Te Tali Ki ʼAkotou ʼu Fehuʼi

◼ Koteā ʼaē ʼe feala ke tou fai moʼo hikihiki te lelei ʼo totatou ʼu fono?

ʼE feala ke manatu ʼihi ʼe fakalogo pe te lelei ʼo te ʼu fono ʼo te kokelekasio ki te kau tagata ʼāfea pea mo te kau tagata faifekau faka minisitelio, koteʼuhi ʼe ko nātou ʼaē ʼe nātou takitaki te ʼu fono ʼaia pea ʼe lahi te ʼu akonaki ʼaē ʼe nātou fai. ʼI tona ʼuhiga moʼoni, ko tatou fuli ʼe feala ke tou tokoni ki te lelei pea mo te ʼaoga ʼo te ʼu fono. ʼE feala ke tou hikihiki te lelei ʼo te ʼu fono mo kapau ʼe tou mulimuli ki te ʼu puani ʼaenī e hogofulu:

Tou teuteuʼi fakatomuʼa. Ka tou teuteuʼi lelei, pea ʼe tou tokakaga lelei ai ki te ʼu fono. Ka tou fai fuli te faʼahi ʼaia, pea ʼe liliu te ʼu fono ko he meʼa fakafiafia pea ʼe lahi age te ʼu meʼa ʼaē ʼe tou ako ai. Tou kau tuʼumaʼu kiai. Ka hahaʼi te ʼu fono, pea ʼe ko he meʼa fakaloto mālohi ʼaupito kia nātou ʼaē ʼe nātou kau kiai, ʼo toe fakamālohi ai tanatou mahino ki te maʼuhiga ʼo tanatou kau kiai. ʼAua naʼa tou ʼōmai tauhala. Kapau kua tou heheka ʼi muʼa ʼo te kamata ʼo te fono, pea ʼe feala ai ke tou kau ki te hiva ʼo te katiko ʼi te kamataʼaga pea mo te faikole, pea mo tou maʼu ai te ʼu fua lelei katoa ʼo te fono. Tou ʼaumai te ʼu tohi ka fakaʼaogaʼi. Kapau ʼe tou ʼaumai tatatou Tohi-Tapu pea mo te (ʼu) tohi ʼaē ka fakaʼaogaʼi lolotoga te fono, ʼe feala ai ke tou mulimuli pea mo mahino lelei age ki te ʼu akonaki ʼaē ka fai. ʼAua naʼa tuku he meʼa ke ina fakalelu tatou. ʼE feala ke tou fakalogo lelei mo kapau ʼe tou heheka ʼi muʼa. Ko te fai fanafana pea mo te tatuʼu ki te fale vao ʼe feala ai ke mole kei tou tokakaga ki te fono, ʼo feiā pea mo ʼihi. Tou fai hatatou ʼu tali. Kapau ʼe tou tokolahi ʼi te hiki ʼo totatou ʼu nima pea mo tou fai he ʼu tali, pea ʼe loto mālohiʼi ai te tokolahi ʼaki te fakahā ʼaia ʼo tatatou tui. Ke nounou tatatou ʼu tali. ʼE ina faka fealagia ai ki te tokolahi ke nātou fai hanatou tali. ʼE tonu ke faka tuʼakoi tatatou ʼu tali nounou ki te alatike ʼaē ʼe tou lolotoga ako. Tou fakahoko te ʼu meʼa ʼaē neʼe hinoʼi mai. ʼI takotou kau ki te Ako ʼo te Minisitelio Faka Teokalatike peʼe ʼi te Fono Gāue, koutou teuteuʼi lelei, ʼo fai liuliuga pea mo fakatomuʼa, pea koutou faiga ke koutou fakahoko te faʼahi ʼaia. Tou ʼui age neʼe lelei tanatou akonaki. Koutou fakahā age kia nātou ʼaia ʼe koutou leleiʼia tanatou ʼu faiga. ʼE fakaloto mālohi nātou e te faʼahi ʼaia pea mo uga nātou ke nātou fai ke toe lelei age. Tou fefakaloto mālohiʼaki. Ko he ʼu fakaʼalofa lelei pea mo he ʼu fai palalau fakaloto mālohi ʼi muʼa pea ʼi te ʼu ʼosi fono, ʼe toe ʼāsili ai te fiafia pea mo te ʼu fua lelei ʼaē ʼe tou maʼu ʼi tatatou kau ki te ʼu fono.