Ko Te Kōkelekāsio Kātoa ʼe Feala Ke Kau Ki Te Fai ʼo He ʼu Tisipulo Foʼou
1 ʼE mole gata pē ki te ʼu faiga ʼa he tokotahi ʼaē ʼe liliu ai he tahi ko he tisipulo foʼou. ʼE feala ke fakaʼaogaʼi e Sehova tana “kau kaugā gāue” fuli moʼo tokoni ki he kau ako Tohi-Tapu ke natou tuputupu ʼi te faʼahi fakalaumālie. (1 Ko. 3:6-9) ʼE tou tokoni takitokotahi ki te hahaʼi ʼaē ʼe foʼofoʼou mai ʼaki tatatou ʼu tali ʼi te ʼu fono pea mo tatatou aga ʼaē ʼe lelei, ʼaē ʼe fakahā lelei ai te gāue ʼo te laumālie ʼo te ʼAtua ʼi totatou maʼuli. (Soa. 13:35; Kal. 5:22, 23; Efe. 4:22, 23) Koteā te tahi ʼu faʼahi ʼe feala ke fai moʼo tokoni kiā nātou ʼe foʼofoʼou mai?
2 Te Meʼa ʼAē ʼe Feala Ke Fai e Te Kōkelekāsio: Ko tātou fuli ʼe feala ke tou tōkakaga kiā nātou ʼaē ʼe kamata kau ki te ʼu fono, ʼo tou ʼolo ʼo ʼalofa kiā nātou pea mo fai palalau mo nātou ʼi muʼa pea ʼi te hili ʼo te ʼu fono. ʼI tana manatuʼi tana ʼuluaki kau ʼaē ki te fono, neʼe ʼui fēnei e te tehina: “ ʼI te ʼaho ʼaia, neʼe au felāveʼi mo ni ʼu hahaʼi tokolahi ʼe aga ʼofa, mole matou feʼiloʼiʼaki, neʼe mole heʼeki au felāveʼi ʼi he ʼaho mo ni hahaʼi fēia ʼi te ʼēkelesia ʼaē neʼe au lahilahi ai. Neʼe ko he fakamoʼoni lelei ʼaia ʼo taku kua maʼu te moʼoni.” Neʼe papitema hili māhina e fitu ki tana ʼuluaki kau ki te fono.
3 Kotou vikiʼi fakamālotoloto ia ia ʼaē ʼe ako Tohi-Tapu ʼi tana tuputupu ʼi te faʼahi fakalaumālie. ʼE ina lolotoga kātakiʼi koa te fakafeagai? ʼE kau tuʼumaʼu koa ki te ʼu fono? Neʼe lototoʼa koa ʼo fai hana tali ʼi te fono? Kua kau koa ki te Ako Faka Teokalatike peʼe kua kamata fai faka mafola? Kotou vikiʼi ia ia ʼi tana tuputupu ʼaia. ʼE fiafia ai pea mo lotomālohi ai.—Taag. 25:11.
4 Te Meʼa ʼAē ʼe Feala Ke Fai e Ia ʼAē ʼe Ina Fai Te Ako Tohi-Tapu: Ko ʼihi kau fai faka mafola neʼe natou tokoni ki tanatou kau ako Tohi-Tapu ke natou feʼiloʼiʼaki mo te kōkelekāsio, ʼo natou kole ki ʼihi kau fai faka mafola ke natou kaugā ʼolo mo nātou ki te ako. Kotou foimo fakaafe ia ia ʼaē ʼe ako ke kau ki te ʼu fono. Kā kamata kau ki te fono, kotou fakatuʼutuʼu ke feʼiloʼiʼaki mo ʼihi ʼi te kōkelekāsio. ʼE ina tauʼi koa hona vaivaiʼaga, ohagē ko te suluka? ʼE ʼi ai koa he tahi ʼi tona loto fale ʼe fakafeagai ki tana ako? ʼE feala ke fua lelei kiā ia hana palalau mo he kaugā fagona neʼe ina tauʼi he faigataʼa fēia.—1 Pet. 5:9.
5 ʼE ʼaoga kiā nātou ʼaē ʼe foʼofoʼou mai ke tokoni te kōkelekāsio kiā nātou ʼi te faʼahi fakalaumālie. ʼE feala ke tou tokoni fuli kiā nātou ke natou tuputupu, ʼo tou fakahā takitokotahi ia tatatou tōkakaga moʼoni ʼaē kiā nātou.