Ko Te Polokalama Foʼou ʼo Te Fakatahi Makehe ʼAē ʼe ʼAho Tahi

“Tou Fai Ia Meʼa Fuli ʼUhi Ko Te Logo Lelei,” ko te kupu tāfito ʼaia ʼo te polokalama foʼou ʼo te fakatahi makehe ʼaē ʼe ʼaho tahi ʼe kamata anai ʼi Sepetepeli. (1 Ko. 9:​23) Ko te logo lelei ʼo te Puleʼaga ʼe ko te logo maʼuhiga ʼaupito ʼaia ke fakahā ia ʼaho nei. ʼE tokoni anai te polokalama kia tatou ke tou leleiʼia te pilivilesio makehe ʼaia ʼe tou maʼu ʼaē ko te ʼave ʼo te logo taulekaleka ʼaia. ʼE ina toe uga tatou ke mole tuku tatatou tala te logo lelei.​—Gāue 5:⁠42.

ʼE fakahā mai anai e te polokalama kia tatou peʼe feafeaʼi te fakaʼaogaʼi lelei ʼo tatatou ako faka teokalatike ke lahi ai hatatou gāue ʼi te minisitelio. ʼE tou fagono anai ki niʼihi neʼe nātou fai he ʼu fetogi moʼo fakalahi ʼo tanatou gāue, ʼo kau ai mo te kau tūpulaga ʼaē ʼe lahi tanatou foaki ki te logo lelei.​—Vakaʼi ia Filipe 2:​22.

Ko te akonaki tāfito, ʼe fai anai e he tēhina ʼo ina faka maʼuhigaʼi te ʼaoga ʼaē ke tou “tāu mo te maʼua ʼaē ʼo ʼuhiga mo te logo lelei ʼaē neʼe foaki mai.” (1 Tes. 2:4) ʼE tokoni anai te akonaki ʼaia kia tatou ke tou tokagaʼi kapau ʼe tou maʼu te pilivilesio ʼaē ko te fakahā ʼo te logo lelei ki te hahaʼi, ʼe tonu ke tou tāu tuʼumaʼu mo te ʼu fakatotonu pea mo te ʼu lekula ʼa te ʼAtua ʼi tatatou fakakaukau pea mo tatatou aga. Ko te ʼu tapuakina ʼe tou maʼu ʼi tatatou fai te faʼahi ʼaia ʼe maʼuhiga ʼaupito anai.

Ke ʼaua naʼa galo kia tatou te polokalama maʼuhiga ʼaia. Ko nātou ʼaē neʼe hoki foaki tonatou maʼuli ki te ʼAtua, ʼaē ʼe fia papitema anai ʼi te fakatahi makehe ʼaia ʼe ʼaho tahi, ʼe tonu anai ke nātou foimo fakahā ki te tagata taupau pelesita. Fakaafe ia nātou fuli ʼaē ʼe ako mo koutou ke nātou kau ki te fakatahi ʼaia. Tou faka fealagia kia Sehova ke ina fakamālohiʼi tatou ke tou fai ia meʼa fuli ʼuhi ko te logo lelei, pea ke tou fakahoko he gāue lahi ʼi muʼa ʼo te hoko mai ʼo Halamaketone.