Lua Koga: Tou Fai He ʼu Ako Tohi-Tapu ʼe Tuputupu
Tou Teuteuʼi Te Ako Tohi-Tapu
1 Moʼo akoʼi fakalelei te Tohi-Tapu ki he tahi, ʼe mole tonu ke gata ʼaki pe mo te fai palalau ki te ʼu palakalafe pea mo te ʼu vaega ʼaē ʼe kua tohi katoa. ʼE tonu ke tou fakahā te ʼu manatu ke feala hona malave ki te loto ʼo ia ʼe ako. ʼE fakamaʼua e te faʼahi ʼaia ke tou teuteuʼi lelei te ako ke ʼi ai hona ʼu fua lelei kia ia ʼaē ka tou fai tana ako.—Taag. 15:28.
2 Takotou Teuteu: Moʼo kamata te teuteuʼi ʼo te ako, koutou faikole kia Sehova ʼo ʼuhiga mo ia ʼe ako pea mo te ʼu meʼa ʼe ʼaoga kia ia. Koutou kole kia Sehova ke tokoni atu ke koutou fai he ʼu palalau ʼe malave ki tona loto. (Kol. 1:9, 10) Ke koutou mahino lelei ki te kupu tāfito ʼo te ako, koutou toʼo he temi ke koutou fakakaukauʼi te kupu tāfito ʼo te kapite, te ʼu kupu tāfito ʼaē ʼe tuʼu ʼi te kapite, pea mo te tahi ʼu meʼa. Koutou fai kia koutou te fehuʼi ʼaenī, ‘Koteā te fakatuʼutuʼu tāfito ʼo te ako?’ ʼE tokoni atu anai te faʼahi ʼaia ke koutou faka maʼuhigaʼi te ʼu puani tāfito ʼi takotou fai te ako.
3 Koutou toe vakaʼi fakalelei te ʼu palakalafe takitokotahi. Koutou maʼu te ʼu tali ki te ʼu fehuʼi, ʼo koutou fakaʼiloga pe te ʼu kupu tāfito. Koutou vakavakaʼi te pikipikiga ʼo te ʼu vaega ʼaē ʼe tuʼu ai mo te manatu tāfito ʼo te palakalafe, pea koutou fili te ʼu vaega ʼaē ka koutou lau anai ʼi te ako. ʼE lagi tokoni atu anai kia koutou mo kapau ʼe koutou tohi he ʼu kiʼi manatu nounou ʼi te tafaʼi pasina. ʼE tonu ke mahino lelei kia ia ʼaē ʼe ako ko te ʼu meʼa ʼaē ʼe ina ako ʼe haʼu mai te Folafola ʼa te ʼAtua.—1 Tes. 2:13.
4 Koutou Faka ʼAlutahi Te Ako Pea Mo Te ʼu Meʼa ʼe ʼAoga Kia Ia ʼe Ako: Koutou faka ʼalutahi te kapite ʼaē ʼe koutou fai mo te ʼu meʼa ʼaē ʼe ʼaoga kia ia ʼe ako. Koutou fakakaukauʼi fakatomuʼa te ʼu fehuʼi ʼaē ʼe feala ke ina fai atu pea mo te ʼu manatu ʼaē ʼe feala ke faigataʼa hana mahino kiai peʼe ko te ʼu tali ʼaē ka ina fai. Koutou fai kia koutou te ʼu fehuʼi ʼaenī: ‘Koteā ʼaē ʼe tonu ke mahino ki ai peʼe ke hikihiki, ke feala ke tuputupu ʼi te faʼahi fakalaumālie? ʼE ʼau lava malave feafeaʼi ki tona loto?’ Pea koutou faka ʼalutahi leva te ako pea mo te ʼu faʼahi ʼaia. ʼI ʼihi temi, ʼe lagi koutou manatu ʼe ʼaoga ke koutou teuteuʼi he lea fakatātā, peʼe ko he fakamahino, peʼe ko he ʼu fehuʼi moʼo tokoni kia ia ʼe ako ke mahino ki te faka ʼuhiga ʼo he manatu peʼe ko he vaega. (Neh. 8:8) Kae ʼaua naʼa koutou hilifaki he tahi ʼu manatu ʼe mole ʼi ai honatou pikipikiga mo te kupu tāfito. Ko he fakamanatu nounou ʼi te fakaʼosi ʼo te ako ʼe tokoni anai kia ia ke ina manatuʼi te ʼu puani tāfito.
5 ʼE tou fiafia lahi mokā maʼu e te hahaʼi foʼou te fua ʼo te faitotonu, pea mo tupu ai he fakavikiviki ʼo Sehova! (Filp. 1:11) Moʼo tokoni kia nātou ke nātou aʼu ki te faʼahi ʼaia, koutou teuteu lelei takotou ako Tohi-Tapu ʼi te temi fuli pe.