Ko Te Gāue Fai Fakamafola Lahi Neʼe Heʼeki Fai ʼi Te Mālamanei Kātoa!
Talu mai taʼu e 100 tupu, ʼe fakatuʼutuʼu gāue te kau Fakamoʼoni ʼa Sehova moʼo fakamafola ia te logo lelei. (1 Ko. 9:23) ʼI te gāue fai fakamafola lahi ʼaia neʼe heʼeki fai ʼi te mālamanei kātoa, ʼe tou fakahā te logo ia lea e teau tupu, iā fenua e 230 tupu. (Mat. 24:14) Kae he koʼē ʼe maʼuhiga ia te gāue ʼaia? Pea ʼe fakahoko feafeaʼi ia te gāue ʼaia ʼi te mālamanei kātoa?
Ko te foʼi ʼata DVD ʼaē ko tona kupu tāfito Les Témoins de Jéhovah : organisés pour proclamer la bonne nouvelle, ʼe tali ki te ʼu fehuʼi ʼaia, heʼe fakahā lelei ai te ʼu faʼahi kehekehe ʼo tatatou gāue ʼaē ʼi te mālamanei kātoa. ʼI takotou sioʼi ia te foʼi ʼata ʼaia, kotou tali ki te ʼu fehuʼi ʼaenī: (1) ʼE feafeaʼi ia te fakatuʼutuʼu pea mo te takitaki ʼo tatatou gāue? (2) ʼE tokoni feafeaʼi ki te fakahā ʼo te logo lelei ia te Selevisi Faitohi pea mo Fai Fakaliliu, pea mo te ʼu selevisi Fai Pāki, mo Fai Puke Leʼo pea mo Fai Te ʼu Foʼi ʼAta? (3) Koteā te gāue ʼaē ʼe fakatuʼutuʼu kiai ia te ʼu fale tā tohi pea mo te selevisi ʼaē ʼe tokaga ki te momoli ʼo te ʼu tohi ki te ʼu fenua? (Soa. 17:3) (4) Ko tohi e fia ʼe tā ʼi te taʼu fuli? (5) ʼE malave feafeaʼi ki te hahaʼi ia tatatou ʼu tohi fakatohi-tapu? (Hep. 4:12) (6) Koteā ʼaē ʼe fai moʼo foaki he tokoni fakalaumālie kiā nātou ʼaē ʼe kivi pea mo tuli? (7) ʼE totogi feafeaʼi tatatou gāue? (8) Ko te ʼu lelei fea ʼe tou maʼu mai te gāue ʼaē ʼe fai e te Selevisi Felōgoi Mo Te Kau Tōketā, te Selevisi Gāue, pea mo te Selevisi ʼo te ʼu Fakatahi Lalahi? (9) ʼI tatatou kau ki te kau Fakamoʼoni ʼa Sehova, neʼe feafeaʼi ia te fakatuputupu ʼo takotou loto fakafetaʼi e te foʼi ʼata viteo ʼaia (a) ki te gāue lahi ʼaē ʼe fai e te kautahi ʼa Sehova moʼo fakamafola ia te logo lelei? (b) ki te ʼu fāmili ʼi te ʼu Petele e 100 tupu ʼi te mālamanei kātoa? (c) ki te ako ʼaē ʼe fai maʼa te ʼu taupau pea mo te ʼu misionea? (d) ki te maʼuhiga ʼi te ʼaho fuli ke kamata te ʼaho ʼaki te vakaʼi ia te vaega Tohi-Tapu pea mo te teuteu ia tatatou ʼu fono ʼi te vāhaʼa fuli? (e) ki te ʼu lelei ʼo tatatou kau ki tatatou ʼu fakatahi fakakilisitiano? (f) ki te fakaʼuhiga anai ʼo te Palatiso ʼi te kele? (Isa. 11:9) (g) ki tatatou kau takitokotahi ki te tānaki ʼo te taʼukai ʼaē ʼe lolotoga fai nei?—Soa. 4:35.
ʼI te sioʼi ʼo te foʼi ʼata ʼaia e tokotou ʼu kāiga, mo tokotou ʼu feʼilo, mo nātou ʼaē ʼe kotou ʼaʼahi, pea mo te kau ako Tohi-Tapu, koteā te meʼa lelei ʼaē neʼe kotou fakatokagaʼi iā nātou ʼaia? ʼE lagi lelei hakotou foimo fakahā ia te foʼi ʼata viteo ʼaia ki he tahi age pea mo palalau kiā ia ʼo ʼuhiga mo te logo lelei.—Mat. 28:19, 20.