Ko Te Kau Fakamoʼoni ʼa Sehova: Ko Te Kau Fai Faka Mafola Evaselio Moʼoni
1 Neʼe fakamaʼua e Sesu Kilisito ki tana kau tisipulo fuli ke nātou fai faka mafola evaselio, ʼo ina fakatotonu tāfito kia nātou ke nātou fakahā te logo lelei ʼo te Puleʼaga. (Mat. 24:14; Gāue 10:42) Neʼe tuku mai e tana ʼu ʼuluaki tisipulo he faʼifaʼitaki lelei ʼo ʼuhiga mo te faʼahi ʼaia, ʼi tanatou kalagaʼi tuʼumaʼu te Puleʼaga—ʼo mole nātou fai pe ʼi te ʼu potu ʼaē neʼe nātou maʼopoʼopo ai, kae neʼe nātou toe fai pe foki ʼi te ʼu potu fuli ʼaē neʼe nātou felāveʼi ai mo te hahaʼi pea mo tanatou ʼolo ʼi te ʼu ʼapi. (Gāue 5:42; 20:20) ʼI totatou ʼuhiga kau Fakamoʼoni ʼa Sehova ʼo te temi ʼaenī, kua tou fakahā ko tatou ko te kau fai faka mafola evaselio Kilisitiano moʼoni, heʼe tou faka mafola te logo ʼo te Puleʼaga ʼi te ʼu fenua e 232, pea kua papitema te kau tisipulo foʼou e tahi miliona tupu ʼi te ʼu taʼu e tolu ʼaenī kua hili! He koʼe neʼe fua lelei tatatou gāue fai faka mafola evaselio?
2 ʼE Tou Fiafia ʼAupito ʼUhi Ko Te Logo Lelei: Ko te kau fai faka mafola evaselio ʼe ko he kau fai faka mafola, peʼe ko he kau ʼave logo ʼo te logo lelei. ʼI totatou ʼuhiga ʼaia, ʼe tou maʼu te pilivilesio fakafiafia ʼaē ko te kalagaʼi ʼo te Puleʼaga ʼo Sehova—te logo lelei moʼoni pe ʼaia e tahi ʼaē ʼe feala ke foaki ki te hahaʼi ʼo te malamanei ʼaē ʼe mamahi. ʼE tou fiafia ʼi tatatou kua mālama lelei ki te ʼu lagi foʼou ʼaē ka ina takitaki ʼaki te faitotonu te kele foʼou, ʼaē ka faʼufaʼu anai e te ʼu hahaʼi agatonu ʼaē ka maʼuʼuli ʼi te Palatiso ʼaē kua vave hoko mai. (2 Pet. 3:13, 17) Ko tatou pe ʼaē ʼe tou maʼu te ʼamanaki ʼaia, pea ʼe tou holi mālohi ke tou fakahā ki ʼihi.
3 ʼE Uga Tatou e Te ʼOfa Moʼoni: Ko te fai faka mafola evaselio ʼe ko he gāue ʼe ina hāofaki te maʼuli ʼa te hahaʼi. (Loma 1:16) Ko te tupuʼaga la ʼaia ʼo tatatou fiafia lahi ʼi tatatou faka mafola te logo ʼo te Puleʼaga. ʼI totatou ʼuhiga kau fai faka mafola evaselio moʼoni, ʼe tou ʼoʼofa ki te hahaʼi, ʼo uga ai tatou ke tou fakahā te logo lelei kia nātou—ki totatou ʼu famili, mo totatou ʼu vāhaʼa fale, mo nātou ʼaē ʼe tou feʼiloʼiʼaki mo nātou, pea mo nātou fuli ʼaē ʼe feala ke tou felāveʼi mo nātou. Ko te fai ʼo te gāue ʼaia ʼaki totatou nefesi katoa, ʼe ko te fakahā lelei ʼaia ʼo totatou ʼofa moʼoni ki te hahaʼi.—1 Tes. 2:8.
4 ʼE Lagolago Te Laumālie ʼo Te ʼAtua Kia Tatou: ʼE fakapapau mai e te Folafola ʼa te ʼAtua, ka tou fai tatatou gāue ʼaē ko te to pea mo te fakavai ʼo te pulapula ʼo te Puleʼaga, pea ʼe ko Sehova ʼaē ʼe ina “fakatuputupu.” ʼE ko te meʼa ʼaia ʼaē ʼe hoko ʼi tatatou kautahi ia ʼaho nei. (1 Kol. 3:5-7) ʼE ko te laumālie ʼo te ʼAtua ʼaē ʼe lagolago kia tatou ʼi tatatou gāue fai faka mafola evaselio, ʼo ina fai ke fua lelei.—Soele 2:28, 29.
5 ʼO mulimuli ki te fakaloto mālohi ʼaē ia 2 Timoteo 4:5 ke tou “fai te gāue ʼa te tagata fai faka mafola evaselio,” ʼofa pe ke uga tatou e totatou ʼofa ki te hahaʼi fuli ke tou fakahā te logo lelei ʼo te Puleʼaga ʼi te ʼu lakaga fuli pe, ʼo tou falala ʼe tapuakinaʼi tuʼumaʼu pe anai e Sehova tatatou gāue.