Tou Fakahā Te ʼAtamai Mālama ʼAē ʼe Ina Taki Ki Te Maʼuli Heʼegata
1 Neʼe ʼui e Sesu ʼi te faikole ki tana Tāmai: “Ko te faka ʼuhiga ʼaenī ʼo te maʼuli heʼegata: ke nātou ako te ʼiloʼi, ʼo koe, ʼaē ko te ʼAtua moʼoni pe e tahi.” (Soane 17:3) ʼE ko he meʼa ʼofa lahi ia! Ka tou fakaʼaogaʼi te tohi Te ʼAtamai Mālama ʼAē ʼe Ina Taki Ki Te Maʼuli Heʼegata, ʼe feala ke tou tokoni ki te hahaʼi ke nātou ako pe koteā te ʼu meʼa ʼaē ʼe tonu ke nātou fai moʼo maʼu te maʼuli heʼegata. Ko te tohi Te ʼAtamai Mālama ʼe matala lelei pea ʼe totonu tana ʼu manatu, pea ʼe tokoni anai ki te hahaʼi ke nātou mahino ki te meʼa ʼaē ʼe akoʼi age e Sehova kia nātou. ʼI te māhina ʼaenī ʼe tou fia palalau mo te hahaʼi ʼo tou faigaʼi ke nātou fia lau te tohi. Koʼeni te ʼu faʼahiga manatu ʼe tokoni anai kia koutou. ʼAua naʼa koutou faigaʼi ke koutou fakamaʼumaʼu loto te ʼu faʼifaʼitaki ʼaenī, kae ke koutou faiga ke koutou fakahā te ʼu manatu tāfito ʼaia ʼi takotou ʼu faʼahiga palalau pea ke koutou palalau ohage ko takotou palalau māhani.
2 ʼE feala hakotou fakaʼaogaʼi he faʼifaʼitaki ʼe hā ai ko te Tohi-Tapu ʼe ko he matapuna lelei ʼo te takitaki, ʼo koutou ʼui fēnei:
◼ “ ʼE mātou palalau mo ʼomātou ʼu vāhaʼa fale pe kofea ʼaē ʼe feala ke maʼu ai he matapuna lelei ʼo te takitaki moʼo fakatokatoka te ʼu fihifihia ʼo te maʼuli. ʼI te temi muʼa neʼe vakaʼi tāfito e te hahaʼi te Tohi-Tapu. Kae ia ʼaho nei ʼe mole kei tatau; ko te tokolahi ʼe mole nātou falala ki te Tohi-Tapu, heʼe ʼi tanatou manatu ko he tohi neʼe fai pe ia e te tagata. Koteā tau manatu? [Koutou tuku ke ina fai atu hana tali.] ʼE ʼi ai te tupuʼaga ʼe lelei ʼaupito ke ʼui ai ko te Tohi-Tapu ʼe ʼaoga ki totatou temi. [Lau ia 2 Timoteo 3:16, 17.] Ko te ʼu pelesepeto ʼo te Tohi-Tapu ʼe maʼuhiga ʼi te temi nei ohage pe ko te temi ʼaē neʼe tohi ai ʼaki te laumālie ʼo te ʼAtua.” Tou fuli age ki te pasina 16 ʼo te tohi Te ʼAtamai Mālama, mo palalau fakanounou ʼo ʼuhiga mo te takitaki lelei ʼaē ʼe maʼu ʼi te Akonaki ʼaē neʼe fai e Sesu ʼi te Moʼuga. Tou lau te talanoa ʼo te palakalafe 11 peʼe ko te 13. Tou tuku age te tohi pea mo fakatuʼutuʼu ke koutou toe liliu ʼo tali ki te fehuʼi ʼaenī, ʼE lava feafeaʼi ke tou maʼu takitokotahi he ʼu fua lelei mai te ʼatamai mālama ʼaē ʼe maʼu ʼi te Tohi-Tapu?
3 Ki te hahaʼi ʼaē neʼe fia logo ki te Tohi-Tapu ohage ko he takitaki ʼe ʼaoga, ʼe feala ke tou liliu kia nātou ʼo fakaafe ke fai hanatou ako, ʼo ʼui fēnei age:
◼ “ ʼI taku haʼu fakamuli, neʼe tā palalau pe koʼe ʼe feala ke tou falala ko te Tohi-Tapu ʼe ko he matapuna ʼo te takitaki lelei. Koteʼuhi ʼe haʼu mai te ʼAtua, ʼe feala foki ke tou maʼu te fakafimālie mo te ʼamanaki ʼi te Tohi-Tapu, ohage ko te meʼa ʼaē neʼe ʼui e te tahi ʼo te ʼu ʼapositolo ʼo Kilisito. [Lau ia Loma 15:4.] ʼI te fakaʼosi ʼo tatā ʼuluaki fai palalau, neʼe ʼau fai te fehuʼi ʼaenī, ʼE lava feafeaʼi ke tou maʼu he ʼu fua lelei ʼaki te ʼatamai mālama ʼaē ʼe maʼu ʼi te Tohi-Tapu?” Lau te palakalafe 18 ʼi te pasina 11 ʼo te tohi Te ʼAtamai Mālama. Koutou fakatokagaʼi ko te kau Fakamoʼoni ʼa Sehova ʼe nātou fai te ʼu ako mo te ʼu hahaʼi ʼe lauʼi nima miliona ʼi te malamanei katoa, ʼo tokoni kia nātou ke nātou maʼu te ʼatamai mālama ʼaē ʼe ina taki ki te maʼuli heʼegata. Koutou fakahā fakanounou peʼe feala feafeaʼi ke fai te ako pea mo fakaʼaogaʼi te ʼu ʼuluaki palakalafe e nima ʼi te kapite 1.
4 Mai tona ʼaluʼaga ʼaē ʼe lahi te hahaʼi kua mate he tahi neʼe nātou ʼofa mamahi ai, koia ʼe feala ke koutou talanoa ki te ʼamanaki ʼo ʼuhiga mo te fakatuʼuake ʼo koutou fakaʼaogaʼi te ʼuluaki faʼifaʼitaki ʼaenī:
◼ “Tokolahi ia tatou kua mate he tahi neʼe tou ʼoʼofa mamahi ai. Neʼe kua ke ʼeke koa peʼe feala hau toe sio anai kia nātou ʼaia ʼi he ʼaho? [Tuku ke fai mai hana tali.] Ko te mate neʼe mole kau ia ki te fakatuʼutuʼu ʼa te ʼAtua ʼo ʼuhiga mo te tagata. Neʼe fakamoʼoni e Sesu ko tatatou ʼu hahaʼi ʼaē kua mamate, ʼe feala ke nātou toe tutuʼuake mai te mate. [Lau ia Soane 11:11, 25, 44.] Logope la neʼe fai te ʼu palalau ʼaia kua hili kiai ni ʼu sēkulō, kae ʼe hā ai te meʼa ʼaē neʼe fakapapau e te ʼAtua, ka ina fai anai maʼa tatou. [Avahi te tohi Te ʼAtamai Mālama ʼi te paki ʼo te pasina 85 pea lau te talanoa ʼaē ʼe tuʼu ʼi te paki. ʼOsi ʼaia pea koutou fakahā age te paki ʼo te pasina 86 pea koutou fakamahino age te paki ʼaia.] Kapau ʼe ke fia ʼiloʼi he tahi ʼu manatu ʼo ʼuhiga mo te ʼamanaki fakaloto mālohi ʼaia ʼo te fakatuʼuake, ʼe ʼau tuku atu anai te tohi ʼaenī ke ke lau, ko tona totogi fakaʼofa ko te 150.”
5 ʼI te hili ʼo takotou ʼuluaki fai palalau ʼo ʼuhiga mo te ʼamanaki ʼo te fakatuʼuake, ʼe lagi feala ke kamata fēnei takotou fai palalau mo ia pe ʼaia ʼi hakotou tahi ʼaʼahi:
◼ “ ʼE lagi kei ke manatuʼi taku ʼui atu ʼaē ko te mate neʼe mole kau ia ʼi te fakatuʼutuʼu ʼa te ʼAtua ʼo ʼuhiga mo te tagata. Kapau ʼe moʼoni te faʼahi ʼaia, he koʼe koa ʼe tou matutuʼa pea mo tou mamate? ʼE maʼuli te tahi ʼu fonu ia taʼu e 100 tupu, pea ʼe ʼi ai te ʼu fuʼu ʼakau ʼe maʼuli ia taʼu ʼe lauʼi afe. He koʼe ʼe gata pe te maʼuli ʼo te tagata ia taʼu e 70 peʼe ko taʼu e 80? [Tuku ke fai mai hana tali.] ʼE tou mamate ʼuhi ko te talagataʼa ʼa te ʼuluaki taumatuʼa ki te ʼAtua.” Lau ia Loma 5:12. Tou fuli ake te pasina 53 ʼi te tohi Te ʼAtamai Mālama pea tou lau te kupu tāfito ʼo te kapite. Tou vakaʼi te ʼu ʼuluaki palakalafe e tolu, ʼo tou faka maʼuhigaʼi te ʼu tali ki te ʼu fehuʼi ʼaē ʼe tuʼu ʼi ai. Tou fai he fakatuʼutuʼu ke tou toe liliu mai ʼo hoko atu te fai palalau ʼo ʼuhiga mo te tahi ʼu manatu ʼo te kapite. Tou fakaloto mālohiʼi ia ia ke ina lau fuli te tohi.
6 Mai tona ʼuhiga ʼaē ʼe foʼou ki te tokolahi te manatu ʼo ʼuhiga mo te maʼuli heʼegata ʼi te kele, koia ko te ʼuluaki palalau ʼaenī ʼe feala ke uga ai tanatou fia logo:
◼ “ ʼE mātou fai te fehuʼi ʼaenī ki ʼomātou vāhaʼa fale. Kapau neʼe fakaafe koe ke ke maʼuli ʼo heʼegata ʼi he mālama ohage ko te mālama ʼaenī, ʼe ke tali anai koa te fakaafe ʼaia? [Fakahā age te paki ʼo te pasina 4 ki te 5 ʼi te tohi Te ʼAtamai Mālama. Tuku ke fai atu hana tali.] Ko te faʼahi ʼaenī ʼe feala ke hoko moʼoni kia koe. Kae ʼi tau manatu, koteā te meʼa ʼaē ʼe tonu ke ke fai ke hoko moʼoni te faʼahi ʼaenī kia koe? [Tuku ke fai atu hana tali.] Fakatokagaʼi te meʼa ʼaē ʼe fakamaʼuaʼi mai ia Soane 17:3. [Lau.] Ko te tohi ʼaenī ʼe tokoni ki te tokolahi ke nātou maʼu te faʼahiga ʼatamai mālama ʼaenī pea ʼe ʼau fia tuku atu te tohi ki te 150. ʼE ke fia fai koa ki hau tohi ke ke lau? [Tuku ke fai atu hana tali.] ʼI taku toe liliu mai, ʼe feala ke tā talanoa fakatahi pe koʼe ʼe fakapotopoto te manatu ʼaē, ʼe feala hatatou maʼu te maʼuli heʼegata ʼi te kele.”
7 Ko te fakaʼaogaʼi fakalelei ʼo te tohi Te ʼAtamai Mālama, ʼe ina faka fealagia anai kia tatou ke tou faka mafola te ʼatamai mālama totonu ke maʼu e te hahaʼi he ʼu tapuakina. (Taag. 15:7) Ko nātou ʼaē ʼe loto faitotonu, ʼe nātou maʼu anai te fiafia lahi pea mo fakaloto mālohiʼi anai ia nātou ke nātou mulimuli ki te faitotonu ʼa Sehova. Ki muli age, ko te fai ʼo te faʼahi ʼaia ʼe ina taki anai nātou ki te maʼuli heʼegata.