Ko ʼApelili—Ko He Māhina Ke Tou Faʼafai ʼi Te ʼu Gāue Lelei!
1 Ka fakaōvi he afā ki he kolo, pea ʼe maʼuhiga ke fakatokaga te hahaʼi ʼo ʼuhiga mo te tuʼutāmaki ʼaia. Ka fakaōvi ʼaupito te afā, pea ʼe toe mālohi age te fai ʼo te ʼu fakatokaga. Koteā tona tupuʼaga? Heʼe fakalogo kiai te maʼuli ʼo te hahaʼi! Ko ʼihi hahaʼi neʼe mole lagi nātou logo ki te ʼu ʼuluaki fakatokaga. Ko ʼihi neʼe lagi nātou logo kiai kae neʼe mole nātou feholaki. ʼE toe moʼoni te faʼahi ʼaia ʼo ʼuhiga mo te fakatokaga fakaʼatua ʼaē neʼe tuku mai ke tou fakahā, ʼi muʼa ʼo te agi mai ʼa “te afā” ʼo te hāūhāū faitotonu ʼa te ʼAtua ki te ʼu toega ʼo te mālama agakovi ʼaenī. (Taag. 10:25) ʼE tuʼutāmakiʼia te maʼuli heʼegata ʼo te lauʼi miliale hahaʼi! ʼE tonu ke logo te hahaʼi ki te fakatokaga. ʼE tonu ke tou “faʼafai i te u gaue lelei.”—Tito 2:11-14.
2 Lolotoga ni ʼu taʼu, neʼe uga te hahaʼi ʼa Sehova ke nātou gāue fakamalotoloto ʼi te minisitelio ʼi te temi ʼo te Fakamanatu. ʼI te fasiga taʼu mātala ʼo te taʼu 1939, ko te Informateur, ʼaē neʼe muʼa ʼi Te Minisitelio ʼo Te Puleʼaga, neʼe ina foaki te fakaloto mālohi ʼaenī: “ ʼI te hoko mai ʼo te fasiga taʼu mātala pea mo te lāulelei, ʼe tou fakaʼamu ke tuʼa lua age tatatou ʼu hola ʼi te minisitelio, ʼi tatatou fakatahi mo te ʼu kaugā fai faka mafola [ʼo te kokelekasio], pea ke tuputupu lahi mo te ʼu hola ʼa te kau pionie. Ko ʼAhotapu e nima ʼi te māhina ʼo ʼApelili. Pea ʼe ʼi ai mo te ʼu Moeaki e nima. Ke liliu te ʼu Moeaki pea mo te ʼu ʼAhotapu fuli ʼo te māhina ʼo ʼApelili . . . ko he temi makehe ʼi te minisitelio.” Kua hili kiai taʼu e 60, neʼe ko te fakatuʼutuʼu maʼuhiga ʼaia ʼo te ʼu tēhina. ʼI te taʼu ʼaenī, ohage ko te taʼu 1939, ʼe ko fakaʼosi vāhaʼa e nima ʼi ʼApelili. Koteā takotou ʼu fakatuʼutuʼu ki te māhina ʼaenī? Koteā ʼaē neʼe koutou tohi ʼi takotou kaletalio ʼi te māhina ʼo ʼApelili 2000? Koutou fakatuʼutuʼu ke koutou kau mo te hahaʼi ʼa Sehova ki te ʼu gāue lelei, lolotoga te māhina makehe ʼaenī ʼaē ka hoko ai he tuputupu vave ʼi te gāue fakalaumālie.
3 Te Meʼa ʼAē ʼe Tou Fakaʼamu Ke Hoko: Ko te ʼaho ʼaē ʼe maʼuhiga tokotahi ʼi te taʼu 2000, ʼe tō ʼi te māhina ʼaenī. ʼE ko te ʼaho 19 ʼo ʼApelili, te ʼaho fakamanatu ʼo te mate ʼa Sesu. Tou faiga tāfito ke tou fakaafe he tokolahi ki te Fakamanatu. Ohage ko te tokoni ʼaē neʼe fai mai ʼi te māhina ʼaē kua hili, koutou fai he lisi ʼo nātou fuli ʼaē ʼe feala ke kau ki te Fakamanatu pea mo koutou vakavakaʼi ke mole galo he tahi. ʼE tonu ke fakaafe mo nātou ʼaē mole kei faka mafola, mo te kau ako Tohi-Tapu, mo te ʼu ʼaʼahi, mo nātou ʼaē neʼe ako ʼi muʼa atu, te ʼu kaugā gāue, te ʼu kaugā ako, te ʼu vāhaʼa fale, te ʼu kāiga, pea mo te ʼu feʼilo. ʼE ʼi ai koa he motokā ʼo nātou ʼaē ʼe fia ʼōmai? Kapau ʼe mole hanatou motokā, pea ʼe feala koa ke koutou tokoni kia nātou ʼi te faʼahi ʼaia? ʼI te po ʼo te Fakamanatu, ʼe tou maʼu e tatou fuli te pilivilesio ʼaē ke tou tali fakalelei ia nātou ʼaē ka ʼōmai. Hili te Fakamanatu, ʼe feala ke tou hoko atu te faʼahi ʼaia ʼo tou tokoni ʼi te faʼahi fakalaumālie kia nātou ʼaē ʼe fia logo.
4 Ko tatatou “faʼafai i te u gaue lelei” ʼi muʼa atu ʼo te ʼaho ʼo te Fakamanatu pea ʼi te hili ʼo te ʼaho ʼaia, ʼe ko he ʼaluʼaga lelei ʼaia ke tou fakahā ai kia Sehova ʼe tou leleiʼia moʼoni te ʼu meʼa fuli ʼaē neʼe ina fai maʼa tatou. Mai tona ʼuhiga ʼaē ʼe lāulelei anai te temi, tokolahi ia tatou ʼe tou lava fakatuputupu anai totatou ʼu faiga ʼi te gāue ʼaē ko te tala ʼo te logo lelei. Kapau ʼe koutou pionie vaeluaʼi temi, ʼe koutou fia faiga mālohi anai ke koutou fai faka mafola ia hola e 50 peʼe laka atu. (Mat. 5:37) Koutou mulimuli fakalelei ki te polokalama ʼaē neʼe koutou kamata ʼaki te māhina. (Tnk. 3:1; 1 Ko. 14:40) Pea kia tatou ʼaē ʼe mole pionie, tou fakaʼamu ke tou lagolago lahi ki te ʼu pionie fuli, ʼo tou fakaloto mālohiʼi nātou pea mo gāue mo nātou ʼi te telituale. (Vakaʼi ia 2 Hau 10:15, 16.) Kapau ʼe tou tō fakamalotoloto te pulapula lolotoga te māhina ʼo ʼApelili, pea ʼe tou maʼu anai he fiafia lahi pea ʼe tapuakina anai tatou e Sehova. (Mlk. 3:10) ʼE lagi ʼaoga anai te faʼahi ʼaia moʼo uga koutou ke hoko atu takotou pionie vaeluaʼi temi ʼi te māhina fuli peʼe ko takotou pionie katoa. Tou fakaʼamu ke hoko atu te toe gāue lahi fakalaumālie ʼaia ʼo ʼApelili ʼi te ʼu māhina ʼaē ʼe hoa mai, ʼo tou kau tuʼumaʼu ki te faka mafola ʼo te Puleʼaga.
5 ʼE mahino papau ia, ko te lauʼi afe hahaʼi ʼa Sehova ʼe nātou kamata anai he ʼu ako Tohi-Tapu ʼi te māhina ʼaenī. ʼE koutou fia kamata koa hakotou ako Tohi-Tapu? Koutou faikole ke koutou maʼu hakotou ako, pea koutou gāue ʼo mulimuli ki takotou ʼu faikole. Koutou tui papau ʼe leleiʼia anai e Sehova takotou ʼu faikole agavaivai ʼaē ke tokoni atu kia koutou, ke koutou maʼu he tahi ʼe loto agatonu ke koutou akoʼi ia ia.—1 Soa. 3:22.
6 Koʼeni te ʼu ʼuluaki palalau ʼaē neʼe fakaʼaogaʼi moʼo kamata he ʼu fai palalau pea neʼe fua lelei. Koutou kamata ʼaki te fehuʼi ʼaenī: “Ka koutou sioʼi te agamālohi ʼaē ʼe hoko ʼi te ʼu faleako, ʼe koutou manatu koa ʼe ko te fua ʼaia ʼo te gāue ʼa te kau temonio, peʼe tupu ko te mole akoʼi e te ʼu mātuʼa tanatou fānau?” Koutou tuku ke ina tali. Kapau ʼe ina tali atu “ko te gāue ʼa te kau temonio,” pea koutou lau age ia Apokalipesi 12:9, 12, pea mo koutou faka maʼuhigaʼi te gāue ʼo te Tevolo ʼi te mafola ʼo te ʼu maveuveu ʼi te malamanei. ʼOsi ʼaia pea koutou fakahā age te ako 4 ʼo te kaupepa Fakamaʼua, pea koutou fehuʼi age pe neʼe mole heʼeki ina fia ʼiloʼi koa la peʼe haʼu maifea te Tevolo. Koutou lau pea mo fai palalau ki te ʼu ʼuluaki palakalafe e lua. Kapau ʼe ina tali atu ʼe tupu “ko te mole akoʼi e te ʼu mātuʼa tanatou fānau” ʼaē ʼe hoko ai te agamālohi ʼi te ʼu faleako, pea koutou lau ia 2 Timoteo 3:1-3 pea koutou fakahā lelei age te ʼu agaaga ʼaē ʼe nātou fakaʼāsili ai te fihifihia ʼaia. Pea koutou fakahā age te ako 8 ʼo te kaupepa Fakamaʼua, mo koutou lau te palakalafe 5, pea mo hoko atu te fai palalau. Kapau ʼe koutou lava fakatuʼutuʼu ke koutou toe liliu ki ai, pea ʼe lagi feala anai ke koutou kamata hana ako Tohi-Tapu. ʼI te ʼu ʼaʼahi ʼaē ka koutou fai, koutou fehuʼi age ki ai peʼe ina ʼiloʼi he tahi ʼe lagi fia logo anai ki te meʼa ʼaē ʼe ina ako.
7 Ko te tahi faʼahi ke feala hakotou “faʼafai i te u gaue lelei” lolotoga te māhina ʼo ʼApelili, ʼe ko takotou kau ki te ʼu faʼahi kehekehe ʼo te fai faka mafola. Neʼe koutou manatu koa ke koutou fai faka mafola ʼi he koga meʼa ʼe mālōlō ai te hahaʼi peʼe ko he taulaga motokā? ʼI te ʼu taliʼaga kā pea mo te ʼu taulaga kā? Peʼe lagi koutou fia ʼahiʼahi te fai faka mafola ʼi te telefoni, ʼi te ala, peʼe ʼi te ʼu telituale ʼaē ʼe tuʼu ai te ʼu fale gāue? He koʼe ʼe mole koutou fakahoko te ʼu faʼahi ʼaia ʼi te māhina ʼaenī? ʼE tokoni atu anai ia Sehova ke koutou maʼu te lototoʼa ʼaē ʼe ʼaoga kia koutou. (Gaue 4:31; 1 Tes. 2:2b) ʼE lagi feala ke koutou fakatuʼutuʼu ke koutou gāue mo he pionie peʼe ko he kaugā fai faka mafola kua māhani ʼi te ʼu ʼaluʼaga ʼaia ʼo te minisitelio.
8 Ka fia fakatuputupu e he tahi tana fai faka mafola, pea ʼe kau ki te fagonogono faigamālie. ʼI te agamāhani ʼe tonu pe ke tou kamata he fai palalau fakakaumeʼa mo he tahi. Koutou talanoa ki he faʼahi ʼe fia logo kiai te hahaʼi, ʼo lagi koutou fakaʼaogaʼi te ʼu ʼuluaki palalau ʼaē ʼe fakahā lelei ʼi te palakalafe 6. Koutou faiga ke koutou fakaʼaogaʼi fakalelei te ʼu kiʼi temi nounou, naʼa puli ai hakotou temi. ʼE mole tou līaki anai he ʼu kiʼi foʼi piesi ʼuhi pe heʼe mole faʼa maʼuhiga. He koʼe koa ʼe mole koutou faiga ke koutou fakaʼaogaʼi fakalelei māʼia ia minuta pe e nima, peʼe hogofulu, peʼe hogofulu-ma-nima, ke koutou kau ai ki te fagonogono faigamālie?
9 Ko He Temi Moʼo Fakakaukau: Koutou toe manatuʼi te ʼu puani maʼuhiga ʼaē neʼe hā ʼi te kiʼi gaoʼi ʼaē neʼe fai ʼi te Fakatahi Faka Tisitilike ʼi te taʼu ʼaenī kua hili, ko tona kupu tāfito “Te ʼu Folafola Faka Polofeta ʼa Te ʼAtua.” Ko te kiʼi gaoʼi ʼaia, ʼaē ko tona kupu tāfito, Tou Leleiʼia Tatatou Tōfiga Fakalaumālie, neʼe ina uga tatou ke tou fakakaukau fakalelei ki te kehekehe ʼo Sakopo pea mo Esau. Neʼe ʼui e Esau ʼe tokaga ki te ʼu meʼa fakalaumālie ohage pe ko Sakopo, kae neʼe mole hā te faʼahi ʼaia ʼi tana ʼu gāue. (Sen. 25:29-34) ʼE ko he toe fakatokaga lahi ʼaia kia tatou! Ohage ko Sakopo, tou faiga lahi ke tou maʼu te tapuakina ʼo Sehova. (Sen. 32:24-29) He koʼe ʼe mole tou fakatuʼutuʼu ke tou fakafoʼou tatatou faʼafai ʼi ʼApelili pea mo te ʼu māhina ka hoa kiai, pea ke ʼaua naʼa tou meʼa noaʼi ʼi he temi totatou tōfiga fakalaumālie mo taulekaleka?
10 “Ko te ʼaho lahi ʼo Sehova kua ōvi mai. Kua ōvi mai, pea ʼe fakavilivili ʼaupito mai.” (Sofo. 1:14) ʼE tonu ke kalagaʼi te logo lelei ʼo te Puleʼaga. ʼE tuʼutāmakiʼia te maʼuli ʼo te hahaʼi! Tou fakaʼamu ke lahi te ʼu tapuakina ʼaē ka maʼu e te hahaʼi fuli ʼa Sehova ʼi te māhina ʼaenī, pea mo tou fakahā ʼi te logo tahi ʼe tou “faʼafai i te u gaue lelei.”
[Talanoa ʼo te pasina 4]
Te ʼu Tokoni ʼo ʼUhiga Mo Te Fakamanatu
ʼI te taʼu ʼaenī, ko te ʼaho ʼo te Fakamanatu ʼe tō ʼi te Feliafā ʼaho 19 ʼo ʼApelili. ʼE tonu ke vakaʼi e te kau tagata ʼāfea te ʼu faʼahi ʼaenī:
◼ ʼI takotou fakatuʼutuʼu te hola ʼo te fono, koutou tokaga ke feʼāveʼaki te vino pea mo te pane ʼi te kua ʼosi tō ʼo te laʼā.
◼ Ko te hahaʼi fuli, ʼo kau ai mo te tēhina ʼaē ka faiakonaki, ʼe tonu ke nātou ʼiloʼi pe ko te potu fea pea ko te hola fia ʼaē ka fai ai te Fakamanatu.
◼ ʼE tonu anai ke maʼu pea mo teuteuʼi fakatomuʼa te pane pea mo te vino.—Vakaʼi Te Tule Leʼo Fakafalani ʼo te ʼaho 15 ʼo Fepualio 1985, ʼi te pasina 17.
◼ ʼE tonu anai ke fakatokatoka fakatomuʼa te ʼu pa, mo te ʼu ipu, mo te laupapa, pea mo te kie fāliki.
◼ ʼE tonu anai ke fakamaʼa fakatomuʼa te Fale ʼo te Puleʼaga pe ko te koga meʼa ʼaē ka fai ai te fono.
◼ ʼE tonu anai ke filifili fakalelei te ʼu tēhina ʼaē ka nātou feʼāveʼaki te pane mo te vino, pea ke fakahā fakatomuʼa kia nātou te meʼa ʼaē ʼe tonu ke nātou fai.
◼ ʼE tonu anai ke fai he ʼu fakatuʼutuʼu moʼo ʼave te pane mo te vino ki te kau fakanofo ʼaē neʼe mole nātou lava ʼōmai ki te fono.
◼ Kapau neʼe fakatuʼutuʼu ke fakaʼaogaʼi te Fale ʼo te Puleʼaga e he ʼu kokelekasio kehekehe, pea ʼe tonu anai ke felogoi lelei te ʼu kokelekasio ʼaia, naʼa hahaʼi fau te hūʼaga ʼo te Fale fono peʼe ʼi te ala, peʼe ʼi te taulaga motokā.