Koutou Akoʼi Niʼihi Ke ʼAoga Kia Nātou
1 ʼE loto e Sehova ke maʼuli lelei te hahaʼi fuli pe. (Isa. 48:17) ʼE ina ʼiloʼi te ʼu meʼa ʼaē ʼe tou fiafia moʼoni ai. ʼE ina loto moʼoni ke ʼaua naʼa hoko he malaʼia ki te hahaʼi, pea ke nātou maʼuli fiafia ʼo nātou fakalogo ki tana ʼu fakatotonu. ʼE lahi te ʼu tapuakina ʼaē ʼe tou maʼu mokā tou mulimuli ki te ʼu meʼa ʼaē ʼe fakamaʼua mai e te ʼAtua. (Pes. 34:8) ʼE tou lava tokoni feafeaʼi ki ʼihi ke nātou fai mo nātou te faʼahi ʼaia?
2 Koteā Te Meʼa ʼAē ʼe Fakaʼamu Kiai Te Hahaʼi? Koteā te meʼa ʼaē ʼe tuʼaniaʼi tāfito e te hahaʼi? ʼE ko te puipui koa ʼo tonatou ʼapi, pe ko te fakatologa ʼo tonatou ʼohoana, pe ko te ka haʼu ʼo tanatou fānau, pea mo te tahi ʼu fihifihia feiā? Ka nātou tau mo ni ʼu fihifihia, ʼe nātou kumi tokoni kia ai? ʼE lagi nātou faiga anai ke nātou fakatokatoka e nātou totonu te ʼu fihifihia ʼaia, peʼe nātou mulimuli anai ki he ʼu faʼahiga polokalama ʼe feala ke kita tauʼi ai e kita totonu tokita ʼu fihifihia, peʼe lagi nātou kumi tokoni anai ki te tahi ʼu hahaʼi. ʼI tanatou fai ia te faʼahi ʼaia, ʼe fakahēʼi te tokolahi ʼo te hahaʼi ʼuhi ko te ʼu tokoni heʼe fakapotopoto ʼaē ʼe fai age kia nātou ʼo ʼuhiga mo tonatou maʼuli. ʼE tonu ke tou fakalotoʼi nātou ke nātou tui, ʼe lelei age te takitaki ʼaē ʼe foaki mai e te Folafola ʼa te ʼAtua. (Pes. 119:98) ʼE tou fai anai te faʼahi ʼaia ʼo tou fakahā kia nātou, ʼe feala ke lelei age tonatou maʼuli ʼi te temi nei mo kapau ʼe nātou ako te Tohi-Tapu pea mo nātou maʼuliʼi.—2 Tim. 3:16, 17.
3 Ko He Maʼuli Faka Famili ʼe Lelei Age: ʼE tokosiʼi te hahaʼi ʼaē ʼe nātou mahino ki te maʼuhiga ʼo te pelesepeto fakaʼatua ʼaē ʼe tou maʼu ia Efeso 5:22–6:4, ʼo ʼuhiga mo te fakatokatoka ʼo te ʼu fihifihia faka famili. Neʼe hoko te faʼahi ʼaia ki te taumatuʼa neʼe nā fia mavete ʼi tanā ʼosi ʼohoana lolotoga taʼu e hogofulu. Kae neʼe kamata ako e te fafine ia te Tohi-Tapu, pea neʼe akoʼi kia ia te ʼu pelesepeto ʼa te Tohi-Tapu ʼo ʼuhiga mo te nofo faka taumatuʼa. Mole tuai, pea neʼe sio tona ʼohoana ki te ʼu fetogi ʼaē neʼe ina fai ʼi tana maʼuliʼi te ʼu pelesepeto ʼa te Tohi-Tapu, pea neʼe fia ako mo ia. Neʼe ina ʼui fēnei ki muli age: “Kua ma maʼu he tafitoʼaga ke fiafia moʼoni ai tomā maʼuli faka famili.”
4 Ko He Fakatuʼutuʼu Moʼoni Ki Tokita Maʼuli: Ko te tūpulaga neʼe toloke, pea neʼe kumi tokoni ki te kau Fakamoʼoni ʼa Sehova, pea neʼe fakahā age ki ai, ʼe tokaga Sehova kia tatou takitokotahi. Neʼe ina ʼui fēnei: “Neʼe ʼau ako ʼo ʼuhiga mo te Tupuʼaga, ʼe ʼi ai tana fakatuʼutuʼu ʼo ʼuhiga mo te tagata, pea ʼe ina foaki anai te maʼuli heʼegata kia nātou ʼaē ʼe ina leleiʼia. Neʼe ʼau fiafia ʼaupito ʼi taku ʼiloʼi ia te faʼahi ʼaia. ʼI te temi nei, kua lelei toku maʼuli fakasino, pea kua tokalelei toku ʼatamai, pea kua ʼau felogoi lelei mo te ʼAtua.”
5 ʼE feala ke ʼaoga ki te hahaʼi fuli te ʼu tokoni ʼa te Folafola ʼa te ʼAtua. ʼI tatatou fakaʼaogaʼi te Tohi-Tapu ke ina takitaki totatou maʼuli, ʼe tou fakahā ai ʼe lelei age te ala ʼa Sehova ʼi te ʼu ala ʼo te mālama. (Pes. 116:12) ʼE tou maʼu te pilivilesio ʼaē ke tou fakahā te logo ʼaia ki te hahaʼi, ʼo akoʼi nātou ke ʼaoga ki tonatou maʼuli. Kapau ʼe tou fai te faʼahi ʼaia, pea ʼe fua lelei anai kia tatou.