Tou Tala Te ʼu Kalitātē ʼo Sehova
1. Koteā ʼaē ʼe ina uga tātou ke tou tala ia te ʼu kalitātē ʼo Sehova?
1 “ ʼA koe, Ê Sehova, te māʼoluga, mo te mālohi, mo te taulekaleka, mo te takimuʼa, pea mo te ʼalikisia; heʼe ko meʼa fuli ʼi te lagi pea mo te kele, ʼe ʼa koe.” (1 Fkma. 29:11) ʼE uga feafeaʼi tātou e totatou ʼofa pea mo totatou loto fakafetaʼi kiā Sehova? ʼE ina uga tātou ke tou ‘faka mafola te ʼu kalitātē ʼo ia ʼaē neʼe ina pāui tātou mai te fakapōʼuli ki tona mālama taulekaleka.’ (1 Pet. 2:9) ʼE mole feala ke tou tuku tatatou palalau ki te hahaʼi ʼo ʼuhiga mo totatou ʼAtua lahi! ʼE tou maʼu anai he ʼu faigamālie makehe moʼo tala te ʼu kalitātē ʼo Sehova lolotoga te ʼu māhina ʼo Malesio, mo ʼApelili, pea mo Maio.
2. Ko te gāue makehe fea ʼaē kua fakatuʼutuʼu moʼo tala ia te ʼAho Fakamanatu, pea ko ai ʼaē ʼe feala ke kau kiai?
2 Te Gāue Makehe Moʼo Tala Te ʼAho ʼo Te Fakamanatu: ʼI te Mōnite, ʼaho 2 ʼo ʼApelili, ʼe tou faka maʼuhigaʼi ai anai ia te ʼu kalitātē ʼo Sehova ʼaki tatatou fakamanatuʼi ia te Taumafa ʼo te ʼAliki. Ko he pepa fakaafe makehe ki te toʼotoʼoga maʼuhiga ʼaia ʼe tufa anai ʼi te kele kātoa, mai te ʼaho 17 ʼo Malesio ʼo aʼu ki te ʼaho 2 ʼo ʼApelili. ʼE fakaloto mālohiʼi te kau fai faka mafola fuli ke natou lagolago mālohi ki te tufa ʼaia. ʼE ko he temi faigamālie ʼaia maʼa te ʼu ako foʼou ke natou kamata kau ki te tala ʼo te logo lelei mo kapau kua ʼalutahi tonatou maʼuli mo te ʼu meʼa ʼaē ʼe fakamaʼua mai ʼi te Tohi-Tapu. Kapau ʼe ʼi ai hakotou kau ako Tohi-Tapu peʼe ko hakotou fānau ʼe feala ke natou fai faka mafola, kotou ʼolo ʼo palalau mo te kau tagata ʼāfea.
3. Koteā ʼaē ʼe feala ke tou ʼui moʼo fakaafe te hahaʼi ki te ʼAho Fakamanatu?
3 ʼE tatau anai ia te gāue ʼaia mo te gāue ʼaē neʼe fai ʼo ʼuhiga mo te Fakatahi Faka Tisitilike, ʼaē ko tona kupu tāfito: “Kua Ovi Mai Ia Te Haofaki!” ʼE momoli anai ki te ʼu kōkelekāsio he ʼu pepa fakaafe ʼe feʼauga, ke feala ki te kau fai faka mafola ke natou maʼu takitokotahi hanatou ʼu pepa e taki 30 pea ʼe feala ke foaki ki te kau pioniē takitokotahi tanatou ʼu pepa fakaafe e 80. Kotou fakanounou takotou ʼu ʼuluaki palalau. ʼE feala ke kotou ʼui fēnei: “Koʼenī tau pepa fakaafe ki te toʼotoʼoga maʼuhiga ʼe fai ʼi te taʼu fuli. ʼE matou fiafia anai te tali ʼo koe. ʼE ke maʼu anai he tahi ʼu fakamahino ʼi te pepa fakaafe ʼaenī.” Kapau ʼe ʼi ai hana ʼu fehuʼi, pea kotou fakaloaloaga te fai palalau moʼo tali kiai. ʼO ʼuhiga mo te Taumafa ʼo te ʼAliki, ʼe feala ke kotou fakaʼaogaʼi te ʼalatike ʼaē ʼe tuʼu ʼi te kupu tāfito Te Tahi ʼu Fakamahino, ʼi te tohi Te Ako Mai Te Tohi-Tapu, ʼi te pāsina 206. ʼI te ʼu fakaʼosi vāhaʼa, ʼe tou tufa anai te ʼu nusipepa pea mo te pepa fakaafe. Kotou tohi te hahaʼi ʼaē neʼe fia logo, pea mo fakatuʼutuʼu ke kotou toe ʼaʼahi ia nātou.
4. ʼE lava tufa feafeaʼi ia te kiʼi pepa fakaafe ʼo te ʼAho Fakamanatu?
4 ʼE tonu ke kotou tuku te kiʼi pepa fakaafe ki te hahaʼi fuli ʼi tonatou ʼapi. Koia, kotou tohi te ʼu ʼapi ʼaē ʼe lāvaki, pea kotou fakatuʼutuʼu ke kotou toe liliu kiai ʼi he tahi temi. Ko te ʼu kōkelekāsio ʼaē ʼe lahi tanatou ʼu pepa fakaafe kei toe, ʼe feala ke natou tuku he ʼu pepa ʼi te ʼu ʼapi ʼaē neʼe lāvaki ʼi te vāhaʼa fakaʼosi pē ʼi muʼa ʼo te ʼAho Fakamanatu, kae mole fai anai ʼi muʼa atu. Kotou tōkakaga ʼo foaki he kiʼi pepa fakaafe ki takotou ʼu ʼaʼahi, mo takotou kau ako Tohi-Tapu, mo takotou ʼu kāiga, mo takotou ʼu kaugā gāue, mo takotou ʼu vāhaʼa fale, pea mo takotou ʼu feʼilo.
5. He koʼē ʼe tonu ke tou kamata fai atu ʼi te temi nei he ʼu fakatuʼutuʼu ke tou pioniē vaeluaʼi temi?
5 Te Selevisi Pioniē Vaeluaʼi Temi: ʼE feala koa ke toe lahi age takotou faka mafola ia te ʼu kalitātē ʼo Sehova ʼaki hakotou toʼo te selevisi pioniē vaeluaʼi temi ʼi Malesio, mo ʼApelili, pea mo Maio? ʼE lagi tonu anai ke kotou fai he ʼu fetogi ʼi takotou polokalama. (Efe. 5:15-17) Ke mahino papau kiā koutou, kapau ʼe kotou faiga ke lahi age takotou gāue ʼaē kiā Sehova, pea ʼe kotou maʼu anai te fiafia pea mo te tapuakina ʼa Sehova. (Taag. 10:22) Kua ovi mai te ʼAho Fakamanatu, koia ʼe tonu ke tou foimo fai ʼi te temi nei he ʼu fakatuʼutuʼu.—Taag. 21:5.
6. Koteā ʼaē ʼe tou lava ako ʼaki ia te faʼifaʼitaki ʼa te tuagaʼane taʼu 90 ʼaē neʼe pioniē vaeluaʼi temi ʼi te taʼu ʼaenī kua hili?
6 Ko te tuagaʼane kua taʼu 90 neʼe pioniē vaeluaʼi temi ʼi te taʼu ʼaenī kua hili. Neʼe ina ʼui fēnei: “Logolā ʼe au leleiʼia ʼaupitō te fai ʼōloto pea neʼe au fia kamata tō ʼakau, kae neʼe mahino kiā au ʼe ʼi ai te ʼu meʼa neʼe tonu ke au fakamuʼamuʼa. ʼI taku fia fakamuʼamuʼa ia te ʼu gāue ʼo te Puleʼaga, neʼe au fakatuʼutuʼu ke au pioniē vaeluaʼi temi ʼi Malesio.” Neʼe tapuakina koa te ʼu faiga ʼa te tuagaʼane? ʼE ina ʼui fēnei: “Neʼe au logoʼi taku feōvi ʼaupitō mo te ʼu tehina mo tuagaʼane, pea neʼe au fakaovi ʼaupitō ai kiā Sehova.” ʼE feala koa ke kotou vakavakaʼi te ʼu meʼa ʼaē ʼe kotou fakamuʼamuʼa pea ohagē ko te tuagaʼane, ke kotou fai te ʼu fetogi ʼaē ʼe ʼaoga?
7. ʼE faigataʼa koa te toʼo ʼo te selevisi pioniē vaeluaʼi temi?
7 ʼE lagi mole faʼa faigataʼa fau te maʼu ʼaē ʼo te ʼu hola e 50 ʼo te selevisi pioniē vaeluaʼi temi. Kotou vakavakaʼi ʼi te faikole, takotou ʼu gāue ʼi te ʼaho fuli, kotou fai he polokalama, pea kotou tohi ʼi takotou polokalama faka teokalatike. ʼE kotou ʼiloʼi lelei tokotou ʼu ʼaluʼaga takitokotahi. Kapau ʼe kotou mahamahaki pea mo pelepelegesi, pea ʼe lagi feala ke kotou fai faka mafola ʼi he ʼu hola e lua ʼi te ʼaho fuli. Kapau ʼe kotou gāue faka mālama ʼaho kātoa peʼe kotou ʼolo ʼo ako, ʼe feala ke kotou pioniē vaelua temi ʼo kau ki te minisitelio ʼi te ʼu afiafi peʼe ʼi te ʼu fakaʼosi vāhaʼa.
8. Koteā ʼaē neʼe ina faka fealagia ki te taumātuʼa ke nā pioniē vaeluaʼi temi?
8 Neʼe tokolahi te ʼu fāmili neʼe natou pioniē vaeluaʼi temi. ʼI te ʼu taʼu ki muʼa atu, ko te taumātuʼa neʼe nā lotolotolua he neʼe nā manatu, ʼuhi ko tonā ʼu ʼaluʼaga, neʼe mole feala ke nā pioniē vaeluaʼi temi. Koteā ʼaē neʼe nā fai? “Neʼe mā faikole kiā Sehova ke tokoni mai ke mā fakahoko te meʼa ʼaē neʼe mā loto toko lua ki ai talu mai fualoa.” ʼI tanā fakatuʼu he polokalama lelei, neʼe feala ai leva ke nā fakahoko tanā fakatuʼutuʼu. Neʼe nā toe ʼui fēnei: “Neʼe ko he gāue lelei, pea neʼe lahi te ʼu tapuakina neʼe mā maʼu ai. ʼE mā tokoni atu ke kotou ʼahiʼahiʼi muʼa. Kapau neʼe mā lava toʼo te selevisi, pea ʼe lagi kotou toe lavaʼi mo koutou.”
9. Koteā ʼaē ʼe feala ke kotou fai ʼi takotou ako faka fāmili moʼo teuteuʼi te ʼu māhina gāue makehe ʼaē kā hoko mai?
9 He koʼē ʼe mole kotou toʼo he temi ʼi takotou ako faka fāmili moʼo vakavakaʼi peʼe feafeaʼi hakotou hikihiki ʼo takotou lagolago ki te minisitelio ʼi te ʼu māhina kā hoko mai? Tatau aipē peʼe mole feala ke toʼo e tokotou fāmili kātoa ia te selevisi pioniē vaeluaʼi temi, kae ʼe lagi feala ki he tokotahi ke ina fai ia te faʼahi ʼaia ʼaki te tokoni pea mo te lagolago ʼa te fāmili. Kapau ʼe mole feala, pea lagi fakatuʼutuʼu anai e tokotou fāmili ke natou hikihiki tonatou ʼu hola ʼi te minisitelio ʼi te ʼu māhina gāue makehe ʼaia.
10. He koʼē ʼe tonu ke tou palalau ki niʼihi ʼo ʼuhiga mo totatou loto ʼaē ke tou pioniē vaeluaʼi temi ʼi te ʼu māhina ʼo te Fakamanatu?
10 Tou Fetokoniʼaki: ʼE feala ke malave ki niʼihi tokotou loto fiafia. Kotou palalau kiā nātou ʼo ʼuhiga mo takotou fia toʼo ia te selevisi pioniē vaeluaʼi temi. ʼE ina uga ai anai ʼihi ke natou toʼo mo nātou. Tahi ʼaē meʼa, ko nātou ʼaē neʼe pioniē ʼi muʼa atu, ʼe feala ke natou foaki atu he ʼu tokoni ʼe ʼaoga anai kiā koutou moʼo fai hakotou ʼu fakatuʼutuʼu pea mo he polokalama ke kotou toʼo te selevisi. (Taag. 15:22) Kapau ʼe feala ke kotou pioniē vaeluaʼi temi, pea he koʼē ʼe mole kotou fakaafe he tahi kau fai faka mafola, lagi ko he tahi ʼe tatau tona ʼaluʼaga mo koutou, ke kau fakatahi mo koutou ʼi te selevisi?
11. ʼE lava fakatuputupu feafeaʼi e te kau tagata ʼāfea ia te fiafia ʼi te kau fai faka mafola ke natou pioniē vaeluaʼi temi ʼi te ʼu māhina kā hoko mai?
11 Tokolahi te kau tagata ʼāfea ʼe natou fai te ʼu fakatuʼutuʼu ʼaē ʼe ʼaoga ke natou kau ki te selevisi makehe ʼaia. (Hep. 13:7) ʼE ko he fakaloto mālohi ʼaia ki te kōkelekāsio! ʼE toe fakatuputupu e te kau tagata ʼāfea ia te fiafia ʼi tanatou ʼu fai palalau mo ʼihi. Ko he ʼu palalau fakaloto mālohi peʼe ko he ʼu tokoni ʼaoga ʼe lagi feʼauga pē anai moʼo uga ʼihi ke natou pioniē vaeluaʼi temi. Ko te tehina taupau ki te gāue ʼe lagi ina fakatuʼutuʼu anai he tahi ʼu fono ki te fai faka mafola, ke feala ke kau ia te kau fai faka mafola fuli ki te gāue ʼaia, māʼiapē lā ʼi te ʼosi gāue peʼe ʼi te ʼosi ako. ʼE fakahā putuputu anai ia te ʼu fakatuʼutuʼu ʼaia ʼi te ʼu fono. ʼE tokaga anai ke feʼauga te ʼu telituale pea mo te ʼu tohi maʼa te kau fai faka mafola fuli.
12. Koteā ʼaē ʼe feala ke tou fai mo kapau ʼe mole feala ke tou pioniē vaeluaʼi temi?
12 Tatau aipē peʼe mole feala ke tou pioniē vaeluaʼi temi, kae ʼe feala ke tou fakaloto mālohiʼi ia nātou ʼaē ʼe pioniē, pea mo tou faikole maʼa nātou. (Taag. 25:11; Kol. 4:12) ʼE lagi feala ke tou fakatuʼutuʼu ke tou fai faka mafola mo nātou ʼi he ʼaho ʼi te vāhaʼa, peʼe ke loaloaga age tatatou fai faka mafola ʼi te agamāhani.
13. Koteā ia te fakatuʼutuʼu ʼaē ʼe fai ʼo ʼuhiga mo Niu-Kaletonia, mo Vanuatu, pea mo ʼUvea mo Futuna, pea ʼe lava fakahoko feafeaʼi e te ʼu kōkelekāsio ia te fakatuʼutuʼu ʼaia?
13 Ke Maʼu He ʼu Pioniē Vaeluaʼi Temi e Toko 370 ʼi ʼApelili: ʼI ʼApelili 2000, neʼe maʼu te tupu foʼou ʼi te ʼu pioniē vaeluaʼi temi ʼi Niu-Kaletonia neʼe ko te toko 323, ʼi Malesio 1997 neʼe ko te toko 59 ʼi Vanuatu, pea ʼi Malesio 2003 neʼe ko te toko 17 ʼi ʼUvea. Koia, ko te fakatuʼutuʼu ki te māhina ʼaenī ʼo ʼApelili, ke maʼu he toko 370 kau pioniē vaeluaʼi temi ʼi te ʼu motu fakatahi: ko te toko 300 ʼi Niu-Kaletonia, mo te toko 60 ʼi Vanuatu, pea mo te toko 10 ʼi ʼUvea. ʼE feala ke tou fakahoko te fakatuʼutuʼu ʼaia mo kapau ko te tokotahi ʼi te toko ono kau fai faka mafola ʼi te ʼu kōkelekāsio takitahi, ʼe ina toʼo ia te selevisi pioniē vaeluaʼi temi. ʼE mahino papau ia, ʼi ʼihi kōkelekāsio ʼe laka age anai te kau fai faka mafola ʼaē kā feala ke nātou pioniē vaeluaʼi temi. ʼE lahi te ʼu kōkelekāsio ʼe faigafua anai hanatou fakahoko ia te fakatuʼutuʼu ʼaia. Kotou fakakaukauʼi age muʼa ia te fiafia ʼi tokotou kōkelekāsio, pea mo tona fua lelei ki te gāue fai faka mafola ʼi takotou telituale!
14. He koʼē ʼe lelei te māhina ʼo ʼApelili ki te selevisi pioniē vaeluaʼi temi?
14 He koʼē ʼe lelei te māhina ʼo ʼApelili ki te selevisi pioniē vaeluaʼi temi? ʼE fai anai te ʼAho Fakamanatu ʼi te kamata ʼo te māhina, pea ʼe ko he ʼu faigamālie ʼaia maʼa tātou ke tou ʼaʼahi ia nātou ʼaē neʼe kau kiai. ʼE tou tufa anai te ʼu nusipepa, ʼaki te fakatuʼutuʼu ʼaē ke tou tuku te tohi Te Ako Mai Te Tohi-Tapu ki te ʼu ʼaʼahi pea mo kamata he ʼu ako Tohi-Tapu. Koia, ʼe maʼu anai he ʼu faigamālie ʼi ʼApelili, ke kotou kamata ai he ʼu ako Tohi-Tapu mo kapau ʼe kotou pioniē vaeluaʼi temi. Ko ʼAhotapu e nima ʼi ʼApelili pea mo he ʼaho mālōlō e tahi, ʼo faigafua ai ke pioniē vaeluaʼi temi ia nātou ʼaē ʼe gāue fakamālama pea mo nātou ʼaē ʼe ako.
15. He koʼē ʼe mole tonu ke tou fakaʼauʼauganoa ʼi te ovi mai ʼo te ʼAho Fakamanatu?
15 Kā fakalaka he ʼAho Fakamanatu pea ʼe toe ʼāsili age tatatou fakaovi ki te fakaʼosi ʼo te tuʼu ʼaenī. Kua nounou te temi ʼaē ʼe kei toe ke tou palalau ai ki te hahaʼi ʼo ʼuhiga mo totatou ʼAtua lahi. (1 Ko. 7:29) Kā ʼosi te ʼAho Fakamanatu ʼaenī, pea ko te ʼu faigamālie ʼaē ke tou fakavikiviki ai ki tatatou Tamai ʼaē ʼe ʼi selō ʼe hoko atu anai ʼo talu ai. ʼOfa pē ke tou teuteuʼi atu ʼi te temi nei ke tou faiga mālohi ʼi te ʼu māhina ʼo Malesio, mo ʼApelili, pea mo Maio ke tou tala ia te ʼu kalitātē ʼo Sehova!
[Paki ʼo te pasina 4]
ʼE Feala Koa Ke Tou Maʼu He ʼu Pioniē Vaeluaʼi Temi e Toko 370 ʼi ʼApelili?
◼ Kotou vakavakaʼi te ʼu meʼa ʼaē ʼe kotou fakamuʼamuʼa
◼ Kotou fai palalau faka fāmili ʼo ʼuhiga mo te ʼu fakatuʼutuʼu
◼ Kotou palalau ki niʼihi ʼo ʼuhiga mo takotou ʼu fakatuʼutuʼu