Koutou Fakafimālieʼi Tokotou Maʼuli Fakalaumālie
1 Ko tatatou Fakatahi Faka Tisitilike “Te Kau Fai Faka Mafola Faiva ʼo Te Puleʼaga” ʼaē ka hoko mai, ʼe ko he faigamālie taulekaleka ʼaia ke tou kai ki te ʼu meʼa kai fakalaumālie. Ohage ko he meʼa kai fakasino lelei, ʼe mahino ko te polokalama ʼaia ʼe ina fafaga anai tatou ʼi te faʼahi fakalaumālie “aki te u folafola o te tui.” (1 Tim. 4:6) ʼE ina faka fealagia anai kia tatou ke tou fakaōvi kia Sehova. Pea ʼe mahino ia, ʼe tou maʼu anai he ʼu tokoni pea mo he ʼu fakaloto mālohi moʼo kātakiʼi te ʼu faigataʼaʼia ʼo totatou maʼuli. ʼE fakapapau fēnei mai e Sehova: “ ʼE ʼau fakaliliu anai koe ko he tahi ʼe fakasiosio tonu, pea ʼe ʼau akoʼi anai koe ʼi te ala ʼaē ʼe tonu ke ke haʼele ai. ʼE ʼau tokoniʼi anai koe, ʼo sio maʼu toku mata kia te koe.” (Pes. 32:8) ʼE ko he tapuakina lahi kia tatou te taʼi takitaki ʼofa ʼaia ʼi totatou maʼuli! Koʼeni te ʼu faʼahi ʼe lelei ke tou fai ke tou maʼu ai te ʼu lelei fuli ʼo te fakatahi.
2 Tou Teuteuʼi Totatou Loto: ʼE ko he maʼua ʼo tatou takitokotahi ke tou hāofaki totatou loto. (Taag. 4:23) Koia ʼe maʼua ai ke tou lolomi totatou loto, pea mo tou aga fakahagatonu kia tatou totonu. Ko te fakatahi ʼe ko he temi ke tou metitasio ai ki tatatou ʼu felogoi mo Sehova, pea mo tou ‘fakaloloto tatatou fakasiosio ki te lao haohaoa ʼo te ʼāteaina.’ Moʼo teuteuʼi totatou loto ke ina ‘tali te fakahū ʼo te folafola,’ ʼe tonu ke tou kole kia Sehova ke ina sivisivi tatou, ke tou ʼiloʼi te “ala fakatupu mamahi” ʼaē ʼe tonu ke fakatonutonuʼi, pea ke ina takitaki tatou ki “te ala ʼo te ʼu temi heʼegata.”—Skp. 1:21, 25; Pes. 139:23, 24.
3 Koutou Fakalogo Pea Mo Metitasio: ʼAki he agamālū, neʼe tokoniʼi e Sesu ia Maleta, koteʼuhi neʼe tokaga fau ki te meʼa kai ʼaē neʼe ina teuteuʼi ki he lakaga maʼuhiga, kae neʼe ina vikiʼi ia Malia he neʼe fakalogo lelei ki tana ʼu palalau, ʼo ina ʼui fēnei: “Ko Malia ia kua ina fili te vahe ʼaē ʼe lelei, pea ʼe mole toʼo anai ia te ia.” (Luka 10:39, 42, MN ) Kapau ʼe tou fia fakalogo ohage ko ia, pea ʼe mole tou tuku anai ki he ʼu meʼa ʼe mole maʼuhiga, ke nātou fakaleluʼi tatou. ʼE tou heheka maʼu anai pea mo fakalogo lelei lolotoga te fakatahi katoa. ʼE mole tou fai palalau anai pea mo hoko feʼoloʼaki, pea ʼe tou tokakaga anai ke mole tou fakalelu ki te hahaʼi ʼaki te ʼu kiʼi telefoni feʼāveʼaki, mo te ʼu kamela pea mo te ʼu meʼa fai paki.
4 Ka tou fakalogo ki te ʼu akonaki, ʼe lelei ke tohi fakanounou te ʼu akonaki moʼo sivisivi tona faʼahiga fai. Tou fakapipiki tahi te ʼu puani ʼaē ʼe tou logo kiai pea mo te ʼu puani ʼaē kua tou ʼiloʼi. Ko te fai ʼaia ʼe tokoni mai anai ke tou mahino pea mo manatuʼi te ʼu akonaki ʼaē ʼe tou fakalogo. Kapau ʼe tou toe vakaʼi anai takita ʼu nota, pea ʼe tonu ke tou fai te faʼahi ʼaia ʼaki te fakatuʼutuʼu ʼaē ke tou maʼuliʼi te ʼu puani. ʼE tonu kia tatou takitokotahi ke tou fai te ʼu fehuʼi ʼaenī: ‘Koteā tona pikipikiga mo taku ʼu felogoi mo Sehova? Koteā te ʼu fetogi ʼaē ʼe tonu ke ʼau fai ʼi toku maʼuli? ʼE ʼau lava fakaʼaogaʼi feafeaʼi te ʼu puani ʼaia ʼi taku ʼu felogoi mo ʼihi? ʼE ʼau lava fakaʼaogaʼi feafeaʼi te ʼu puani ʼaia ʼi taku minisitelio?’ Tou fakamatala ki ʼihi te ʼu puani ʼaē neʼe tou leleiʼia tāfito. Kapau ʼe tou fai feiā, pea ʼe tou lava taupau anai te ʼu folafola ʼa Sehova ‘ ʼi te lotomalie ʼo totatou loto.’—Taag. 4:20, 21.
5 Tou Maʼuliʼi Te ʼu Meʼa ʼAē ʼe Tou Ako: ʼI te hili ʼo te tahi fakatahi, neʼe ʼui fēnei e te tēhina: “Ko te polokalama ʼaē neʼe teuteuʼi neʼe ʼaoga kia tatou takitokotahi, neʼe ina uga tatou ke tou vakaʼi te ʼuhiga ʼo totatou loto pea mo te loto ʼo totatou famili, pea neʼe ina foaki mai he tokoni ʼofa ʼaki te Tohi-Tapu, ʼi te ʼu temi ʼaē neʼe ʼaoga ai te faʼahi ʼaia. ʼAki te fakatahi ʼaia, kua ʼau mahino lelei age ki toku maʼua ʼaē ke ʼau tokoni lahi ki te kokelekasio.” ʼE mahino ia, ko te tokolahi ia tatou ʼe tou manatu feiā. Kae ʼe mole tonu ke gata ʼaki tatatou mavae fiafia pea mo lotomālohi mai te fakatahi. Neʼe ʼui fēnei e Sesu: “Kapau ʼe koutou ʼiloʼi te ʼu meʼa ʼaia, pea ʼe manuʼia ia koutou mo kapau ʼe koutou fai.” (Soa. 13:17, MN ) ʼE tonu kia tatou takitokotahi, ke tou maʼuliʼi te ʼu puani ʼaē neʼe tou ako. (Filp. 4:9) Kapau ʼe tou fai te faʼahi ʼaia, ʼe feala ai ke fakafimālie katoa totatou maʼuli fakalaumālie.
[Talanoa ʼo te pasina 4]
Metitasio Ki Te ʼu Meʼa ʼAē ʼe Koutou Logo Kiai:
■ Koteā tona ʼu fua ki taku ʼu felogoi mo Sehova?
■ Koteā tona ʼu fua ki taku ʼu felogoi mo te hahaʼi?
■ E feafeaʼi haku fakaʼaogaʼi ʼi toku maʼuli, pea mo taku minisitelio?