Koteā Te Meʼa ʼe ʼAu Talanoa Anai Kiai?

Mokā tou felāveʼi mo ni hahaʼi ʼi te minisitelio ʼe nātou tali fakalelei te moʼoni, ʼe tou loto ke tou toe liliu ʼo fakahā kia nātou ia te moʼoni. Kae ʼi te ʼaʼahi ʼaē ka tou fai, ʼe mole lagi tou ʼiloʼi papau pe koteā te ʼu ­palalau ʼaē ʼe tonu ke tou fai ke hoko ai he fai palalau. ʼE feala hakotou ʼahiʼahi te faʼahiga fai ʼaenī: Koutou lagaʼi he fehuʼi maʼuhiga, pea koutou fuli age te tohi Comment raisonner ʼo fakahā age te tali ʼa te Tohi-Tapu. ʼE lelei ke ʼi ai hakotou lisi ʼe tuʼu ai he ʼu ­fehuʼi, pea koutou filifili te fehuʼi ʼaē ʼe lelei anai moʼo fai ʼaki takotou ʼaʼahi. Ko te lisi ʼaē ʼe tuʼu ʼi lalo, ʼe tuʼu ʼi te tohi Comment raisonner, pea ʼe fakahā ai te numelo ʼo te ­pasina ʼaē ʼe tuʼu ai te ʼu tali:

◼ ʼE tonu koa ke tou ʼolo ki selo ke tou maʼu ai te fiafia moʼoni? (62)

◼ ʼE ʼi ai koa he ʼu tupuʼaga lelei ʼo tatatou tui ʼaē ki te ʼAtua? (106)

◼ ʼE tokaga moʼoni koa te ʼAtua ki te ʼu meʼa ʼaē ʼe hoko kia tatou? (107)

◼ He koʼe ʼe maʼuhiga ke tou ʼiloʼi pea mo tou fakaʼaogaʼi te huafa totonu ʼo te ʼAtua? (200)

◼ He koʼe ʼe lahi ʼaupito te agakovi? (237)

◼ He koʼe ʼe tou matutuʼa pea mo tou mamate? (253)

◼ He koʼe ʼe lahi ʼaupito te ʼu lotu? (310)

◼ ʼE lava ʼiloʼi feafeaʼi e he tahi ia te lotu moʼoni? (316)

◼ Koteā anai te ʼu meʼa ʼaē ka fakahoko e te Puleʼaga ʼo te ʼAtua? (336)

◼ ʼE lahi feafeaʼi te mālohi ʼo Satana ʼi te mālama ʼaenī? (368)

◼ He koʼe ʼe fakagafua e te ʼAtua ia te mamahi? (375)

◼ Koteā te fakatuʼutuʼu ki te maʼuli ʼo te tagata? (434)

ʼE feala ke koutou ʼai te lisi ʼo te ʼu fehuʼi ʼaia ki takotou Tohi-Tapu peʼe ki te tohi Comment raisonner. Kapau kua koutou ʼiloʼi lelei te ʼu meʼa ʼaē ka koutou talanoa kiai ʼi takotou ʼu ʼaʼahi, pea ʼe ko he fakaloto mālohi anai kia koutou, ke koutou fakahoko lelei te ʼaʼahi ʼo nātou ʼaē neʼe fia logo.