Tou Mulimuli Iā Kilisito ʼo Tou Fakahā Te Fakaʼapaʼapa
1. Koteā te pikipikiga ʼo te kupu tāfito ʼo te fakatahi ʼo te taʼu ʼaenī pea mo te fakahā ʼo te fakaʼapaʼapa?
1 ʼE ʼui ʼi te Tohi-Tapu ʼo ʼuhiga mo te Tuʼi ʼAliki ʼo Te ʼAtulaulau ko Sehova, ʼe teu ʼaki te fakaʼapaʼapa. (Pes. 104:1) Neʼe palalau pea mo gāue tuʼumaʼu pē ia Sesu moʼo faka maʼuhigaʼi ia tana Tamai pea mo Tana ʼu fakatuʼutuʼu. (Soa. 17:4) Ko tātou takitokotahi ʼe tou maʼu anai ia te ʼu faigamālie ke tou faʼifaʼitakiʼi ia Sesu pea mo faka kolōliaʼi ia Sehova ʼi tatatou Fakatahi Faka Tisitilike kā hoko mai, ʼaē ko tona kupu tāfito “Kotou Mulimuli Iā Kilisito!”
2. ʼE feafeaʼi hatatou faka maʼuhigaʼi ia Sehova ʼaki te teuteu ʼaē ʼe kita fai ke kita kau ki te polokalama kātoa?
2 Ko He Tauhi ʼe Fakahā Ai Te Fakaʼapaʼapa: ʼE feala ke tou faka maʼuhigaʼi ia Sehova, ʼo tou fakatuʼutuʼu ke tou kau ki te taumafa fakalaumālie ʼaē neʼe ina teuteuʼi maʼa tātou. Kua kotou palalau koa ki takotou pātolō pea mo fakatuʼutuʼu takotou gāue ke kotou lava kau ai ki te ʼu ʼaho fuli ʼo te fakatahi, ʼo fēia mo te Feliaono? Kua kotou fakatuʼutuʼu koa ke kotou ʼomai tautonu moʼo tāʼofi hokotou hekaʼaga pea mo kau ki te kātiko pea mo te faikole ʼo te kamata? Kua kotou fakakaukauʼi koa ki takotou kai ʼi te fetapa ke feala hakotou kakai ʼi te koga meʼa ʼaē ʼe fai ai te fakatahi mo tokotou ʼu tehina? ʼI te kamata ʼo te ʼu polokalama fuli, mokā fakaafe mai tātou e te tehina pelesitā ke tou ʼolo ʼo heheka ʼi muʼa ʼo te kamata ʼo te musika, ʼe tonu ke tou fakagata tatatou fai palalau pea mo tou heheka ʼo fakalogologo ki te kamata ʼo te polokalama.
3. ʼE feafeaʼi tatatou fakaʼapaʼapa ki tatatou tauhi ʼi tatatou fakalogo lelei ki te polokalama?
3 ʼE tou toe faka maʼuhigaʼi tatatou Tamai ʼi selō mo kapau ʼe tou fakalogo lelei ki te polokalama. ʼI tana ʼosi kau ki te fakatahi faka tisitilike, neʼe tohi e te tagata gāue ʼi te sulunale ia te punamaʼuli ʼa te hahaʼi ʼaē neʼe ʼomai ʼo sisio ki te fakatahi, ki “te faʼifaʼitaki lelei ʼo nātou ʼaē neʼe kau kiai, he neʼe natou fakalogo lelei ki te ʼu akonaki, ʼo natou fakaʼapaʼapa pea mo nonofo fakalogologo, pea neʼe hā ai tanatou fia logo ki he ʼu manatu fakalaumālie.” Neʼe ina toe vikiʼi “te tuʼuga tamaliki . . . neʼe teuteu lelei pea neʼe natou haga kumi te ʼu vaega ʼi te Tohi-Tapu.” Lolotoga te polokalama, ʼe mole ko te temi ʼaia ke tou fai palalau ai, peʼe fai ai he ʼu SMS, peʼe tou kakai, peʼe tou taka ʼi tuʼa. ʼE tonu ke heheka te kau tūpulaga mo tanatou ʼu mātuʼa, ke feala ai ki te ʼu mātuʼa ke natou tokoni ke fua lelei ia te polokalama ki tanatou fānau. (Teu. 31:12; Taag. 29:15) Ko te ʼu faiga ʼaia ʼe ko he fakaʼapaʼapa ʼaia ki te hahaʼi pea mo he fakafetaʼi ki te meʼa kai fakalaumālie maʼuhiga ʼaē ʼe foaki mai.
4. He koʼē ʼe tonu ke fakaʼapaʼapa totatou ʼu teu pea mo te gaohi ʼo totatou lauʼulu mokā tou kau ki te fakatahi?
4 Tou Fakaʼapaʼapa ʼi Totatou ʼu Teu Pea Mo Te Gaohi ʼo Totatou Lauʼulu: ʼI te taʼu ʼaenī ʼe tonu ke tou toe tōkakaga fakalelei ki te ʼu faʼahi ʼaia. ʼAki totatou ʼu teu pea mo te gaohi ʼo totatou lauʼulu, ʼe tou fakahā ai totatou ʼofa ʼaē kiā Sehova pea mo te pilivilēsio ʼaē ko tātou ko tana ʼu Fakamoʼoni. ʼE tonu ke tou teuteu tuʼumaʼu ohagē ko ni hahaʼi ʼe “natou fakaʼapaʼapa ki te ʼAtua.”—1 Tim. 2:9, 10.
5. ʼE tou lava fakahā feafeaʼi te fakaʼapaʼapa ʼo totatou ʼu teu pea mo te gaohi ʼo totatou lauʼulu ʼi te ʼu temi mālōlō ʼi tuʼa atu ʼo te koga meʼa ʼaē ʼe fai ai te fakatahi?
5 ʼE tonu koa ke fakaʼapaʼapa totatou ʼu teu pea mo te gaohi ʼo totatou lauʼulu ʼi te temi pē ʼaē ʼe tou kau ai ki te polokalama? Kotou manatuʼi, tokolahi ʼe natou sioʼi anai tātou ʼi tatatou ʼai tatatou kiʼi kate ʼo te fakatahi ʼi tuʼa atu ʼo te koga meʼa ʼaē ʼe fai ai te fakatahi. Ko totatou ʼu teu pea mo te gaohi ʼo totatou lauʼulu, ʼe tonu ke ʼiloga ai tatatou kehe mo te hahaʼi ʼo te mālama. Koia, māʼiapē lā ʼi te ʼu temi mālōlō, ohagē lā mokā tou ʼolo ʼo kakai ʼi te ʼosi ʼo te fakatahi, ʼe tonu ke tou teuteu ohagē ko ni ʼu minisi ʼe natou kau ki he fakatahi faka Kilisitiano pea ʼe tonu ke fakaʼapaʼapa. ʼE ko he fakamoʼoni lahi anai kā fai! ʼE fiafia ia Sehova mokā hā ʼi totatou teuteu mo te gaohi ʼo totatou lauʼulu ko tātou ko he ʼu minisi.
6. Ko te ʼu fua lelei fea ʼaē ʼe tou maʼu ʼi te fakahā ʼo te fakaʼapaʼapa faka Kilisitiano?
6 Te ʼu Fua Lelei: Kā tou fakahā te fakaʼapaʼapa ʼi tatatou ʼu fakatahi, ʼe ko he ʼu faigamālie ʼaia moʼo fai he fagonogono pea mo maʼu e te hahaʼi ʼaē ʼe natou sioʼi tātou he ʼu manatu ʼe lelei. ʼI te ʼosi ʼa te tahi fakatahi, neʼe ʼui fēnei e te tagata pule: “Ko tamatou hoki sisioē ki he hahaʼi ʼe agalelei fēia. ʼE kotou fai te aga ʼaē ʼe fakamaʼua mai e te ʼAtua ke tou fai.” ʼE tou fefakaʼapaʼapaʼaki pea mo feʼofaʼaki pea ʼe faka kolōliaʼi ia Sehova. (1 Pet. 2:12) ʼE tou fakahā ai tatatou manavasiʼi fakaʼatua pea mo totatou loto fakafetaʼi ki te pilivilēsio ʼaē ke akoʼi tātou e tatatou Tamai. (Hep. 12:28) Tou faiga ke tou fakahā te fakaʼapaʼapa, ʼo tou fakatalitali ki te Fakatahi Faka Tisitilike ʼo te taʼu ʼaenī, ʼaē ko tona kupu tāfito “Kotou Mulimuli Iā Kilisito!”
[Talanoa ʼo te pasina 5]
Te ʼu Fakamanatu ʼo ʼUhiga Mo Te Fakatahi Faka Tisitilike
◼ Te ʼu Hola ʼo Te Polokalama: ʼI te ʼu ʼaho ʼaia e tolu, ʼe kamata anai ia te polokalama ʼo te ʼuhu ʼi te hola hiva ʼosi ʼuafulu. ʼE ʼavahi anai ia te ʼu matapā ʼi te hola valu. Kā kamata ia te polokalama musika, ʼe tonu anai kiā tātou fuli ke tou tahi ʼolo ʼo heka ki tona hekaʼaga ke kamata te polokalama ʼi te fakaʼapaʼapa. ʼI te Feliaono mo te Moeaki ʼe ʼosi anai te polokalama ʼi te hola nima ʼosi nima, pea ko te ʼAhotapu ʼe ʼosi anai te polokalama ʼi te hola fā ʼosi hogofulu.
◼ Te Taulaga Motokā: Mai tona ʼaluʼaga ʼaē ʼe mole feʼauga te taulaga motokā maʼa te ʼu motokā fuli, koia ʼe tonu anai ke fakafonufonu te ʼu motokā ke ʼaua naʼa ʼomai ʼi he motokā ko he tokotahi peʼe ko he toko lua.
◼ Te Tāʼofi ʼo Te ʼu Hekaʼaga: ʼE feala ke tou tāʼofi he ʼu hekaʼaga maʼa nātou pē ʼaē ʼe ʼomai fakatahi mo tātou ʼi te motokā peʼe ko nātou ʼo totatou loto fale pea mo nātou ʼaē ʼe tou fakaʼapi.
◼ Te Temi Kai: ʼE kole atu ke kotou ʼaumai takotou meʼa kai kae ke ʼaua naʼa kotou mavae ʼi te fakatahi ʼo ʼolo ʼo toʼo meʼa kai mai tuʼa lolotoga te temi kai. ʼE feala hakotou ʼomai mo hakotou kiʼi glacière. ʼE mole tonu ke kotou ʼaumai ki te ʼu fakatahi he ʼu foʼi glacières, pea mo he ʼu kava.
◼ Te ʼu Meʼa ʼOfa: ʼE lahi te ʼu meʼa ʼe totogi ki te ʼu fakatahi faka tisitilike. ʼAki te ʼu meʼa ʼofa ʼaē ʼe tou foaki ʼi tatatou ʼu Fale ʼo Te Puleʼaga peʼe ʼi te fakatahi, ʼe tou fakahā ai totatou loto fakafetaʼi pea mo tatatou lagolago ki te gāue faka mālamanei. Ko te ʼu seki ʼaē ʼe fai ʼi te fakatahi, ʼe tonu ke tohi ki te higoa “AEB Normandie.”
◼ Kā Hoko He Tuʼutāmaki: Neʼe fakatokagaʼi e te Selevisi ʼo te Lōpitali ʼaē ʼe tokaga fakavilivili ki te kau mahaki, tona pāuiʼi noa ʼaē ʼo ʼuhiga mo he ʼu kihiʼi meʼa noa. Kapau ʼe ʼaoga fakavilivili he faitoʼo kiā koutou ʼi te fale fakatahi, kotou kole age ki he tehina ʼe ovi atu kiā koutou, ke foimo pāui ki te selevisi ʼaē neʼe fakatuʼu e te fakatahi moʼo tokaga ki te kau mahaki, ke haʼu he tahi ʼo vakaʼi peʼe kovi te mahaki, peʼe ʼaoga ki ai he faitoʼo. Kapau leva ʼe ʼaoga ki ai he faitoʼo, ʼe pāui anai te Selevisi ʼo te Lōpitali.
◼ Te ʼu Kamela Pea Mo Te ʼu Meʼa Puke Leʼo: ʼE mole tonu anai ke hunuki te ʼu meʼa ʼaia ki te ʼu meʼa hunuki hila peʼe ko te fakatagi ʼo te fale fakatahi moʼo puke ʼo te ʼu akonaki, kae ʼe feala pē te fakaʼaogaʼi ʼo he ʼu kamela pea mo he ʼu meʼa puke leʼo mo kapau ʼe mole gaohaʼa ki te nofoʼaki.
◼ Te ʼu Kiʼi Pepa Moʼo Hoko Atu Te Fia Logo: Ko te ʼu kiʼi pepa Veuillez suivre lʼintérêt (Ke ʼAʼahi) (S-43), ʼe fakaʼaogaʼi anai moʼo tohi kiai te higoa ʼo nātou ʼaē neʼe fia logo ʼi tata fai fagonogono ʼi te fakatahi. ʼE kotou maʼu anai he ʼu kiʼi pepa fēia ʼi te selevisi ʼaē ʼe tufa ai te ʼu tohi. Ko te ʼu kiʼi pepa ʼaē ʼe tohi kiai te higoa, ʼe feala ke ʼavage ki te selevisi ʼaia peʼe ki te sīkalaipe ʼo takotou kōkelekāsio ʼi takotou fono mo takotou kōkelekāsio.—Vakaʼi Te Minisitelio ʼo Te Puleʼaga ʼo Fepualio 2005, pāsina 6.
◼ He Nofoʼaga Pea Mo He Motokā: ʼE ʼui fēnei iā Tāʼaga Lea 3:27: “ ʼAua naʼa ke fakafisi ia te meʼa ʼaē ʼe lelei kiā nātou ʼaē ʼe tonu ke fai kiai, mo kapau ʼe feala ki tou nima ke ina fai te faʼahi ʼaia.” ʼE lava feafeaʼi hakotou fai he meʼa ʼe lelei ki ʼihi ʼo ʼuhiga mo te fakatahi? Ko he kau fai faka mafola ʼe nonofo mamaʼo ʼe ʼomai anai ki te fakatahi. ʼE tonu ke fai fakatomuʼa he ʼu fakatuʼutuʼu ʼo ʼuhiga mo he ʼu nofoʼaga pea mo he motokā moʼo feʼaveʼaki nātou. Ko te kau fai faka mafola ʼaē kua mātutuʼa, mo nātou ʼaē kua māʼimoa, te kau pioniē kātoa, pea mo ʼihi atu ʼe lagi ʼaoga ke tokoni kiā nātou ʼo ʼuhiga mo te motokā peʼe ko he nofoʼaga. ʼE ko te ʼuluaki maʼua ʼaia ʼa te fāmili te tōkakaga ki te ʼu meʼa ʼaē ʼe ʼaoga kiā nātou ʼaia. (1 Tim. 5:4) Kapau ʼe mole feala, pea ʼe feala ke tokoni kiai te ʼu tehina mo tuagaʼane. (Kal. 6:10) Ko te kau taupau ʼo te ʼu ako tohi ʼe tonu ke natou vakaʼi pe ko ai ʼi tanatou ako tohi ʼe ʼaoga kiai he tokoni, ke fai ai he ʼu fakatuʼutuʼu ʼi muʼa atu ʼo te fakatahi.
◼ Ko te ʼu pepa Demande de logement (Kole ʼo He Nofoʼaga) ʼe foaki anai kiā nātou ʼaē kā kau ki te fakatahi. ʼE fakaloto mālohi ke tohi te ʼu pepa ʼaia pea mo foaki fakatomuʼa. Ko te Komitē Gāue ʼo Te Kōkelekāsio ʼe tonu ke natou sivisivi te maʼuli fakalaumālie ʼo te kaugā fagona. Neʼe fai te fakatuʼutuʼu ʼaia maʼa te kau fai faka mafola ʼaē ʼe natou tuku he faʼifaʼitaki lelei, ʼo fēia mo tanatou fānau.