Unis grâce à lʼenseignement divin—Te Logo Tahi Fakatautehina Moʼoni

Neʼe kau te tagata taupau faka silikosikilipisio ki te ako Tohi-Tapu ʼa te fafine neʼe mole heʼeki kau ki te ʼu fono. Neʼe ina fakaafe ia ia ke ina sioʼi te foʼi fime viteo Unis grâce à lʼenseignement divin. ʼI te vāhaʼa ʼaia neʼe kau te fafine ki te fono pea neʼe ina ʼui neʼe fiafia ʼaupito ʼi tana kau kiai. He koʼe koa neʼe maʼu vave he ʼu fua ʼaki te foʼi fime ʼaia? He neʼe punamaʼuli te fafine ki te maʼuhiga ʼaē ʼo tatatou logo tahi fakatautehina ʼi he mālama agamālohi pea mo lahi ai te fehiʼa.—Soa. 13:35.

Koutou sioʼi te foʼi fime viteo ʼaia ke koutou sio ai pea mo ʼiloʼi ai te tokalelei pea mo te ʼofa ʼaē ʼe maʼu e te kau Fakamoʼoni ʼa Sehova ʼi te malamanei katoa. Pea koutou metitasio leva ki te ʼu fehuʼi ʼaenī:

(1) He koʼe neʼe lelei te kupu tāfito “Akonaki Fakaʼatua” ʼo te ʼu fakatahi ʼaē neʼe fai ʼi te ʼu taʼu 1993-1994?—Mik. 4:2.

(2) Koteā ʼaē neʼe hoko ki ʼihi famili ʼaki te moʼoni ʼa te Tohi-Tapu? Koteā ʼaē neʼe hoko ki tokotou famili?

(3) He koʼe ʼe maʼuhiga ke akoʼi tatou e Sehova?—Pes. 143:10.

(4) Koteā te ʼu faigataʼaʼia ʼaē neʼe hoko ʼi te teuteu ʼo te ʼu fakatahi lalahi faka malamanei?

(5) Kia koutou, neʼe hoko feafeaʼi ia Pesalemo 133:1 pea mo Mateo 5:3 ʼi te ʼu fakatahi ʼaē neʼe koutou kau kiai?

(6) Koteā te fakamoʼoni ʼo te mālohi ʼo te ako fakaʼatua?—Apk. 7:9.

(7) Neʼe ko te temi fea ʼaē neʼe kaugamālie ʼaupito ai te papitema ʼa te kau Kilisitiano moʼoni?

(8) Koteā te ʼu palalau neʼe fai e Mikea, mo Petelo pea mo Sesu neʼe hoko ʼi te lotolotoiga ʼo te kau Fakamoʼoni ʼa Sehova?

(9) He koʼe ʼe koutou faka tui ko te fiafia pea mo te logo tahi ʼo te foʼi famili faka malamanei ʼe mole ko he moemisi?

(10) Ko ai ʼaē ka koutou fakamamata ki ai te foʼi fime viteo ʼaia, pea koteā tona tupuʼaga?

ʼI tana ʼosi sio ki te foʼi fime viteo ʼaia, neʼe fakahā fakanounou e te tuagaʼane te manatu lelei ʼaenī: “ ʼE tokoni lahi mai anai kia ʼau te foʼi fime viteo ʼaia, ke ʼau manatuʼi ko te ʼu tēhina mo tuagaʼane ʼe tokolahi ʼi te malamanei katoa, ʼe nātou tauhi agatonu kia Sehova ʼi te lakaga nei. . . . ʼE maʼuhiga ʼaupito tatatou logo tahi fakatautehina!”—Ef. 4:3.