ʼE Tou Fiafia ʼi Tatatou Foaki Totatou Maʼuli Ki Te Tauhi ʼAē Kiā Sehova!
1 Neʼe fiafia ia te ʼapositolo ko Paulo ʼi tana “fakaʼaogaʼi kātoa” ia tona maʼuli moʼo fakahoko tana minisitelio faka Kilisitiano. (2 Ko. 12:15) ʼO toe fēia iā ʼaho nei, tokolahi te kau Kilisitiano ʼe natou faʼafai ʼi tanatou selevisi pioniē. Ko ʼihi ʼaē ʼe lahi tonatou ʼu maʼua faka fāmili, ʼe natou fakatuʼutuʼu he temi ʼi tanatou ʼu gāue ke natou kau ki te minisitelio ʼi te vāhaʼa fuli. Ko ʼihi ʼe māhahaki kovi, ʼe natou fakaʼaogaʼi tonatou kiʼi mālohi moʼo faka haʼele ki muʼa ia te ʼu gāue ʼo te Puleʼaga. ʼE fakaloto mālohi ʼaupitō tatatou sio ʼaē ki te hahaʼi ʼa Sehova, logolā tonatou taʼu pea mo te ʼu ʼaluʼaga ʼo tonatou maʼuli, kae ʼe natou foaki tonatou maʼuli ki te tauhi ʼaē kiā Sehova!
2 Tou ʼOʼofa Ki Totatou Tatau: ʼE tou maʼu he leʼo ʼo loto ʼe maʼa, mo kapau ʼe tou faiga lahi ke tou tauhi kiā Sehova, ʼo tou fakahā ai totatou ʼofa ki te ʼAtua pea mo totatou tatau. ʼUhi ʼaē he neʼe foaki e Paulo tona maʼuli ki te faka mafola ʼo te logo lelei, neʼe feala ai ke ina ʼui fēnei ʼaki he loto fiafia: “ ʼE au toʼo ia koutou ke kotou fakamoʼoni kiai ʼe au maʼa ʼi te toto ʼo te tagata fuli pē.” (Gāue 20:24, 26; 1 Tes. 2:8) Kapau ʼe tou kau ki te minisitelio ʼo mulimuli pē ki totatou ʼu fealagia, pea ʼe tou maʼa anai ʼi te toto ʼo te tagata fuli pē.—Esk. 3:18-21.
3 ʼE tou fiafia mokā tou gāue lahi moʼo tokoni ki te hahaʼi. (Gāue 20:35) Neʼe ʼui fēnei e te tehina: “ ʼI te afiafi, ʼi taku toe liliu kiō ʼoku ʼi taku ʼosi gāue ʼaho kātoa ʼi taku selevisi ʼaē kiā Sehova, ʼe moʼoni ʼe au gaʼegaʼe. Kae ʼe au fiafia, pea ʼe au fakamālo kiā Sehova ʼi tana foaki mai te fiafia ʼaē ʼe mole feala ke pulihi e he tahi.”
4 Tou ʼOʼofa Ki Te ʼAtua: Ko te tupuʼaga tāfito ʼo tatatou foaki totatou maʼuli ki te tauhi ʼaē kiā Sehova, heʼe fiafia ai tatatou Tamai ʼi selō. Ko totatou ʼofa ki te ʼAtua ʼe ina uga tātou ke tou mulimuli ki tana ʼu fakatotonu, ʼaē ʼe kau kiai tana fakatotonu ʼaē ke tou fai faka mafola pea mo fai ni ʼu tisipulo. (1 Soa. 5:3) Tatau aipē peʼe mole fia logo te hahaʼi peʼe natou fakafeagai mai, kae ʼe tou fiafia aipē ʼo gāue lahi maʼa Sehova.
5 ʼE mole ko te temi ʼaenī ke tou fakasiʼisiʼi ai tatatou gāue. ʼE tou māʼuʼuli ʼi te temi taʼukai. (Mat. 9:37) ʼI te agamāhani, ko he tagata gāue kele ʼe gāue lolotoga ni ʼu hola ʼi te temi taʼukai, heʼe tuʼakoi tona temi moʼo tānaki te fulumeto naʼa liliu ʼo pala. ʼE toe tuʼakoi mo te temi ʼaē ʼe kei toe moʼo fakahoko te taʼukai fakalaumālie. ʼAua naʼa galo kiā tātou ia te maʼuhiga ʼo te temi ʼaenī ʼe tou māʼuʼuli ai, koia ʼofa pē kiā tātou fuli ke tou fakaʼaogaʼi lahi totatou maʼuli ki te minisitelio.—Luka 13:24; 1 Ko. 7:29-31.