ʼAki Tatatou Minisitelio, ʼe Maʼu Ai e Te Hahaʼi Māsisiva Ia He ʼAmanaki
1 Ko Sesu neʼe tokaga tāfito kiā nātou ʼaē neʼe māsisiva. Neʼe ʼi ai te ʼu ʼaluʼaga neʼe ina fai ai te ʼu milakulo moʼo tokoni ki te hahaʼi ʼi te faʼahi fakasino, pea mo fakamālōlō te hahaʼi māhahaki, kae neʼe tokaga tāfito ʼo tala “te logo lelei” ki te hahaʼi māsisiva. (Mat. 11:5) Iā ʼaho nei, ʼe kei maʼu pē e te hahaʼi māsisiva pea mo ʼihi atu hahaʼi te ʼu lelei ʼaki te minisitelio faka Kilisitiano.—Mat. 24:14; 28:19, 20.
2 Ke Maʼu e Te Hahaʼi Māsisiva He ʼAmanaki Moʼoni ʼAki Tatatou Minisitelio: Ko te ʼu minisi ʼo te Keletiate ʼe natou fakapapau tuʼumaʼu ki te hahaʼi māsisiva ʼe natou koloaʼia anai mo kapau ʼe natou loto foaki ki te ʼēkelesia. Kae ʼe akoʼi mai ʼi te Tohi-Tapu, ʼe ko te Puleʼaga pē ʼaē ʼo te ʼAtua kā ina fakagata anai ia te masiva pea mo fakatokatoka ia te ʼu fihifihia fuli ʼo te mālamanei. (Pes. 9:18; 145:16; Isa. 65:21-23) ʼI tatatou fakahā ki te hahaʼi māsisiva te moʼoni ʼi te Tohi-Tapu, ʼe tou foaki ai kiā nātou hanatou ʼamanaki pea mo tokoni kiā nātou ke natou maʼu te ʼu meʼa ʼaē ʼe ʼaoga kiā nātou ʼi te faʼahi fakalaumālie.—Mat. 5:3.
3 Ko te kau Faliseo ʼo te temi ʼo Sesu, neʼe natou fehihiʼa ki te hahaʼi māsisiva, ʼo natou faka higoaʼi nātou ko he ʼu ‘am-haʼarèts, peʼe ko te “hahaʼi ʼo te fenua.” Kae neʼe “maʼuhiga” kiā Sesu “tonatou toto,” peʼe ko tonatou maʼuli. (Pes. 72:13, 14) ʼE feala ke tou faʼifaʼitakiʼi ia Sesu pea mo tou ‘ ʼoʼofa’ ki te hahaʼi māsisiva ʼo tou agalelei pea mo tou tōkakaga tāfito kiā nātou. (Taag. 14:31) ʼE mole tonu anai ke tou palalau kovi ʼo ʼuhiga mo te hahaʼi ʼaē ʼe māʼuʼuli ʼi he ʼu koga meʼa fakaʼofaʼofa peʼe mole tou fia faka mafola kiā nātou. Tokolahi iā natou ʼaē ʼe natou tali te logo ʼo te Puleʼaga ʼe ko he ʼu hahaʼi ʼe maʼuli māsisiva.
4 Tou Tokoni Ki Te Hahaʼi Māsisiva ʼi Te Temi Nei: Ko tatatou akoʼi ki te hahaʼi māsisiva ʼi te telituale ia te ʼu pelesepeto faka Tohi-Tapu, ʼe toe tokoni kiā nātou ke natou fakasiʼisiʼi ʼi te temi nei te ʼu ikuʼaga kovi ʼo te maʼuli masiva. Ohagē lā, ʼe tauteaʼi ʼi te Tohi-Tapu te konahia, te gaoʼi paʼaga, te piko, te suluka, pea mo te tahi ʼu aga ʼe liliu ai he tahi ʼo masiva. (Taag. 6:10, 11; 23:21; 2 Ko. 7:1; Efe. 5:5) ʼE fakaloto mālohiʼi ʼi te Tohi-Tapu ia te gāue fakahagatonu pea mo te gāue ʼaē mo he ‘loto kātoa,’ pea ko he ʼu kalitātē ʼe loto kiai te ʼu pātolō. (Kol. 3:22, 23; Hep. 13:18) ʼI te sivi neʼe fai, tokolahi te ʼu pātolō neʼe natou ʼui ko te gāue fakahagatonu pea mo te agatonu ʼe ko he ʼu kalitātē ʼe natou loto tāfito ke maʼu ʼi te hahaʼi ʼaē ʼe kumi gāue.
5 ʼE tokaga ia Sehova ki te ʼu mamahi ʼaē ʼe tau mo te hahaʼi māsisiva. Kua vave pē te haofaki e Sesu Kilisito ia “te tagata masiva ʼaē ʼe tagi ke tokoni age.” (Pes. 72:12) Kae ʼi te temi nei, ʼe kei tou maʼu ia te faigamālie ʼaē ke tou fakaloto fīmālieʼi te hahaʼi, ʼo kau kiai te hahaʼi māsisiva, ʼaki te logo ʼo ʼuhiga mo te ʼamanaki ʼaē ʼe tuʼu ʼi te Tohi-Tapu.