Koutou Taupau Maʼu Tokotou ʼAtamai Ki Te ʼu Meʼa ʼAē ʼo ʼOluga
1 Ko te alatike ʼo te sulunale The New York Times ʼo te ʼaho 31 ʼo Tesepeli 1994, neʼe ina ʼui fēnei ʼo ʼuhiga mo te ʼu hahaʼi ʼo totatou temi pea mo tanatou faʼahiga sio ki te ka haʼu: “ ʼE matataku te hahaʼi ʼo ʼuhiga mo te temi ka haʼu. ʼE nātou matataku ʼo ʼuhiga mo te gāue, mo te mahaki, mo te ʼu meʼa faka ekonomike, pea mo te ʼu agaaga ʼo te malamanei.” ʼE tou sio ʼi te faʼahi fuli ʼe mole he ʼamanaki ʼo ʼuhiga mo te maʼuli. ʼI totatou minisitelio ʼi totatou ʼuhiga kau Fakamoʼoni ʼa Sehova, ʼe tou felāveʼi ʼi te ʼaho fuli mo te ʼu hahaʼi ʼe felāveʼi mo te ʼu faʼahi ʼaia. Logope la ʼe tou felāveʼi mo te ʼu fihifihia pe ʼaia, ko tatatou tui pea mo tatatou falala ki te ʼu fakapapau moʼoni ʼa te Folafola ʼa te ʼAtua, ʼe ina faka fealagia ai kia tatou ke kehe ʼaupito tatatou faʼahiga sio ʼo ʼuhiga mo te maʼuli pea mo te ka haʼu ʼo te malamanei.—Is. 65:13, 14, 17.
2 Ko tatatou maʼu te manatu ʼaē ʼe lelei pea mo te ʼamanaki ʼaē ʼe moʼoni, ʼe uga ai te hahaʼi fakamalotoloto ke nātou fakalogo ki te logo ʼaē ʼe tou fakahā age kia nātou. Tokolahi te hahaʼi ʼaē ʼe mahahaki pea mo lotomamahi ʼe nātou maʼu he fīmālie ʼi tanatou palalau mo tatou. Ko ʼihi ʼe nātou tali ke nātou ako te Tohi-Tapu mo tatou, koteʼuhi ʼe nātou leleiʼia te ʼu meʼa ʼaē ʼe tou fakahā age kia nātou. Kae, ʼi ʼihi temi, ko te hahaʼi ʼe nātou ʼuluaki fakahā mai ʼonatou ʼu fihifihia. ʼI ʼihi temi, ʼe tou fakalogo ki te ʼu tuʼania takitokotahi ʼo te hahaʼi, kae ʼe mole tonu anai ke galo ia tatou tatatou fakatuʼutuʼu, ʼaē ko te akoʼi ʼo te hahaʼi ki te ʼu moʼoni ʼo te Folafola ʼa te ʼAtua, ʼaē ʼe ʼaoga kia nātou.
3 ʼE tou ʼoʼofa anai ki te hahaʼi ʼaē ʼe mafasia. Neʼe tuku mai e Sesu te faʼifaʼitaki lelei ʼi tana ʼui ʼaē ia Mateo 11:28: “Koutou ʼōmai kia te ʼau, ia koutou fuli ʼaē ʼe kinakina pea mo mafasia.” ʼE tou fia fakaloto mālohiʼi te hahaʼi ohage ko tona fai e Sesu. Kae, koutou fakatokagaʼi te fakaʼosi ʼo te vaega 28, neʼe ʼui fēnei e Sesu: “ ʼE ʼau fakafimālie anai koutou.” Ko te meʼa ʼaia ʼaē ʼe tonu ke tou fai. ʼE feala ke tou fai te faʼahi ʼaia ʼaki tatou fakahā te ʼu fakapapau fakaloto fīmālie ʼaē ʼi te Folafola ʼa te ʼAtua. Ko te fakalogo lelei kia ia ʼaē ʼe palalau mo tatou ʼe fakahā ʼaki ai tatatou tokaga pea mo tatatou fia tokoni, pea ʼe maʼuhiga ke tou fakahoko totatou maʼua ʼaē ko te faka mafola ʼo te logo lelei ʼo te Puleʼaga, moʼo tokoni ki niʼihi ke nātou ʼiloʼi ko te Puleʼaga ʼe ko te faitoʼo pe ʼaia e tahi ki te ʼu fihifihia fuli ʼo te malamanei.—Mat. 24:14.
4 ʼE mole ko tatou ko te ʼu tōketā ʼe faiva ʼaupito ʼi te fakamālōlō ʼo te hahaʼi. Kae, ohage ko tona fakamahino e te ʼapositolo ko Paulo ia 1 Timoteo 4:6, ʼe tou fai te minisitelio ʼe fakatafito ki te “akonaki ʼe lelei,” te ʼu akonaki ʼaē ʼe fakatafito ki te Folafola ʼa te ʼAtua. Ko nātou ʼaē ʼe ʼi ai tonatou ʼu fihifihia takitokotahi peʼe nātou lotomamahi, ʼe lagi ʼaoga anai ke fakaloto mālohiʼi nātou ke nātou falala kia Sehova. Tou ako ia nātou ke nātou “taupau maʼu tonatou ʼatamai ki te ʼu meʼa ʼaē ʼo ʼoluga”—te ʼu meʼa ʼaē ʼe pipiki ki te ʼamanaki ʼo te Puleʼaga. (Kol. 3:2) Kapau ʼe tokakaga te hahaʼi ki te Folafola ʼa te ʼAtua, ʼe feala ke nātou tuputupu ʼuhi ko te gāue mālohi ʼa te Tohi-Tapu ʼi tonatou maʼuli.—Hep. 4:12.
5 Koia ko tatatou fakatuʼutuʼu, ko te tokoni ki te hahaʼi ke nātou tokagaʼi te ʼu meʼa ʼaē ʼe ‘totonu, te ʼu meʼa ʼe maʼa, te ʼu meʼa ʼe tonu ke fakavikiviki, te ʼu meʼa ʼe lelei hona talanoaʼi.’ (Filp. 4:8) Kapau ʼe nātou haga tokaga ki te ʼamanaki ʼo te Puleʼaga, ʼe nātou maʼu anai mo nātou te ʼu tapuakina ohage pe ko tatou. ʼE nātou maʼu anai te fiafia ʼi tanatou ʼiloʼi ʼaē ʼe haga ia Sehova ʼo fakatokatoka tonatou ʼu fihifihia fuli, ʼaki tona Puleʼaga.—Pes. 145:16.