ʼE Koutou Fetogi ʼApi Koa?

Kapau ʼe koutou ʼio ki te fehuʼi ʼaia, pea ʼe lahi te ʼu meʼa ʼe tonu ke koutou fai. Kapau ʼe koutou mulimuli ki te ʼu fakatuʼutuʼu ʼaē ʼe fakahā ʼi lalo, pea ʼe vave anai takotou kau ki takotou kokelekasio foʼou.

(1) Kapau kua koutou ʼiloʼi pe ko te potu fea ʼaē ʼe koutou ʼolo kiai, pea ʼe feala anai ki te sikalaipe ʼo tokotou kokelekasio ke ina maʼu te tuʼasila ʼo te Fale ʼo te Puleʼaga ʼo tokotou kokelekasio foʼou. ʼI takotou tau ki te telituale foʼou ʼaia, koutou foimo kumi te koga meʼa ʼaē ʼe tuʼu ai te fale fono pea mo koutou vakaʼi te ʼu ʼaho ʼo te ʼu fono ʼo te kokelekasio. Kapau ʼe fakaʼaogaʼi e he ʼu kokelekasio kehekehe te Fale ʼo te Puleʼaga, pea koutou fehuʼi ki te kau tagata ʼāfea pe ko te telituale fea ʼaē ʼe koutou kau ai. ʼAua naʼa koutou fakatuai takotou kau ki te ʼu fono pea koutou faiga ke koutou feʼiloʼiʼaki mo te ʼu tagata ʼāfea.

(2) Ko te ʼu tēhina sikalaipe ʼo tokotou kokelekasio ʼāfea pea mo tokotou kokelekasio foʼou, ʼe nā fetokoniʼaki anai ke foimo momoli te ʼu Kate Fai Faka Mafola ʼo tokotou famili. ʼE momoli tahi anai mo he kiʼi tohi ki te ʼu tagata ʼāfea ʼo te kokelekasio foʼou. (Vakaʼi te talanoa Réponses à vos questions ʼi Te Minisitelio ʼo Te Puleʼaga Fakafalani ʼo Fepualio 1991.) Ko te Komite Gāue ʼo te kokelekasio ʼe tonu ke ina fakahā ki te tēhina takitaki ʼo te ako tohi takotou tau mai, ke feala hana felāveʼi mo koutou pea mo ina fakahā atu te ako tohi ʼaē ka koutou kau ai.​—Loma 15:7.

(3) Ko te kau fai faka mafola fuli ʼo tokotou kokelekasio foʼou, ʼe tonu ke nātou tali fakafiafia koutou pea ke nātou feʼiloʼiʼaki mo koutou. (Vakaʼi ia 3 Soane 8.) ʼE mahino ia, ʼe tonu ke koutou kau ʼi te ʼu fono fuli, ke feala ai hakotou fefakaloto mālohiʼaki mo tokotou ʼu tēhina mo tuagaʼane.

(4) ʼAua naʼa koutou talitali ke ʼosi katoa te fetuku ʼo te ʼu meʼa ʼo tokotou ʼapi, pea hoki kamata ai takotou fai faka mafola ʼi te telituale ʼo tokotou kokelekasio foʼou. Kapau ʼe koutou fakamuʼamuʼa te ʼu meʼa ʼo te Puleʼaga, pea ʼe koutou maʼu anai te tahi ʼu meʼa ʼaē ʼe ʼaoga kia koutou, pea ʼe koutou fīmālie anai ʼi takotou telituale foʼou. (Mateo 6:​33) Kapau kua koutou nonofo ʼi tokotou ʼapi, pea lagi ʼe koutou fakaafe anai ʼihi ʼo te kokelekasio ke nātou ʼaʼahi koutou pea ke koutou feʼiloʼiʼaki mo nātou.​—Loma 12:13b.

Ko te fetogi ʼapi ʼe ko he toe fakatuʼutuʼu maʼuhiga. Kae kapau ʼe kita mulimuli lelei ki te ʼu tokoni ʼaē ʼe fai mai, pea ʼe mole fakatupu kovi anai kia kita ʼi te faʼahi fakalaumālie. Tahi ʼaē, ʼe ko he fakamoʼoni anai ʼaia ki totatou ʼofa fakatautehina faka Kilisitiano.