ʼE Fakatatagi e Te Fakatahi Faka Tisitilike Te Pāui Faka Malave Loto!—Tou Vikiviki Fakafiafia Kia Sehova ʼi Te ʼAho Fuli!
1 “Kapau ko te pupuhi fakatagi ʼe mole tatagi lelei, ko ai koa ʼaē ʼe teuteu anai ki te tau?” ko te fehuʼi ʼaia ʼa te ʼapositolo ko Paulo. (1 Ko. 14:8) Neʼe mālohi koa pea mo mātala te pāui ʼaē ke tou ʼolo ki te Fakatahi Faka Tisitilike “Tou Vikiviki Fakafiafia”? ʼE mahino ia. ‘Ko te Vikiviki fakafiafia kia Sehova ʼi te ʼaho fuli’ neʼe ko te logo fakatupu fiafia! Neʼe uga koa tokotou loto e te pāui ʼaia ke koutou gāue? ʼI te polokalama ʼo te fakatahi neʼe lahi ai te ʼu tupuʼaga ʼo tatatou fakavikiviki tuʼumaʼu ʼaē ki te Hau ʼo heʼegata, ko Sehova.—Pes. 35:27, 28.
2 Ko te lagi fakaofoofo ʼe ina fakahā te kolōlia ʼa Sehova ʼi “he ʼaho ki he tahi ʼaho.” (Pes. 19:1-3) Kapau ko te ʼu meʼa neʼe fakatupu ʼaē ʼe mole honatou ʼu leʼo, pea ʼe mole nātou gaūgaūe ʼe nātou fakavikiviki tuʼumaʼu ia Sehova, ʼe mole tonu koa la kia tatou ʼaē ko te hahaʼi popoto ke tou fakahake ʼatatou ʼu fakavikiviki kia te ia ʼi te temi fuli ʼo ʼuhiga mo tona ʼu kalitate ʼe mole hona tatau pea mo te ʼu meʼa ʼaē neʼe ina fakahoko? Ko ai ʼi tuʼa atu ʼo totatou Tupuʼaga taulekaleka ʼe tāu ke tou vikiviki fakafiafia ki ai?—Pes. 145:3, 7.
3 ʼI Te ʼAho Fuli: Neʼe tohi fēnei e te tagata fai pesalemo: “ ʼI te ʼaho fuli pe ke tou fakahā te logo lelei ʼo tana hāofaki. Koteʼuhi ko Sehova ʼe lahi pea ʼe maʼuhiga ʼaupito ke vikiʼi.” (Pes. 96:2, 4) ʼE faka ʼuhiga pe koa te faʼahi ʼaia ki te kau pionie? Kailoa! Ko te manatu ʼaia ʼe mole faka ʼuhiga koa la ke tou palalau ki te hahaʼi ʼo ʼuhiga mo Sehova ʼi te temi fuli, pea ʼi he faʼahi pe ʼe tou ʼi ai ʼe feala ke tou palalau ki te hahaʼi, ʼo feiā pe la mo te ʼu ʼaho ʼe mole tou kau ai ki te fai faka mafola ʼi te ʼu ʼapi? Ei! ʼE maʼuhiga ke tou vikiviki kia Sehova ʼi te ʼaho fuli pea mo tou fakahā ki niʼihi tana ʼu fakatuʼutuʼu ʼo ʼuhiga mo te fakamaʼuli. ʼE tonu ke ʼiloʼi e te hahaʼi ko Sehova ʼe ko te Hau Heʼegata pea neʼe Ina foaki ki tona ʼAlo ko Sesu Kilisito ʼaē kua ʼosi kolōlia te pule ki te mālama. Ko te ʼofa kia Sehova pea mo te hahaʼi ʼe ina uga anai tatou ke tou fakahā te logo ʼaia pea mo tana ʼu fakatuʼutuʼu ʼo ʼuhiga mo te hāofaki ʼi te potu fuli pe ʼe feala ke maʼu ai te hahaʼi.—Pes. 71:15.
4 ʼI te ʼaho fuli ʼo tona minisitelio ʼi te kele, neʼe tuku e Sesu Kilisito te faʼifaʼitaki lelei ʼo ʼuhiga mo tana vikiviki fakahāhā ia Sehova. Neʼe ina ʼui fēnei: “Tāmai, ʼe ʼau vikiviki kia te koe ia muʼa ʼo te hahaʼi, ʼAliki ʼo te lagi mo te kele.” (Mat. 11:25) ʼO mulimuli ki tana palalau, ʼi he faʼahi pe neʼe ʼi ai Sesu, neʼe ina vikiviki ia Sehova ia muʼa ʼo te hahaʼi. Pea ʼi te potu fuli pe neʼe fakatahi ai te hahaʼi tokolahi—ʼi te ʼu sinakoka, ʼi te fale lotu ʼi Selusalemi, ʼi he fuga moʼuga peʼe ʼi te matatai—neʼe ina vikiviki ia Sehova. Kapau ʼe tou mulimuli fakalelei ki te ʼu tafuga vaʼe ʼo Sesu, ʼaki tatatou taupau mālohi ʼi te ʼaho fuli tatatou gāue ki te hahaʼi moʼo vikiviki ʼo Sehova, ʼe tou maʼu anai te fiafia, mo te fīmālie.
5 Tou Tali Ia Te Pāui: ʼE koutou tali anai koa te pāui moʼo vikiviki fakahāhā ʼo Sehova ʼi te ʼaho fuli? Tou manatuʼi, ʼe mole tātāʼofi e te taʼu tatatou gāue. Ko te tohi ʼo Pesalemo 148:12 ʼe ina fakaafe te ʼu tagata tūpulaga, te ʼu taupoʼou, te ʼu tagata matutuʼa, pea mo te ʼu tamaliki tagata ke nātou vikiviki ia Sehova. Kau tūpulaga, ʼe koutou vikiviki anai koa ia Sehova ʼo koutou palalau ki tokotou ʼu kaugā ako pea mo tokotou ʼu faiako? Ia koutou hahaʼi lalahi, kua koutou palalau koa ki tokotou ʼu kaugā gāue ʼo ʼuhiga mo Sehova pea mo tana ʼu fakatuʼutuʼu, mokā ʼe ʼi ai he faigamālie ʼe feala ai hakotou palalau mo nātou? Ko tatou fuli ʼe tonu anai ke tou palalau ʼo ʼuhiga mo Sehova pea ke liliu te faʼahi ʼaia ko he koga tāfito ʼo tatatou maʼuli ohage ko tatatou mānava pea mo tatatou kai. Tatau aipe peʼe mole tokaga te hahaʼi ki te meʼa ʼaē ʼe tou fakahā age, ʼe ʼi ai te Tahi ʼe ina tokagaʼi te meʼa ʼe tou fai, pea ʼe ina fakapale anai tatou.—Mal. 3:16.
6 ʼI tatatou fakaōvi ki te fakaʼosi ʼo te tuʼu ʼaenī, ko te pāui ʼaenī ʼe hoko atu ʼo kaku ki te potu taupotu ʼo te kele: “Fakavikiviki ia Sehova, ia koutou hahaʼi!” (Pes. 106:1) ʼOfa pe ke mālohi tatatou kalaga fakavikiviki kia Sehova, ke ʼiloʼi e te hahaʼi fuli ko Ia ʼaē ko tona huafa ko Sehova, ʼe ko te Māʼoluga ʼAupito ʼi te kele katoa.—Pes. 83:18.