ʼE Tou Lava Kamata Feafeaʼi He ʼu Ako Tohi-Tapu Mo Te Hahaʼi ʼAē ʼe Tou ʼAve Tuʼumaʼu Ki Ai Tanatou ʼu Nusipepa?
1. Koteā tatatou fakatuʼutuʼu mokā tou tuku he ʼu nusipepa?
1 ʼI te ʼu Moeaki, ʼe tou tufa māhani ʼi te minisitelio ia te ʼu nusipepa Te Tule Leʼo pea mo te Réveillez-vous ! Kae ʼe ko te ʼuluaki gāue ʼaia ʼe tonu ke tou fai moʼo fakahoko tatatou fakatuʼutuʼu ʼaē ke tou akoʼi ia te moʼoni ki te hahaʼi loto fakamālotoloto. ʼE tuʼu ʼi lalo ia te ʼu tokoni moʼo tufa te tohi Te Ako Mai Te Tohi-Tapu ki tatatou ʼu ʼaʼahi pea mo te ʼu tokoni ki te kamata ʼo he ako Tohi-Tapu. ʼE feala ke kotou faka ʼalutahi mo tokotou telituale pea mo kotou fai ʼaki takotou ʼu faʼahiga palalau māhani. ʼE feala hakotou filifili he tahi ʼu palalau mokā ʼe lelei age kiā koutou.
2. ʼE tou lava fakaʼaogaʼi feafeaʼi ia te ʼu ʼuluaki pāsina ʼo te tohi Te Ako Mai Te Tohi-Tapu moʼo kamata he ako Tohi-Tapu?
2 Fakaʼaogaʼi Te ʼu ʼUluaki Pāsina: ʼE feala ke kotou ʼui fēnei ʼi takotou fai te ʼaʼahi: “Ko te nusipepa ʼaē neʼe au tuku atu ʼe talanoa tāfito ki te Tohi-Tapu. ʼE feala ke ke tokagaʼi pe koʼē ʼe maʼuhiga ke tou lau ia te Tohi-Tapu.” Kotou lau age ia Isaia 48:17, 18; Soane 17:3; peʼe ko he tahi age vaega ʼe talanoa ki te manatu ʼaia. Pea ʼi takotou ʼosi fakahā age ia te tohi Te Ako Mai Te Tohi-Tapu pea mo foaki age hana tohi, ʼe feala ke kotou hoko atu fēnei:
◼ “ ʼE foaki mai ʼi te Tohi-Tapu he ʼamanaki moʼoni ki te kā haʼu.” Fakahā age ia te pāsina 4 mo te 5, pea kotou fehuʼi age fēnei: “Ko te fakapapau fea ʼi henī ʼe ke loto ke hoko?” Fuli age te kāpite ʼaē ʼe talanoa ai ki te fakapapau faka Tohi-Tapu ʼaē neʼe ina filifili, pea kotou vakaʼi fakanounou he palakalafe e tahi peʼe lua mo kapau ʼe ina fakagafua atu.
◼ Peʼe feala ke kotou ʼui fēnei: “ ʼE tali ʼi te Tohi-Tapu ki te ʼu fehuʼi ʼaē ʼe maʼuhiga ʼaupitō ʼo te maʼuli.” Fakahā age ia te pāsina 6, pea kotou fehuʼi age pe neʼe kua ina fai koa lā he fehuʼi ʼi te ʼu fehuʼi ʼaē ʼe tuʼu ʼi te lalo pāsina. Fuli age te kāpite ʼaē ʼe ina tali ki te fehuʼi ʼaia, pea fai palalau fakanounou ki he palakalafe e tahi peʼe lua.
◼ Peʼe feala ke kotou fakahā age he ʼu kupu tāfito ʼi te tānakiʼaga ʼo te ʼu kāpite pea mo kole age pē ko te kāpite fea ʼaē ʼe ina fia vakaʼi. Fuli age ia te kāpite ʼaia, pea kotou fakahā fakanounou age peʼe feafeaʼi te fai ʼo he ako Tohi-Tapu.
3. ʼE tou lava kamata feafeaʼi he ako Tohi-Tapu mokā tou tuku he ʼu nusipepa ʼe talanoa ʼo ʼuhiga (a) mo te ʼāsili kovi ʼo te ʼu ʼaluʼaga ʼo te mālamanei? (b) mo te fāmili? (c) mo te ʼuhiga moʼoni ʼo te Tohi-Tapu?
3 Kotou Lagaʼi He Fehuʼi ʼi Takotou ʼUluaki Fai Palalau: Ko te tahi faʼahi ʼe feala ke kotou fai ko te lagaʼi ʼo he fehuʼi kā kotou tali anai kiai ʼi takotou toe liliu age. ʼI te ʼosi tali e te tagata peʼe ko te fafine te ʼu nusipepa, kotou lagaʼi he fehuʼi, pea kotou fakapapauʼi age ʼe kotou tali anai kiai mokā kotou toe liliu age ki ai. Faiga ke kotou fai he fakatuʼutuʼu ke kotou toe liliu ki ai, pea mo kotou fakahoko takotou fakatuʼutuʼu ʼaia. (Mat. 5:37) Kā kotou toe liliu ki ai, kotou fakamanatuʼi age ia te fehuʼi, pea mo fai palalau fakanounou ki te tali ʼaē ʼe tuʼu ʼi te tohi Te Ako Mai Te Tohi-Tapu. Foaki hana tohi ke feala hana mulimuli kiai. Koʼenī he ʼu kiʼi faʼifaʼitaki:
◼ Kapau ko te nusipepa ʼaē ʼe kotou tuku age ʼe talanoa ʼo ʼuhiga mo te ʼāsili kovi ʼo te ʼu ʼaluʼaga ʼo te mālamanei, ʼe feala ke kotou ʼui fēnei: “ ʼI te vāhaʼa ʼaenī kā haʼu, ʼe feala ke tā fai palalau ʼo ʼuhiga mo te tali ʼa te Tohi-Tapu ki te fehuʼi ʼaenī: Ko te ʼu fetogi fea ʼaē kā fakahoko e te ʼAtua ki te kele?” Kā kotou toe liliu ki ai, fakahā age ia te pāsina 4 mo te 5. Peʼe feala ke kotou fehuʼi fēnei age: “Kā hoko he tuʼutāmaki, ʼe ko te finegalo koa ʼaia ʼo te ʼAtua?” ʼI takotou toe liliu ki ai, kotou fakahā ia te ʼu palakalafe 7 mo te 8 ʼi te kāpite 1.
◼ Kapau ko te nusipepa ʼaē ʼe kotou tuku age ʼe talanoa ʼo ʼuhiga mo te fāmili, ʼi muʼa ʼo takotou mavae, ʼe feala ke kotou lagaʼi ia te fehuʼi ʼaenī: “Koteā ʼaē ʼe feala ke fai e nātou takitokotahi ʼo te fāmili ke maʼu ai te fiafia?” Kā kotou toe liliu, kotou vakaʼi ia te palakalafe 4 ʼi te kāpite 14.
◼ Kapau ko te nusipepa ʼaē ʼe kotou tuku age ʼe talanoa ki te ʼuhiga moʼoni ʼo te Tohi-Tapu, ʼe feala ke kotou lagaʼi ia te fehuʼi ʼaenī ki hakotou tahi fai palalau mokā kotou toe liliu mai ki ai: “ ʼE totonu koa te Tohi-Tapu ʼo ʼuhiga mo te ʼu meʼa fakapoto lalahi?” ʼI takotou toe liliu ki ai, kotou vakaʼi ia te palakalafe 8 ʼi te kāpite 2.
4. Koteā ʼaē ʼe feala ke tou fai mo kapau ʼe mole tali te tohi Te Ako Mai Te Tohi-Tapu?
4 Kā ʼosi he fai palalau, kotou lagaʼi he tahi fehuʼi ke kotou tali anai kiai ʼi takotou toe liliu mai. Kā kua tuku ʼaki ke fai hoholo te ako, pea kotou vakaʼi te tohi mai tona ʼuluaki kāpite ki tona fakaʼosi. ʼE feafeaʼi mo kapau ʼe mole tali te tohi Te Ako Mai Te Tohi-Tapu? ʼE feala ke hoko atu takotou ʼolo ʼo tuku ki ai tana ʼu nusipepa pea mo fai palalau mo ia ki te Tohi-Tapu. ʼI takotou fakatuputupu ia tana fia logo, ʼaki te temi ʼe lagi ina tali anai he ako faka Tohi-Tapu.
5. He koʼē ʼe tonu ke tou faiga ke mole gata ʼaki pē mo tatatou tufa te ʼu nusipepa ki te hahaʼi?
5 ʼE feala ʼaki Te Tule Leʼo pea mo te Réveillez-vous ! ke fakaloto mālohiʼi ai he tahi ke ina fia ʼiloʼi peʼe koteā ʼaē ʼe akoʼi moʼoni mai ʼi te Tohi-Tapu. Koia, tou faiga lahi ke tou kamata he ʼu ako Tohi-Tapu mo nātou ʼaē ʼe natou tali te ʼu nusipepa. ʼI tatatou fai ʼaia, ʼe tou fakalogo anai ki te ʼu fakatotonu ʼa Sesu ke tou “fai ni ʼu tisipulo . . . , ʼo [tou] akoʼi nātou.”—Mat. 28:19, 20.