Tou Fakaʼapaʼapa ʼAupito Ki Te Huafa Taulekaleka ʼa Sehova
1 Neʼe ʼulihi e Satana te huafa ʼo te ʼAtua ʼi tana uga tatatou ʼu ʼuluaki mātuʼa ke nā agahala. Neʼe ʼui fakakākā e te Tevolo, ko te ʼAtua neʼe ina lohiʼi ia Atama. (Sen. 3:1-5) Mai tona ʼuhiga ʼaē ʼe hā ʼi te huafa ʼo te ʼAtua tana fealagia ʼaē ke ina fakahoko tana ʼu fakapapau, koia ko te ʼui ʼaia ʼa Satana neʼe ko he toe loi mamafa ia. ʼI tana fakahoko māmālie tana fakatuʼutuʼu fakaʼatua, neʼe fakamaʼoniʼoniʼi e Sehova tona huafa ke matalelei.—Isaia 63:12-14.
2 Ko tatou ko te hahaʼi ʼaē ‘kua fakatoo ki ai e Sehova tona Huafa.’ (Gaue 15:14, 17) ʼE ko he fealagia ʼaia ke tou fakahā ʼe tou kau mo tatou ki te fakamaʼoniʼoniʼi ʼo te huafa ʼaia. Kia tatou, ʼe taulekaleka te huafa ʼo Sehova, heʼe pipiki ia ki te meʼa ʼaē ʼe lelei, te agalelei, te ʼofa, te manavaʼofa, pea mo te faitotonu. ʼE tou manavasiʼi ki te ʼalikisia ʼo te huafa ʼo te ʼAtua. (Pes. 8:1; 99:3; 148:13) Koteā ʼaē ʼe uga ai tatou ke tou fai?
3 Tou Fakamaʼoniʼoniʼi Te Huafa ʼo Te ʼAtua: Kua maʼoniʼoni ʼaupito te huafa ʼo te ʼAtua, pea ʼe mole pe feala ke toe hikihiki tona ʼuhiga maʼoniʼoni ʼaia. Kae ʼaki tatatou ʼu aga ʼaē ʼe maʼa pea mo tatatou faka mafola ia te Puleʼaga, ʼe feala ke tou fakahā ai, ʼe maʼuhiga ʼaupito te huafa ʼo te ʼAtua. Tou kalagaʼi fēnei: “Koutou fakafetaʼi kia Sehova! Koutou fetapā ki tona huafa. Koutou fakaʼilo ki te hahaʼi tana ʼu faʼahiga aga. Koutou fakahā ʼe māʼoluga tona huafa.” (Isaia 12:4) ʼE lava feafeaʼi hatatou fai ia te faʼahi ʼaia?
4 ʼE feala ke tou fakaʼaogaʼi te ʼu faigamālie fuli ke tou kalagaʼi te huafa ʼo Sehova pea mo tou fakahā tona faka ʼuhiga. Tatau aipe peʼe fai ʼi te ʼu ʼapi peʼe ʼi te ʼu koloā, peʼe ʼi te ala peʼe ʼi te telefoni, kae ko tatatou gāue fai faka mafola ʼe ko he fakavikiviki ʼaia kia Sehova. Ka tou maʼu he ʼu hahaʼi ʼe fia logo, pea ʼe tonu ke tou felogoi lelei mo nātou ki he ʼaho ke tou toe ʼaʼahi ia nātou moʼo akoʼi age kia nātou te tahi ʼu meʼa ʼo ʼuhiga mo Sehova. ʼE tonu ai leva ke tou mulimuli ki te ʼaho ʼaē neʼe tou tuku ʼaki, pea ke tou faiga ke tou kamata he ʼu ako Tohi-Tapu. Meʼa fakafiafia foki, heʼe ʼi te taʼu fuli, ko te toko lauʼi teau afe ʼe nātou ako ke nātou ʼiloʼi, mo fakaʼapaʼapaʼi, pea mo fakamaʼoniʼoniʼi te huafa taulekaleka ʼo Sehova.
5 Ko tatatou kau mālohi ki te fakamaʼoniʼoniʼi ʼo te huafa ʼo te ʼAtua, ʼe ina fakahā anai pe koteā tatatou tali ki te fehuʼi ʼaē neʼe lagaʼi e Satana ʼi Eteni. ʼE mole he tahi gāue ʼe lelei age, pea mo fakaʼapaʼapaʼia ʼi te gāue ʼaia. Tou fakaʼapaʼapa ʼaupito pea mo tou vikiʼi fakamalotoloto te huafa taulekaleka ʼa Sehova!—1 Fkm. 29:13.