Koga Valu: Tou Fai He ʼu Ako Tohi-Tapu ʼe Tuputupu
Tou Taki Te Kau Ako Ki Te Kautahi
1. He koʼe ʼe lelei ʼi te vāhaʼa fuli lolotoga te ako, ke tou vakaʼi he manatu ʼo ʼuhiga mo te kautahi ʼa Sehova?
1 Ka tou fai he ʼu ako Tohi-Tapu, ʼe mole tou fakatuʼutuʼu pe ke tou akoʼi age te ʼu akonaki ʼaē ʼe tou tui kiai, kae ʼe tou toe fia tokoni foki ki te kau ako ke nātou fakatahi mai ki te kokelekasio. (Sakl. 8:23) Ko te kaupepa lahi Te Kau Fakamoʼoni ʼa Sehova—Logo Tahi Moʼo Fai ʼo Te Finegalo ʼo Te ʼAtua ʼi Te Malamanei ʼe tokoni mai anai ki te faʼahi ʼaia. Koutou tuku age he kaupepa ki te kau ako foʼou ʼo te Tohi-Tapu foʼou, pea mo koutou fakaloto mālohiʼi nātou ke nātou lau. Pea koutou toʼo he ʼu kiʼi minuta ʼi te vāhaʼa fuli lolotoga te ako, ke koutou vakaʼi ai he manatu ʼo ʼuhiga mo te kautahi ʼa Sehova.
2. ʼE koutou lava fakaloto mālohiʼi feafeaʼi te kau ako ʼo te Tohi-Tapu ke nātou kau ki te ʼu fono?
2 Te ʼu Fono ʼo Te Kokelekasio: Ke leleiʼia e te kau ako ʼo te Tohi-Tapu ia te kautahi ʼa te ʼAtua, ʼe tonu ke fakatahi mo tatou ʼi te ʼu fono ʼo te kokelekasio. (1 Ko. 14:24, 25) Koia, ʼe feala ke koutou palalau age kiā nātou ʼo ʼuhiga mo te ʼu fono, ʼo koutou fakamahino age ʼi takotou ʼu ako, te ʼu fono takitahi e nima. Koutou fakahā age te kupu tāfito ʼo te akonaki ki te kaugamālie. Koutou fakahā age te alatike ʼaē ka tou vakaʼi anai ʼi te Ako ʼo Te Tule Leʼo pea mo te Ako Tohi ʼo te kokelekasio. Koutou fakamahinohino age te Ako ʼo te Minisitelio Faka Teokalatike pea mo te Fono Gāue. Kapau ʼe ʼi ai hakotou kiʼi akonaki ʼi te ako, pea ʼe lagi feala ke koutou teuteuʼi liuliuga mo takotou ʼu kau ako. Koutou fakahā age te ʼu manatu maʼuhiga neʼe talanoa kiai ʼi te ʼu fono. Koutou fakaʼaogaʼi te ʼu pāki ʼo tatatou ʼu tohi moʼo tokoni kiā nātou ke nātou mahino lelei ki te fakaʼaluʼalu ʼo tatatou ʼu fono. ʼI takotou ʼuluaki fai te ako, koutou fakaafe nātou ke nātou kau ki te ʼu fono.
3. Koteā te ʼu faʼahi ʼo te kautahi ʼe feala ke tou palalau kiai?
3 Ka ōvi mai te ʼAho Fakamanatu, mo te ʼu fakatahi, pea mo te ʼaʼahi ʼo te taupau faka siliko, koutou fakaʼaogaʼi he ʼu kiʼi minuta moʼo fakamahino ki te kau ako te ʼu fakatuʼutuʼu ʼaia pea ke lahi ai tanatou fiafia. ʼAki te temi, koutou tali ki te ʼu fehuʼi ʼaenī: He koʼe neʼe mātou toʼo te higoa ʼaē ko te kau Fakamoʼoni ʼa Sehova? He koʼe ʼe mātou fakahigoaʼi te ʼu potu ʼaē ʼe mātou fono ai ko he ʼu Fale ʼo te Puleʼaga? Koteā te gāue ʼa te kau tagata ʼāfea pea mo te kau faifekau faka minisitelio? ʼE fakatuʼutuʼu feafeaʼi te gāue fai faka mafola pea mo te ʼu telituale? ʼE faʼu feafeaʼi tatatou ʼu tohi? ʼE haʼu maifea te falā ʼo te kautahi? Koteā te ʼu gāue ʼaē ʼe fai e te filiale pea mo te Kolesi Pule moʼo leʼoleʼo ia te gāue?
4, 5. ʼE fakatupu feafeaʼi e tatatou ʼu foʼi ʼata viteo he loto fakafetaʼi ki te kautahi?
4 He ʼu Foʼi ʼAta ʼe ʼAoga Anai: Ko te tahi faʼahi moʼo tokoni ki te kau ako Tohi-Tapu ke nātou mahino ki te kautahi taulekaleka ʼa Sehova ʼe ko tatatou ʼu foʼi ʼata viteo. Ko te foʼi ʼata Jusquʼaux extrémités de la terre, ʼe fakahā ai te gāue fai faka mafola ʼaē ʼe fai ʼi te malamanei kātoa; ko te tahi ʼata Toute la communauté des frères, ʼe fakahā ai tatatou fale tautēhina ʼi te kele kātoa; pea mo te tahi foʼi ʼata, Unis grâce à lʼenseignement divin ʼaē ʼe fakahā ai te logo tahi ʼa te kau Fakamoʼoni ʼa Sehova ʼuhi ko te akonaki fakaʼatua. Ko te fafine neʼe ina tali tatatou ʼu nusipepa pea mo te tahi ʼu tohi lolotoga taʼu e nima, neʼe tagi ʼi tana sio ki te foʼi ata Les Témoins de Jéhovah : un nom, une organisation. ʼAki te temi neʼe falala leva ki te kau Fakamoʼoni ʼaē neʼe nātou ʼaʼahi ia ia, kae ʼi tana ʼosi sioʼi te foʼi ʼata, neʼe manatu ia neʼe feala ke toe falala foki ki te kautahi. Neʼe kamata tana ako Tohi-Tapu, pea ʼi te vāhaʼa ki muli age, neʼe kau ki te ʼu fono ʼaē ʼe fai ʼi te Fale ʼo Te Puleʼaga.
5 Kapau ʼe tou fakaʼaogaʼi he ʼu kiʼi minuta ʼi te vāhaʼa fuli mo tatatou kau ako pea mo tou fakaʼaogaʼi te ʼu tokoni ʼaē ʼe foaki mai, ʼe feala māmālie anai ke tou taki nātou ki te kautahi ʼaē ʼe fakaʼaogaʼi e Sehova ia ʼaho nei.