ʼE Tokoni Ia Sehova Kia Nātou ʼAē ʼe Falala Kia Te Ia
1 Tokolahi te hahaʼi ʼe nātou ʼui ʼe maʼuhiga ki tonatou maʼuli te paʼaga, te mālohi, pea mo te ʼu faiva fakatagata. (Pes. 12:4; 33:16, 17; 49:6) Kae ko nātou ʼaē ʼe manavasiʼi pea mo falala kia Sehova, ʼe ʼui papau e te Tohi-Tapu “ko ia tonatou tokoni pea mo tonatou meʼa tali tau.” (Pes. 115:11) Tou vakaʼi te ʼu faʼahi e lua ʼe ʼaoga ai ke tou fakahā ʼe tou falala kia Sehova.
2 ʼI Totatou ʼUhiga Minisi Kilisitiano: Ka tou fai he ʼu akonaki ʼi te kokelekasio peʼe tou faiako ʼi te minisitelio, ʼe tonu ke tou falala ki totatou ʼAtua. Tou vakaʼi te faʼifaʼitaki ʼa Sesu. Neʼe mole falala ki tona poto peʼe ki tona mālohi logola neʼe ko te ʼAlo ʼo te ʼAtua, kae neʼe falala katoa ia ki tana Tāmai ʼaē ʼe ʼi selo. (Soa. 12:49; 14:10) Koia ʼe maʼuhiga ai ke tou muliʼi tana faʼifaʼitaki! (Taag. 3:5-7) Gata pe ki te tapuakina ʼa Sehova ʼe ina faka fealagia anai ki tatatou ʼu faiga ke tou faka kolōliaʼi ia ia, pea mo ʼaoga anai ki niʼihi.—Pes. 127:1, 2.
3 ʼE tou fakahā tatatou falala kia Sehova mokā tou kole age tana takitaki pea mo te tokoni ʼa te laumālie maʼoniʼoni. (Pes. 105:4; Luka 11:13) Tahi ʼaē meʼa, ʼe tou falala ki te ʼAtua heʼe tou fakatafito tatatou faiako ki tana Folafola, te Tohi-Tapu. ʼE feala ki tana logo ke malave ki te ʼu loto pea mo fetogi te maʼuli ʼo te hahaʼi. (Hep. 4:12) Ka tou ‘gāue ʼo fakalogo ki te mālohi ʼaē ʼe foaki mai e te ʼAtua,’ pea ʼe faka kolōliaʼi ai Sehova.—1 Pet. 4:11.
4 Mokā Tou Tau Mo He ʼu Fihifihia: ʼE ʼaoga ke tou toe kumi te tokoni ʼa Sehova mokā tou felāveʼi mo ni ʼu ʼaʼahi pea mo ni ʼu fihifihia. (Pes. 46:1) Ohage la, ʼe lagi mole tali anai e totatou patolo ke tou mālōlō ʼi te ʼaho ʼo te fakatahi, peʼe lagi tou tau mo he ʼaluʼaga faigataʼa ʼi totatou famili. ʼE tou fakahā tatatou falala kia Sehova mokā tou faikole tuʼumaʼu kia te ia pea mo tou fakalogo ki tana takitaki ʼaē ʼe ina foaki mai ʼi tana Folafola pea mo tana kautahi. (Pes. 62:8; 119:143, 173) ʼE sio anai te ʼu kaugana ʼa Sehova ki tana tokoni ʼi tonatou maʼuli mo kapau ʼe nātou fai feiā.—Pes. 37:5; 118:13, 16.
5 ʼE fakapapau fēnei mai e Sehova: “Manuʼia te tagata maʼuli ʼaē ʼe ina tuku tana falala kia Sehova, pea kua liliu ia Sehova ko tona tauʼaga.” (Sel. 17:7) ʼOfa pe ke tou fakahā ʼe tou falala kia te ia ʼi te ʼu meʼa fuli ʼaē ʼe tou fai!—Pes. 146:5.