koteā te ʼu tohi ʼaē ʼe tonu ke tou ʼave ki te ʼu fono?

ʼI te vāhaʼa fuli ʼe tou maʼu te ʼu fakatotonu ʼe fua lelei pea mo fakaloto mālohi ʼi te ʼu fono ʼo te kokelekasio. (Is. 48:17; Hep. 10:​24, 25) Kae, ʼe fakalogo pe foki te lelei ʼo te ʼu meʼa ʼaia kia tatou mo kapau neʼe lelei tatatou teuteuʼi ʼo tatatou ʼu fono.

ʼE lelei anai mo kapau ko nātou takitokotahi ʼo te famili ʼe nātou ʼaumai te ʼu tohi ʼaē ʼe fakaʼaogaʼi ʼi te ʼu fono. Ohage ko te Tohi-Tapu, te katiko, te ʼu tohi ʼaē ʼe tonu ke vakaʼi ki te ako, te kaupepa moʼo tohi ai ni ʼu nota, pea mo he peni.

Ki te Ako Faka Minisitelio Faka Teokalatike, ʼe tonu ke tou maʼu te Polokalama ʼo te Ako Faka Minisitelio Faka Teokalatike pea mo te Manuel pour l’École du ministère théocratique. Ko te ʼu tohi ʼaia ʼe tokoni kia tatou ke tou fakamaʼumaʼu lelei te kupu tāfito ʼo te kaugā ako ʼaē ʼe fai tana akonaki pea mo mulimuli ki te ʼu tokoni ʼaē ʼe foaki age leva kia ia e te tagata taupau ʼo te ako. ʼE feala ke tou faka ʼuhiga kia tatou totonu te tokoni pea mo te ʼu fakamahinohino moʼo hikihiki tatatou ʼu kiʼi akonaki pea mo tatatou ʼu faʼahiga palalau ʼaē ʼi te gāue fai faka mafola. Ko te hahaʼi fuli ʼo te famili ʼe feala ke nātou tahi maʼu te tohi ʼaē ʼe tonu ke tou fakatafito kiai te akonaki.

ʼO ʼuhiga mo te Fono Gāue, ʼe tonu ke tou maʼu te Minisitelio ʼo Te Puleʼaga pea mo te tohi Comment raisonner. Koutou ʼave mo koutou ki te fono te ʼu tohi ʼaē ka fakaʼaogaʼi ai, ohage ko te ʼu tohi ʼaē ʼe fakaʼaogaʼi anai ʼi te tufa ʼi te fai faka mafola. Ko te kau tagata ʼāfea ʼe tonu anai ke ia nātou te tohi Organisés pour bien remplir notre ministère.

ʼE tonu anai ki te ʼu mātuʼa ke nātou tokakaga ke nofo maʼu tanatou ʼu tamaliki pea ke nātou mulimuli ki te ʼu fono ʼo te kokelekasio. Ke foaki age kia nātou hanatou ʼu Tule Leʼo pea mo te ʼu tohi ʼaē ʼe ʼaoga ki te fono, tatau aipe peʼe mole heʼeki nātou popoto ʼi te lautohi, pea mo fakaloto mālohiʼi nātou ke nātou leleiʼia te ʼu fono. Kapau ʼe akoʼi te kau tūpulaga ke nātou fakaʼapaʼapa ki te ʼu tohi faka teokalatike pea mo fakaʼaogaʼi te ʼu tohi ʼaia, ko te ʼu agamāhani lelei pea mo loaloaga ʼi te faʼahi fakalaumālie ʼe fakatuputupu.

Ko te fiafia pea mo te lelei ʼaē ʼe tou maʼu ʼi te ʼu fono ʼo te kokelekasio, ʼe ʼāsili lahi age mo kapau ʼe tou ʼaumai te ʼu tohi fuli ʼaē ʼe ʼaoga ki te fono. (2 Tim. 3:17) ʼE ko te meʼa lelei pe ʼaia ke tou ʼiloʼi ai ʼe tou “fonu ʼi te ʼatamai mālama totonu ʼo ʼuhiga mo te finegalo [ʼo te ʼAtua], ʼaki te poto katoa pea mo te ʼatamai fakalaumālie.”​—⁠Kol. 1:⁠9.