“Tou Faka Kolōliaʼi Fakatahi Tona Huafa”
1. Koteā te fealagia ʼe tou maʼu anai moʼo fakavikiviki fakatahi ki te huafa ʼo te ʼAtua, pea koteā ʼaē ʼe feala ke tou fai ʼi te temi nei ke tou teuteu ki te ʼaho ʼaia?
1 Neʼe hiva fēnei te tagata fai pesalemo: “Koutou fakavikiviki kia Sehova mo ʼau, pea ke tou faka kolōliaʼi fakatahi tona huafa.” (Pes. 34:3) Ko tatatou Fakatahi Faka Tisitilike ʼaē ka hoko mai ʼaē ko tona kupu tāfito “Tou Haʼele Mo Te ʼAtua,” ʼe ina foaki mai anai te fealagia ke tou faka kolōliaʼi fakatahi te huafa ʼo Sehova mo totatou ʼu tēhina mo tuagaʼane mai te ʼu kokelekasio kehekehe. Kua koutou fai koa hakotou ʼu fakatuʼutuʼu ʼo ʼuhiga mo hokotou nofoʼaga, mo takotou feʼaluʼaki, pea mo kole he ʼu ʼaho mālōlō ki takotou patolo? ʼE ko he aga fakapotopoto hatatou vakaʼi fakatomuʼa te ʼu faʼahi ʼaia.—Taag. 21:5.
2. He koʼe ʼe lelei ke tou fakatuʼutuʼu ke tou ʼōmai tautonu ki te fale ʼo te fakatahi?
2 ʼI Te Fale ʼo Te Fakatahi: ʼE lahi te ʼu faʼahi ʼe tonu ke tou tokakaga kiai mokā tou kau ki he fakatahi. ʼE lelei hatatou ʼolo fakatomuʼa ki te fakatahi ke feala hatatou fai puleʼaki ki he ʼu meʼa ʼe lava hoko fakapunamaʼuli mai, pea ʼe feala anai hatatou maʼu tautonu hatatou hekaʼaga ke tou kau ʼaki he loto katoa ki te katiko pea mo te faikole ʼo te kamata. (Pes. 69:30) ʼE avahi anai te ʼu matapā ʼi te hola valu uhu. Koia ʼe kole atu ke koutou lagolago ki te ʼu fakatuʼutuʼu ʼaē ka fai, ʼi te taulaga motokā pea ʼi te loto fale fono. (Hep. 13:17) ʼI ni ʼu minuta ʼi muʼa ʼo te kamata ʼo te polokalama, ko te pelesita ʼe heka anai mai muʼa kae lolotoga fakatatagi te musika ʼo te Puleʼaga. ʼE tonu ke tou heheka fuli ʼi te temi ʼaia ke feala ke kamata lelei te polokalama. (1 Ko. 14:33, 40) ʼE tou tāʼofi pe anai ni ʼu lapalasi maʼa nātou ʼaē neʼe tou ʼōmai tahi ʼi te motokā peʼe ko nātou ʼo totatou loto fale.—1 Ko. 13:5; Filp. 2:4.
3. Koteā te ʼu fakatuʼutuʼu neʼe fai ki te temi kai ʼo te fetapā, pea he koʼe ʼe lelei te fakatuʼutuʼu ʼaia?
3 Koutou fakaʼaogaʼi te ʼu fakatuʼutuʼu ʼaē neʼe fai ki te temi kai ʼo te fetapā peʼe koutou ʼaumai hakotou meʼa kai, kae mole koutou mavae ʼi te koga meʼa ʼo te fakatahi ʼo kumi hakotou meʼa kai. ʼE feala ai kia tatou fuli ke tou fakatahi mo te ʼu tēhina mo te ʼu tuagaʼane ʼo tou fefakaloto mālohiʼaki, pea ke tou kau ki te kamata ʼo te polokalama ʼo te hili hoʼatā.
4. He koʼe ʼe ko he meʼa faigataʼa ke maʼa tatatou faʼahiga teuteu pea mo te faʼahiga kosi ʼo totatou ʼulu?
4 Tou Teuteu Lelei Pea Mo Teu Fakapoipoi: ʼE mole ko he meʼa faigafua hatatou teuteu lelei tuʼumaʼu. Ko te mālama heʼeʼaoga ʼa Satana ʼe ina fakaneke te hahaʼi ke nātou mulimuli ki te ʼu faʼahiga teuteu ʼe mole aga fakaʼapaʼapa, ʼe ina fakaneke ki te ʼu felāveʼi fakasino, pea mo te ʼu faʼahiga teuteu faikehe pea mo heʼe fakaʼapaʼapa. (1 Soa. 2:15-17) Koia kapau ʼe tonu ke tou filifili he ʼu mutuʼi meʼa pea mo te faʼahiga kosi pea mo helu ʼo totatou ʼulu, ʼe tonu ke tou tokaga ki te fakatotonu ʼa te Tohi-Tapu ke tou “līaki te aga heʼe faka lotu pea mo te ʼu holi ʼo te mālama, pea mo tou maʼuli fakapotopoto pea mo agatonu, . . . ʼi te lotolotoiga ʼo te tuʼu ʼo te ʼu faʼahiga meʼa ʼaenī.” (Tito 2:12, MN ) ʼE mole tou loto ke tokagaʼi tatou e totatou ʼu tēhina mo tuagaʼane peʼe ko ʼihi atu, ʼuhi ko totatou ʼu mutuʼi meʼa peʼe ko totatou ʼulu.—1 Ko. 10:32, 33.
5. Koteā te ʼu fehuʼi ʼe tokoni mai anai ke tou vakavakaʼi tatatou faʼahiga teuteu?
5 Mokā koutou teuteu ki te fakatahi, koutou fai kia koutou te ʼu fehuʼi ʼaenī: ‘ ʼE lelei koa taku faʼahiga teuteu peʼe tokagaʼi fau anai? ʼE ko he teu fakaʼapaʼapa koa? ʼE hā lelei koa toku ʼu fatafata peʼe nounou fau koa toku vala? ʼE māina koa toku ʼu kofu peʼe efihia fau koa? ʼE maʼa koa toku ʼu mutuʼi meʼa pea mo magoni?’—Loma 15:2, 3; 1 Tim. 2:9.
6. Koteā te ʼu tokoni ʼe fai mai ke tou teuteu ʼaki he aga fakaʼapaʼapa?
6 ʼE lelei hatatou kumi tokoni ki te kau Kilisitiano ʼaē kua fotufotuʼa tagata peʼe fotufotuʼa fafine. ʼE tonu ke fehuʼi e te ʼu fafine ki tonatou ʼu ʼohoana peʼe feafeaʼi anai te sio ʼa te hahaʼi ki tona ʼu mutuʼi meʼa. ʼI te faʼahi ʼaia, ʼe lava tokoniʼi e te ʼu mātuʼa aga faka Kilisitiano, tanatou fānau ʼaē kua tūpulaga. Tahi ʼaē meʼa, ko te ʼu tuagaʼane finematuʼa ʼaē kua aga fakapotopoto, ʼe feala ke nātou “fakaliliu te ʼu fafine kei finemui ke aga fakapotopoto, . . . ke nātou agapoto, aga fakapoipoi” ʼi tanatou ʼu faʼahiga teuteu “ke ʼaua naʼa fai he palalau ʼe kovi ki te folafola ʼa te ʼAtua.” (Tito 2:3-5, MN ) ʼE maʼu ʼi tatatou ʼu tohi te ʼu paki ʼe feala ke tou ʼiloʼi ai te ʼu faʼahiga teu ʼaē ʼe fakapoipoi, mo lelei.
7. ʼE tou lava teuteuʼi feafeaʼi totatou loto moʼo mahino ki te ʼu akonaki ʼaē ka tou logo kiai?
7 Neʼe Teuteuʼi He Kaitahi Fakalaumālie: Ko te Hau ko Sosafate neʼe ina “teuteuʼi [tona] loto moʼo kumi te ʼAtua moʼoni.” (2 Fkma. 19:3) ʼE tou lava teuteuʼi feafeaʼi totatou loto ʼi muʼa ʼo te hoko mai ʼo te fakatahi? ʼI te ʼu alatike ʼi te pasina fakamuli ʼo te Réveillez-vous ! ʼo te ʼaho 22 ʼo Maio pea mo te ʼaho 8 ʼo Sūnio, ʼe fakahā fakatomuʼa mai te ʼu meʼa kai fakalaumālie ʼaē ka tou fakaʼaogaʼi. He koʼe ʼe mole koutou toʼo hokotou temi ke koutou fakakaukauʼi ai te ʼu alatike ʼaia, moʼo fakatuputupu takotou fia ʼiloʼi te kaitahi ʼaē neʼe teuteuʼi e Sehova maʼa tatou? Ko te teuteuʼi ʼo totatou loto ʼe toe faka ʼuhiga ke tou kole kia Sehova ke tokoni mai kia tatou ke tou mahino ki te ʼu akonaki ʼaē ka tou logo anai kiai pea ke tou maʼuliʼi.—Pes. 25:4, 5.
8. Koteā ʼaē ʼe tou loto kiai, pea koteā tona tupuʼaga?
8 Ko tatou fuli ʼe tou loto ke tou akoʼi he tahi age ʼu meʼa ʼi te Folafola ʼa te ʼAtua, heʼe tou mahino ʼe feala ke tou maʼu ai te maʼuli. (1 Pet. 2:2) Koia tou kau ki tatatou Fakatahi Faka Tisitilike ʼaē ko tona kupu tāfito “Tou Haʼele Mo Te ʼAtua” pea mo tou ‘faka kolōliaʼi fakatahi te huafa ʼo Sehova.’—Pes. 34:3.
[Talanoa ʼo te pasina 3]
Moʼo Faka Kolōliaʼi Te Huafa ʼo Te ʼAtua
◼ Tou fai he ʼu fakatuʼutuʼu fakatomuʼa
◼ Tou fakahā totatou ʼofa ki te hahaʼi
◼ Tou teuteuʼi totatou loto