Te Tali Ki ʼAkotou ʼu Fehuʼi

◼ Ko ai ʼaē ʼe tonu ke ina fakamaʼa te Fale ʼo Te Puleʼaga?

Ko he Fale ʼo Te Puleʼaga ʼe maʼa pea mo matalelei, ʼe fua lelei anai ki te logo ʼaē ʼe tou faka mafola. (Vakaʼi ia 1 Petelo 2:12.) ʼE maʼuhiga ʼaupito ke maʼa pea mo tokalelei tuʼumaʼu te fale fono, pea ʼe feala kia tatou fuli ke tou kau ki te faʼahi ʼaia. ʼE mole tonu ke tou manatu, ko ʼihi pe ʼaē ʼe tonu ke nātou fai te gāue ʼaia. ʼI te agamāhani, ʼe fakatuʼutuʼu te fakamaʼa ke fai e te ʼu Ako Tohi takitahi ʼo te kokelekasio, pea ʼe takitaki te gāue ʼaia e te tēhina takitaki ʼo te ako tohi. ʼI te ʼu fale fono ʼaē ʼe fakatahi ai te ʼu kokelekasio kehekehe, ko te ʼu tagata ʼāfea ʼe nātou fai anai he ʼu fakatuʼutuʼu ke kau te ʼu kokelekasio fuli ʼi te fakamaʼa.

ʼE tou lava fakahoko feafeaʼi te maʼua ʼaia? ʼE tonu ke fai he polokalama ʼo ʼuhiga mo te fakamaʼa ʼo te Fale ʼo Te Puleʼaga. ʼE tonu ke maʼu te ʼu meʼa ʼaē ʼe ʼaoga ki te fakamaʼa. ʼE lelei ke fakahā he lisi ʼo te ʼu gāue ʼaē ʼe tonu ke fai, ke feala he vakaʼi ʼo te ʼu tēhina mo tuagaʼane. ʼE feala ke ʼi ai te ʼu lisi e lua, tahi lisi ʼo ʼuhiga mo te fakamaʼa ʼaē ʼe fai māhani ʼi te ʼosi fono fuli, pea mo te tahi lisi ʼo ʼuhiga mo te fakamaʼa ʼaē ʼe fai fakalelei ʼi te fakaʼosi vāhaʼa. Ko te tēhina takitaki ʼo te ako tohi, ʼe tonu ke ina fakatuʼutuʼu he ʼaho ʼe faigafua ai te ʼōmai ʼa te ʼu tēhina mo tuagaʼane moʼo fai ʼo te lua fakamaʼa ʼaia. ʼE toe maʼua foki ke tou tokaga lelei ki te luna, mo te ʼu fisiʼi teu, mo te ʼu kiʼi fuʼu ʼakau. ʼE mole tonu ke leta he pepa ʼi te ʼu ala pea mo te ʼu taulaga motokā. ʼI te taʼu fuli, ʼe lelei ke fai he fakamaʼa lahi, lagi ʼi muʼa ʼo te ʼAho Fakamanatu. ʼE feala ai ke fakamaʼa te ʼu matapā sioʼata pea mo fufulu te ʼu kaupā, pea mo te ʼu moquettes.

ʼE mahino ia, ʼe faigafua anai te gāue ʼaia mo kapau ʼe mole tou laku he ʼu kamu pe ko he ʼu pepa ʼi te loto fale fono peʼe ʼi tuʼa. ʼE lelei hakita tokaga ke maʼa tuʼumaʼu te ʼu fale vao mokā kita ʼosi fakaʼaogaʼi. ʼAua naʼa koutou maumauʼi te ʼu meʼa ʼo te fale fono. Koutou vakaʼi peʼe kua pulepule te moquette, peʼe kua maumau he hekaʼaga, peʼe mama he tuio ʼi te ʼu fale vao, peʼe kua motu he foʼi hila, pe ko te tahi ʼu meʼa, pea koutou fakahā ki te tēhina ʼaē ʼe tokaga ki te fakamaʼa ʼo te Fale ʼo Te Puleʼaga.

Tou faiga fuli ke tou lagolago ki te faʼahi ʼaia. ʼE maʼa anai te fale ʼaē ʼe tou fai ai tatatou tauhi, pea ʼe ʼiloʼi anai e te hahaʼi ko tatou ko te ʼu hahaʼi maʼa, ʼe nātou atolasio kia Sehova.—1 Pet. 1:16.