Ko Te Ako ʼAē ʼe Ina Teuteuʼi Ki Te Minisitelio—Ko He Faigamālie Ki Te Gāue
1 ʼAki te polofeta ko Selemia, neʼe fakakikite fēnei e Sehova: “ ʼE ʼau fakanofo anai [ki taku hahaʼi] he ʼu tagata tauhi ōvi ʼe nātou fafaga moʼoni anai nātou; pea ʼe mole nātou toe matataku anai, ʼe mole nātou toe tuʼania anai, pea ʼe mole puli anai he tahi.” (Sel. 23:4) Ko te gāue ʼaia ʼaē ko te taupau ʼo te ʼu ōvi ʼe fai ʼi te temi nei ki te hahaʼi ʼo te ʼu fenua fuli pe. ʼE fai te gāue ʼaia e te ʼu lauʼi hogofulu afe tagata ʼāfea ʼi te ʼu kokelekasio. Tahi ʼaē meʼa, ko te ʼu tagata tūpulaga ʼaē ʼe kaugamālie ohage ko he ʼu mosiʼi hahau, ʼe nātou foaki ia nātou ʼaki he loto lelei ke nātou tauhi kia Sehova. (Pes. 110:3) ʼE ko he tapuakina lahi te ʼu tēhina agavaivai ʼaia ki te ʼu kokelekasio ʼa te hahaʼi ʼa te ʼAtua! ʼI te hoko atu ʼo te gāue fakalaumālie ʼaē ko te fakatahitahi ʼo te hahaʼi, ʼe kei ʼaoga ai he ʼu tagata ʼe nātou maʼu te ʼu fealagia moʼo tauhi ki tanatou ʼu tēhina.
2 Ko te Ako ʼAē ʼe Ina Teuteuʼi Ki Te Minisitelio, ʼe ko te fakatuʼutuʼu lelei ʼaia moʼo akoʼi te kau selipatea tagata ʼāfea pea mo tagata faifekau faka minisitelio ke nātou fai he tahi ʼu gāue. Talu mai te fakatuʼu ʼo te ako ʼaia ʼi te taʼu 1987, ko te kau ako e 22 000 tupu mai te ʼu filiale e 140 tupu neʼe akoʼi nātou ʼi te ʼu kalasi e 999. Ki te ʼu tēhina ʼaia, ko te ako ʼaia neʼe ko he “matapā lahi ʼe ina taki ki te gāue.”—1 Ko. 16:9, MN.
3 Te Fakatuʼutuʼu ʼo Te Ako: Ko te Ako ʼAē ʼe Ina Teuteuʼi Ki Te Minisitelio, neʼe fakatuʼutuʼu moʼo akoʼi ia te ʼu tēhina ʼaia ke nātou lava fakahoko te ʼu maʼua ʼaē ʼe feala ke ʼaoga ʼi te kautahi. Ko te ako ʼaia ʼe ina hikihiki tanatou fealagia ke nātou takitaki te gāue fai faka mafola ʼo te logo lelei, mo te tauhi ʼo te ʼu ōvi, pea mo te faiakonaki ʼi te kokelekasio. ʼI te ʼosi maʼu ʼo tanatou pepa ʼo te ako ʼaia, ko ʼihi kau ako ʼe liliu ko he kau pionie makehe peʼe ko he ʼu tagata taupau feʼoloʼaki ʼi tonatou fenua peʼe ko he tahi fenua. Ko ʼihi ʼe hinoʼi nātou ke nātou gāue ʼi tonatou kokelekasio peʼe ʼi he potu ʼo te telituale ʼe ʼaoga ai kiai he kau gāue.
4 Lolotoga te ʼu vāhaʼa e valu ʼo te ako, ʼe ako loloto anai e te kau ako ia te Tohi-Tapu. ʼE nātou vakaʼi anai he ʼu tuʼuga akonaki ʼo te Tohi-Tapu, mo te ʼu maʼua ʼo te gāue ʼaē ko te tauhi ʼo te ʼu ōvi pea mo te ʼu lekula moʼo fakatokatoka te ʼu fihifihia ʼo te maʼuli faka Kilisitiano. ʼE nātou toe vakaʼi te ʼu meʼa ʼaē ʼe akoʼi e te Tohi-Tapu ʼo ʼuhiga mo te ʼu lao, mo te ʼu fai fakamāu, pea mo te fakatuʼutuʼu ʼo te kautahi. ʼE akoʼi tāfito nātou ki te ʼu faiakonaki ia muʼa ʼo te kaugamālie pea ʼe tokoni kia nātou takitokotahi ke nātou tuputupu vave ʼi te faʼahi fakalaumālie.
5 Te ʼu Fakamaʼua Ki Te Ako ʼAia: ʼE mahino ia ʼe maʼuhiga te ʼu meʼa ʼaē ʼe fakamaʼua ki te kau ako. Ko nātou ʼaē ʼe fia kau kiai ʼe tonu kua taʼu lua tanatou tagata ʼāfea peʼe tagata faifekau faka minisitelio. ʼE tonu ko he kau selipatea pea ʼe nātou taʼu 23 peʼe laka atu ʼo kaku ki te 50. ʼE tonu ke nātou popoto ʼi te lautohi, mo te faitohi, pea mo palalau lelei te lea ʼaē ka fakaʼaogaʼi ʼi te ako, pea ʼe mole tonu ke nātou tau mo he mahaki, peʼe nātou mulimuli ki he faʼahiga meʼa kai. ʼE filifili tāfito anai ia nātou ʼaē ʼe pionie katoa.
6 Ko nātou ʼaē ʼe fia kau ki te ako ʼaia ʼe tonu ke nātou fia gāue pea mo ʼāteaina moʼo fai ʼo te gāue ʼi he faʼahi pe ʼe ʼaoga ai. ʼE tonu ke nātou maʼu te manatu ʼo te polofeta ko Isaia, ʼaē neʼe ina foaki ia ia totonu ʼaki he loto fakamalotoloto ke ina fai he gāue makehe, ʼo ina ʼui fēnei: “Koʼeni ʼau! Fekauʼi ʼau.” (Isa. 6:8) Neʼe ina toe fakahā ʼi tona maʼuli ʼe ko he tahi ʼe agavaivai. Ko nātou ʼaē ʼe nātou fai he ʼu fakatuʼutuʼu ke feala hanatou kau ki te Ako ʼaia, ʼe tonu ke nātou fai kiai ʼuhi ko tonatou ʼofa ki te ʼu tēhina pea mo tanatou fia tokoni kia nātou, kae ʼe mole tupu ko hanatou fia hā peʼe fia maʼu tuʼulaga. ʼI tanatou ʼosi maʼu te ako lelei ʼaia, ʼe tonu ke fakaʼaogaʼi e te kau maʼu pepa te ʼu meʼa ʼaē neʼe nātou ako moʼo tokoni ki te hahaʼi.—Luka 12:48.
7 Te ʼu Lelei: Lolotoga te ʼu vāhaʼa ʼaia e valu ʼaē ʼe lahi ai tanatou ako, ko te kau ako ʼe “fafaga [nātou] aki te u folafola o te tui pea mo te akonaki lelei.” (1 Tim. 4:6) ʼAki te ako ʼaia ʼe nātou lava tokoni anai pea mo fakaloto mālohiʼi te hahaʼi ʼi te kokelekasio peʼe ko te silikosikilipisio ʼaē ka hinoʼi nātou kiai. ʼI te ʼu koga meʼa ʼaē neʼe fekauʼi kiai te kau ako ʼaia, neʼe tuputupu ai te gāue pea mo te selevisi pionie, tāfito ʼi te kau tūpulaga, pea neʼe faigafua ai te tokoni ki te hahaʼi foʼou tokolahi ʼaē ʼe ʼōmai ʼo fakatahi ki te hahaʼi ʼa te ʼAtua.
8 ʼE koutou tagata ʼāfea koa peʼe tagata faifekau faka minisitelio selipatea, ʼe taʼu 23 peʼe laka atu ʼo kaku ki te 50? He koʼe ʼe mole koutou kole ke koutou kau ki te Ako ʼAē ʼe Ina Teuteuʼi Ki Te Minisitelio? Tēhina tūpulaga, ʼe ke fakakaukauʼi koa te ʼu meʼa ʼaē ka ke fai anai ʼi te ka haʼu ʼi te tauhi kia Sehova? He koʼe ʼe mole ke faka faigafua tou maʼuli pea mo lītuʼa ki he ʼu meʼa ʼe feala ke nātou fakaleluʼi koe, ke feala hau hū ki “te matapā lahi [ʼaia ʼaē] ʼe ina taki ki te gāue”? ʼE ke maʼu ai anai he fiafia lahi. Tahi ʼaē meʼa, ko te Ako ʼaia ʼe ko he tapuakina maʼa te kau maʼu pepa ʼo te ako pea mo te ʼu kokelekasio ʼo te hahaʼi ʼa te ʼAtua ʼi te malamanei katoa.
[Talanoa ʼo te pasina 3]
Te ʼu Lelei ʼAē Neʼe Nātou Maʼu Mai Te Ako
“ ʼAki te ako, kua toe lelei age taku minisitelio pea mo ʼau lava tauhi te ʼu ōvi ʼaki taku poto ʼi te fakaʼaogaʼi ʼo te Tohi-Tapu.”
“ ʼAki te ako, ʼe mole kei ʼau tuʼania ʼi te fakahoko ʼo taku ʼu maʼua kehekehe ʼi te kokelekasio.”
“Neʼe teitei fetogi te ʼu faʼahi fuli ʼo toku maʼuli, ohage ko taku mahino ki te ʼu fakatuʼutuʼu pea mo te fakaʼaluʼalu ʼo te kautahi ʼa te ʼAtua.”
“ ʼAki te ako ʼaē neʼe ʼau kau kiai, kua ʼau mahino ki te ʼaoga ʼaē ke ʼau ʼāteaina moʼo tauhi ʼi te faʼahi ʼaē ʼe lahi ai te gāue.”