Ko He ʼu Nusipepa ʼe Nātou Kalagaʼi Te Puleʼaga
1 ʼI totatou ʼuhiga kau Fakamoʼoni ʼa Sehova, ʼe ʼiloʼi lelei tatou e te hahaʼi ʼuhi ko tatatou faiva ʼi te faka mafola ʼo te Puleʼaga ʼo te ʼAtua. Ko te ʼu nusipepa ko Te Tule Leʼo pea mo te Réveillez-vous! ʼaē ʼe tou tufa, ʼe ʼaoga ʼaupito moʼo tokoni ki te toko lauʼi miliona hahaʼi ke nātou ako te ʼu fakatuʼutuʼu ʼa te ʼAtua. Ko te logo ʼaē ʼe maʼu ʼi te ʼu nusipepa ʼaia, ʼe ko he logo lelei, heʼe ina kalagaʼi ko te Puleʼaga ʼo te ʼAtua ʼe ko te ʼamanaki pe ʼaia e tahi maʼa te malamanei.
2 ʼE talanoa te ʼu nusipepa ki te ʼu meʼa ʼaē ʼe ʼaoga moʼoni ki te hahaʼi—ʼi te faʼahi ʼo te ʼu meʼa ʼaē ʼe nātou logoʼi ʼi tonatou loto, mo te faʼahi faka sosiale, pea mo te faʼahi fakalaumālie. ʼI te potu fuli pe, ʼe mole kei lelei ai te aga ʼa te hahaʼi pea mo te ʼu felogoi faka famili, koia ʼe tokoni ai Te Tule Leʼo pea mo te Réveillez-vous! ki te hahaʼi ke lelei age te ʼaluʼaga ʼo tonatou maʼuli, ʼo fakahā age e te ʼu nusipepa ʼaia peʼe feafeaʼi te maʼuliʼi ʼo te ʼu pelesepeto ʼo te Tohi-Tapu. ʼE ko he meʼa fakafiafia hatatou fakahā te ʼu nusipepa pea mo te apone lolotoga te ʼu māhina ʼo ʼApelili pea mo Maio.
3 ʼE Maʼu Ai Te ʼu Meʼa ʼe Fia ʼIloʼi e Te Hahaʼi: ʼE teitei ke maʼu Te Tule Leʼo pea mo te Réveillez-vous! ʼi te ʼu lea ʼo te hahaʼi ʼo te malamanei katoa. Ko te tupuʼaga la ʼaia ʼo te ʼiloʼi lelei e te hahaʼi tatatou ʼu nusipepa. Koʼeni te ʼu tupuʼaga ʼo te fia lau e te hahaʼi te ʼu nusipepa ʼaia:
◼ Ko te ʼu nusipepa ʼaia ʼe fakahagatonu pea mo talanoa ki te moʼoni, ʼe fakahā lelei ai te kehekehe ʼo te meʼa ʼaē ʼe lelei mo te meʼa ʼaē ʼe kovi.
◼ ʼE tuku mai ai te ʼamanaki ʼo he palatiso faitotonu ʼi te ka haʼu, pea ʼe fakatafito ki te fakapapau ʼa te ʼAtua ke ina takitaki te kele ʼaki tona Puleʼaga.
◼ ʼE fakamatala ai te ʼu faʼahi kehekehe ʼe ʼaoga moʼoni ki totatou temi, pea ʼe leleiʼia e te ʼu hahaʼi ʼo te ʼu fenua pea mo te ʼu agaʼi fenua kehekehe.
◼ ʼE nounou te ʼu alatike pea ʼe lahi te ʼu meʼa ʼaē ʼe tou ako ai. ʼE mole fakapalatahi pea ʼe mole maʼu ai he ʼu manatu fakamālama.
◼ Ko te ʼu paki matalelei ʼaē ʼe maʼu ai ʼe ina uga atu aipe te fia lau ʼa te hahaʼi, pea ʼe lau gafua te ʼu nusipepa ʼaia, heʼe mole faigataʼa tona faʼahiga tohi.
4 Koutou Tufa Lahi Te ʼu Nusipepa: ʼE fakalogo tāfito te lelei ʼo tatatou tufa te ʼu nusipepa ki te teuteuʼi lelei ʼo totatou ʼu palalau, mo te fakatuʼutuʼu ʼo totatou temi, pea mo te fakatuʼutuʼu ʼo tatatou gāue fai faka mafola. Neʼe foaki te ʼu tokoni ʼaoga ʼi Te Minisitelio ʼo Te Puleʼaga ʼo Sepetepeli 1995 pea mo ʼOketopeli 1996, pea ʼe lelei anai ke tou toe vakaʼi pea mo fakaʼaogaʼi.
5 Koutou Fakamāmāhani Mo Te ʼu Nusipepa: ʼI takotou lau he nusipepa, koutou fakakaukau pe ko ai ʼaē ka ina fia lau anai te nusipepa ʼaia. Koutou kumi he ʼu puani tāfito peʼe ko he ʼu vaega ʼe feala ke koutou fakaʼaogaʼi ʼi takotou fai palalau. Koutou fakakaukauʼi he fehuʼi ʼe feala ke koutou fai moʼo kamata ʼaki te fai palalau pea mo uga he tahi ke ina fia ʼiloʼi te faʼahi ʼaia.
6 Koutou Faka ʼAlutahi Mo Te Meʼa ʼAē ʼe ʼAoga Ki Te Hahaʼi: Koutou teuteuʼi he ʼu palalau ʼe faigafua pea ke feala ke fetogi mo kapau ʼe ko he tagata, pe ko he fafine, pe ko he tahi kua matuʼa, pe ko he tūpulaga, pe ko he tahi ʼe koutou ʼiloʼi lelei peʼe kailoa.
7 Koutou ʼAve Tuʼumaʼu Mo Koutou He ʼu Tule Leʼo Pea Mo He ʼu Réveillez-vous! : Mai tona ʼaluʼaga ʼaē ʼe faigafua te ʼai ʼo te ʼu nusipepa ʼaia ki te kato, peʼe ki te tagaʼi kofu, koia ʼe feala ke tou ʼave mo tatou he ʼu nusipepa mokā tou folau peʼe tou fai fakatau. Koutou tufa mokā koutou fai palalau mo takotou famili, pe ko takotou ʼu vāhaʼa fale, takotou ʼu kaugā gāue, takotou ʼu kaugā ako, peʼe ko te hahaʼi faiako. Koutou fakaʼaogaʼi he ʼaho ʼi te ʼu vāhaʼa fuli, moʼo tufa te ʼu nusipepa.
8 Koutou Fakahā Takotou Leleiʼia Ia Te ʼu Nusipepa: ʼE mole he temi ʼe puli ai te maʼuhiga ʼo te ʼu nusipepa ʼaia. Kapau kua ʼāfea, pea ʼe mole faka ʼuhiga leva ʼe mole kei maʼuhiga te ʼu alatike ʼaē ʼe tuʼu ʼi ai. ʼE mahino ia, kapau ʼe tou faiga ke tou tufa tatatou ʼu nusipepa fuli, pea ʼe mole tapuke anai tatatou ʼu nusipepa ʼāfea ʼi totatou puha.
9 ʼE Fua Lelei Te Fagonogono Faigamālie: ʼE ko he faʼahi lelei, ke lahi ai te tufa ʼo te ʼu nusipepa ki te hahaʼi. Ko ʼihi kaugā fai faka mafola ʼe nātou gāue tuʼumaʼu ʼi te ʼu ala ʼaē ʼe tokolahi ai te hahaʼi, ʼi te ʼu ʼaho ʼaē ʼe nātou fai fakatau.
10 ʼE Maʼu Te ʼu Fua ʼo Te Fai Faka Mafola ʼi Te ʼu Fale Koloā: ʼI te ʼu fale koloā, ʼe tou maʼu tuʼumaʼu te hahaʼi. ʼI te agamāhani ʼe agalelei te ʼu hahaʼi gāue koloā, pea ko te tokolahi ʼe nātou tali lelei te ʼu nusipepa. Tou teuteuʼi te ʼu alatike ʼaē ʼe ʼaoga ki te ʼu hahaʼi gāue koloā ʼaē ka tou palalau kiai.
11 ʼE Feala Ke Tou Kamata He ʼu Ako Mo Nātou ʼAē ʼe Nātou Toʼo Tuʼumaʼu Te ʼu Nusipepa: Mai tona ʼaluʼaga ʼaē ʼe maʼu tuʼa lua te ʼu nusipepa ʼi te māhina, koia ʼe tonu ai ke tou toe liliu ʼo ʼaʼahi te hahaʼi ʼaē ʼe nātou lau te ʼu nusipepa ʼaia, pea mo fakahā te ʼu nusipepa foʼou. ʼE tonu ke tou fai tuʼumaʼu te ʼu ʼaʼahi, ʼo mole fai pe moʼo tuku he ʼu nusipepa, kae moʼo fakatuputupu ʼi te hahaʼi tanatou fia ʼiloʼi te Tohi-Tapu. Ko nātou ʼaē ʼe nātou toʼo tuʼumaʼu te ʼu nusipepa ʼe feala ke nātou liliu ko he ʼu ako Tohi-Tapu.
12 Koutou Faiga Mālohi ʼi ʼApelili Pea Mo Maio: Ko te toko lauʼi miliona hahaʼi lautohi ʼaē ʼe nātou leleiʼia Te Tule Leʼo pea mo te Réveillez-vous! pea mo falala kiai. ʼE ʼaoga te ʼu nusipepa ʼaia ʼi te tala ʼo te Puleʼaga, pea ʼe tonu ai ke tou ʼave he ʼu nusipepa mo tatou pea mo tou tufa ʼi te ʼu lakaga fuli pe. ʼOfa pe ke fua lelei tatatou tufa te ʼu nusipepa, tāfito ʼi te ʼu māhina ʼo ʼApelili pea mo Maio!