Te Fagonogono ʼAki Pe Tatatou Aga
1 Logola ko te ʼu meʼa ʼaē neʼe faʼu e Sehova ʼe mole palalau, kae ʼe ʼiloga ʼi tana ʼu fakatupu ʼaia tona ʼu kalitātē fakapulipuli. (Pes. 19:1-3; Loma 1:20) ʼO toe feiā pe, ko tatatou aga ʼaē ʼe lelei, mo te ʼu kalitātē faka Kilisitiano, pea mo tatatou agavaivai, ʼe ko he faʼahiga fai fagonogono ʼaia. (1 Pet. 2:12; 3:1-4) ʼE tou fakaʼamu fuli ke tou “fakamataleleiʼi . . . te akonaki ʼo totatou Hāofakiʼaga, ia te ʼAtua, ia meʼa fuli.”—Tito 2:10, MN.
2 E feala koa ki he ʼu hahaʼi heʼe haohaoa hanatou fakamataleleiʼi te ʼu akonaki faka Tohi-Tapu? ʼAki te Folafola ʼa te ʼAtua pea mo te mālohi ʼa te laumālie maʼoniʼoni, ʼe feala ki ni hahaʼi heʼe haohaoa ke nātou fai ia te faʼahi ʼaia. (Pes. 119:105; 143:10) Ko te Folafola ʼa te ʼAtua “ ʼe maʼuli pea mo mālohi, pea ʼe māsila age ia ʼi te heletā mata lua fuape.” (Hep. 4:12, MN ) ʼE ʼulu ki ʼotatou loto pea ʼe ina faka fealagia mai ke tou kofuʼi te ʼulugaaga foʼou. (Kol. 3:9, 10) Ko te laumālie maʼoniʼoni ʼe ina fakatupu iā tatou te ʼu kalitātē matalelei, ohage la ko te agalelei, mo te agaʼofa, mo te agamālū, pea mo te loto lolomi. (Ka. 5:22, 23) ʼE tou tuku koa ia te Folafola ʼa te ʼAtua pea mo tona laumālie ke nā gāue ʼi totatou maʼuli?—Ef. 4:30; 1 Tes. 2:13.
3 ʼE Tokagaʼi Tatatou Aga e Te Hahaʼi: ʼE tokagaʼi tatatou aga e te hahaʼi mo kapau ʼe tou maʼuliʼi te ʼu pelesepeto ʼa Sehova pea mo tou faiga ke hā iā tatou tona ʼu kalitātē. Ohage la, ko te tagata neʼe fakalainoaʼi e tona ʼu kaugā gāue he neʼe leka. Kae ko te tuagaʼane ʼaē neʼe gāue tahi mo ia ʼi te pilo neʼe fakaʼapaʼapa tuʼumaʼu pe kiā ia. Ko te aga ʼaia ʼa te tuagaʼane neʼe malave ki te tagata, ʼo ina fehuʼi age pe koʼe ʼe kehe ia mo tonā ʼu kaugā gāue. Neʼe ʼui age e te tuagaʼane, ʼe tupu tana aga fakaʼapaʼapa heʼe ina maʼuliʼi te ʼu pelesepeto faka Tohi-Tapu. Neʼe ina toe fakahā age ki te tagata te ʼamanaki taulekaleka ʼo ʼuhiga mo te Puleʼaga. Neʼe kamata ai leva te ako Tohi-Tapu ʼa te tagata pea neʼe tuputupu ʼo aʼu ki tana papitema. ʼI tana liliu ki tona fenua, neʼe punamaʼuli tona ʼu kāiga ʼi tana aga pea tokolahi iā nātou neʼe nātou tali ia te moʼoni.
4 ʼE tou fakaʼamu ki totatou ʼu kaugā gāue, mo totatou ʼu kaugā ako, peʼe ko totatou famili pea mo te hahaʼi ʼo te vāhaʼa fale, ʼi tanatou sisio ki tatatou agalelei mo tatatou fagonogono, ke tupu ai hanatou faka kolōlia ki te ʼAtua.—Mat. 5:16.