Te Polokalama ʼo Te Fakatahi Faka Siliko ʼAē Ka Hoko Mai

ʼE loto e te hahaʼi ʼo te malamanei ke tou faka tui ko te tuʼu ʼo te ʼu faʼahiga meʼa ʼaenī ʼe tuʼu anai ʼo talu ai. Kae ʼe mole ko te manatu ʼaia ʼe tuʼu ʼi te Folafola ʼa te ʼAtua. (1 Soa. 2:​15-17) Ko te ʼAtua ʼaki tana Folafola ʼe tokoni mai ke tou mahino ʼe vaʼiganoa hakita ‘tānaki ʼo he ʼu koloā ʼi te kele.’ Moʼo faka mālohiʼi te ʼu kaugana ʼa te ʼAtua, ko te polokalama ʼo te fakatahi faka siliko 2007 ʼe talanoa anai ki te kupu tāfito ʼaenī: “Koutou Tānaki . . . He ʼu Koloā ʼi Selo.”​—Mat. 6:​19, 20, MN.

Ko te mānumānu koloā ʼe kau ki te ʼu meʼa ʼaē ʼe talanoa kiai te koga tohi ʼo Efeso 2:2 (MN ), ʼaē ko “te pule ʼo te mālohi ʼo te ʼaele, te laumālie ʼaē ʼe gāue ʼi te temi nei ki te ʼu foha ʼo te talagataʼa.” Ohage pe ko te ʼaele ʼaē ʼe maʼu ʼi te ʼu potu fuli pea ʼe tou mānava kiai ʼi te temi fuli pe, ʼe toe feiā mo te mafola ʼo “te manatu ʼo te malamanei.” (1 Ko. 2:​12, MN ) Mai tona ʼaluʼaga ʼaē, ʼe mālohi ia tana fakahala, ʼe ʼui ko te “pule.” Ko te polokalama ʼo te fakatahi faka siliko ʼaē ka hoko mai, ʼe tokoni mai anai ke tou tekeʼi te mānumānu koloā ʼo te malamanei pea ke tou fakamuʼamuʼa tuʼumaʼu ia te ʼu gāue ʼaē ʼe maʼuhiga tāfito. (Mat. 6:33) Tahi ʼaē, ʼe tokoni mai anai te polokalama ke tou falala kiā Sehova mokā tou fai ia tatatou minisitelio logola ia te ʼu fihifihia pea mo te ʼu faigataʼaʼia ʼaē ʼe feala ke tau mo tatou.

Koutou faiga ke koutou kau ki te ʼu ʼaho e lua ʼo te fakatahi pea ke ‘lahi age takotou fakalogo.’ (Hep. 2:1) Koutou tohi te ʼu puani ʼaē ʼe feala ke koutou maʼuliʼi ʼi tokotou maʼuli pea mo takotou minisitelio. Ka koutou kau mai te kamata ki te fakaʼosi ʼo te polokalama fakalaumālie lahi ʼaia, ʼe koutou lotomālohi anai pea mo mālolohi moʼo hoko atu ‘te tānaki ʼo he ʼu koloā ʼi selo’!